Winchester Repeating Arms Company

Ar Winchester Repeating Arms Company a oa ur produer armoù-tan tennata ha munisionoù a bouez e fin an XIXvet ha deroù an XXvet kantved. Krouet e oa bet e 1866 gant Oliver Winchester ha diazezet e oa e New Haven, Connecticut. E adreizhadur barnerezhel e voe lakaet an embregerezh e 1931 ha prenet e voe gant ar Western Cartridge Company, a zeuas da vezañ goude an Olin Corporation. Armoù-tan ha munisionoù a vez produet dindan an anv Winchester c'hoazh.

Istor

Horace Smith ha Daniel B. Wesson, daou armeurer amerikan, a savas e 1855 ar Volcanic Repeating Arms Company da werzhañ o frodu nevez, ar bistolenn Volcanic. Ur produer rochedoù, Oliver Winchester, a brenas ar braz eus lodennoù an embregerezh. Ne reas ket berzh produioù Volcanic hag e 1857 e voe adprenet e zle gant Oliver Winchester, a adaozas anezhañ dindan an anv New Haven Arms Company. Smith ha Wesson a savas diwezhatoc'h Smith & Wesson, un embregerezh armoù brudet all.

Berzh a reas an New Haven Arms Company gant ar fuzuilh Henry, ur fuzuilh-dennata hep taboulin ebet, dezhi ul loc'henn-grogenn, enni ur c'harger korzennek 16 kartouchenn.

E 1866 e savas dizemglev etre Benjamin T. Henry, krouer ar fuzuilh Henry, hag Oliver Winchester. Hemañ a adaozas an embregerezh hag adanvet e voe Winchester Repeating Arms Company^[1]. E 1880 e varvas Oliver Winchester, evel e vab hag heulier William Wirt un nebeud mizioù war e lerc'h.

Kenlabourat a reas an embregerezh gant an ijinour armoù brudet John M. Browning etre 1883 ha 1898. Frouezhus e voe ar c'henlabour-se ha berzh a reas Winchester d'ar mare-se, ken niverus ha modern e oa an ijinadennoù degaset gant Browning.

Brezel-bed Kentañ

E-pad ar Brezel-bed Kentañ e produe Winchester fuzuilhoù Enfield M1914 kambret e .303 British evit ar Rouantelezh-Unanet ha fuzuilhoù Enfield M1917 kambret e .30-06 Springfield evit an U.S. Army. Er memes mare ec'h ijinas John Browning ar Browning Automatic Rifle (BAR) hag e voe krouet gant ijinourien Winchester asambles gantañ ar c'halibr munisionoù .50 BMG (12,7 × 99 mm) da vont ennañ.

Kalz arc'hant a oa bet amprestet gant an embregerezh Winchester e-pad ar brezel evit brasaat he froduerezh. Goude ar brezel he doe poan o restaoler an arc'hant-se abalamour da zigresk ar goulenn war an armoù hag ar munisionoù goude 1919. Armoù nevez a voe ijinet, evel ar Model 52 priziet adalek 1920 gant an dennerien sport, met ne zeuas ket an embregerezh a-benn da vont dreist an Enkadenn Veur. Freuzstal a reas hag adprenet e voe gant ar familh Olin.

Eil Brezel-bed

E-pad an Eil Brezel-bed e voe produet armoù-tan hiniennel e uzinoù Winchester, evel an M1 Garand hag an M1 Carbine. Goude ar brezel e produas ivez fuzuilhoù M14. Hiziv an deiz e vez implijet c'hoazh ar merk Winchester gant an Olin Company a brodu munisionoù dindan e anv. Daou embregerezh o deus ul lisañs evit produiñ armoù-tan dindan an anv Winchester : an FN Herstal (Belgia) ha Browning (SUA).

Produioù

Fuzuilhoù ha karabinennoù brudetañ

Winchester Model 1866
Winchester Model 1873
Winchester Model 1876
Winchester Model 1885
Winchester Model 1886
Winchester Model 1892
Winchester Model 1894
Winchester Model 1895
Winchester Model 1897
Winchester Model 1912
Winchester Model 52
Winchester Model 70
Winchester Model 1200/1300
Winchester Wildcat

Munisionoù ijinet gant an embregerezh

An embregerezh a ijinas kalibroù munisionoù e-touez ar re vrudetañ, dreist-holl a-drugarez d'e labour gant John Browning. Ar braz anezhe a vez produet c'hoazh. Daou anezhe a zo chomet evel munisionoù standart armeoù AFNA (an .308 en e stumm milourel hag an .50 BMG).

Tro-dro da Winchester

Er western Winchester '73 (1950) e kemer perzh an aktour James Stewart en ur genstrivadeg evit gounit ur garabinenn Winchester M1873 ispisial : hervez ar vojenn e veze produet ur garabinenn dreistordinal diwar vil gant Winchester, uheloc'h he c'halite evit ar re all.
Dastumadeg armoù, munisionoù ha dafar an embregerezh a zo er mirdi Cody Firearms Museum e Cody (Wyoming).^[2]
Ur garabinenn Winchester Model 1873 produet e 1882 zo bet kavet e 2014 harp ouzh ur wezenn-jenevreg e Great Basin National Park (Nevada, SUA). Eno e vije bet laosket ouzhpenn 100 vloaz zo. Lesanvet eo bet The Forgotten Winchester gant an arkeologourien.

Liammoù diavaez

(en) Lec'hienn an embregerezh (lennet d'an 03/10/2024)

Daveennoù

↑ (en) BOORMAN, Dean K., History of Winchester Firearms. Guilford, CT: Lyons Books, 2001, p. 19
↑ (en) NICHOLSON Ben, 18. Cody Firearms Museum (lennet d'an 08/08/2024)

Stag eo ar bajenn-mañ ouzh Porched an Armoù-tan

[1] (en) BOORMAN, Dean K., History of Winchester Firearms. Guilford, CT: Lyons Books, 2001, p. 19

[2] (en) NICHOLSON Ben, 18. Cody Firearms Museum (lennet d'an 08/08/2024)

[1]

[2]