Emgleo Breiz

Emgleo Breiz a oa ur c'hevredad, pe ur c'hengevredad aozadurioù brezhonek hag a embanne levrioù skrivet en doare-skrivañ a vez graet "skolveurieg" anezhañ gant e implijerien, falc'huneg gant ar re all. Paouez a reas ar gevredigezh gant hec'h oberoù da heul diviz an 3 a viz Du 2015 roet gant Lez-varn ar C'henwerzh e Brest a zisklêrias freuz-stal ar gevredigezh.

Istor

Savet eo bet ar c'hengevredad e 1955, evit brudañ implij ar yezh en deskadurezh, er c'helaouiñ, er vuhez foran.

Pellaat diouzh menozioù an emsav, hini a-raok ar brezel ha goude, a felle d'e renerien, ha chom feal ivez da vrezhoneg ar bobl.

Strollañ a ra an aozadurioù breizhat pennañ hag a embann e skolveurieg. Enebet e oa ouzh Kuzul ar Brezhoneg, savet e 1958, a felle dezhañ kenderc'hel gant labour Gwalarn, ha brudañ ar peurunvan.

Burev

• Prezidant : Fañch Broudig
• Besprezidanted : Mari Kermareg, Loeiz Grall
• Sekretour : Fañch Colcanap
• Teñzorour : Jakez Andre

Embannadurioù

Er bloavezhioù 1950, e voe embannet levrioù dindan anv Emgleo Breiz, gant :

• Ar Falz-Skol Vreiz, ur c'hevredad hag a oa dezhañ ur gelaouenn anvet Ar Falz-Skol Vreiz, renet e-pad pell gant Per Honoré, eus Plourin-Montroulez; er bloavezhioù 1970 e savas a-du gant un trede doare-skrivañ, a vez graet "etrerannyezhel" anezhañ gant e implijerien; goude e troas a-du gant ar peurunvan hag e voe savet ti-embann Skol Vreizh;
• Ar gelaouenn Brud, hiriv Brud Nevez, renet e-pad pell gant Andreo ar Merser, hag hiriv gant Fañch Broudig.

Ur c'hatalog 450 oberenn zo gant Brud Nevez, Ar Skol Vrezoneg hag Emgleo Breiz. Bep bloaz e teu 10 pe 15 levr nevez gante. Levr ebet ken evit ar vugale, dre ma vez kelennet e peurunvan tost e pep lec'h bremañ.

Izili

Er penn-kentañ

• ar gevridigezh Ar Falz (n'eo ket ezel ken abaoe ar bloavezhioù 70, pa voe krouet ar skritur etrerannyezhel gant Fañch Morvannou)
• ar gevridigezh Bleun-Brug (tasmant)
• ar gelaouenn Bleun-Brug (aet da get)
  • Cahiers du Bleun-Brug (aet da get)
• Kengevread Kendalc'h (kelc'hioù keltiek) (n'emañ ket e-barzh ken)
• Kengevread ar c'helc'hioù keltiek War'l leur
• Al Leur Nevez (Kemper ha Kerne) : kentelioù brezhoneg, dastum, embann pladennoù gant kanaouennoù poblek ...
• Skolig al Louarn (Leon Izel) : ur mirdi e Plouvien, kentelioù brezhoneg, obererezhioù evit ar vugale...
• Ar Skol Vrezoneg (Brest) : Kentelioù brezhoneg, embannadurioù...
• Ar Skol dre Lizer : kentelioù brezhoneg dre kenskrivañ
• ar gelaouenn Brud Nevez (6 niverenn ar bloaz) : kelaouenn sevenadurel ha lennegel.

Tud

Prezidanted

• Pêr Mokaer, bet kuzulier kanton Eusa, bet prezidant Kendalc'h
• Pêr Mari Mevel, kelenner ha skrivagner
• Jean Tricoire, medisin, saver un hentenn-deskiñ
• Armand Keravel, skolaer ha penn Ar Falz
• Andreo ar Merser, skolaer, saver ar Skol Vrezoneg, anvet da brezidant a enor
• Fañch Broudig, prezidant a-vremañ.

Bet izili

E Kengevread Emgleo Breiz eo bet :

• François Falc'hun (1909-1991), beleg ha chaloni, krouer ar skritur anvet gantañ skolveurieg, ha lesanvet falc'huneg,
• ar breur Visant Seite (1908-1993), a savas ar Skol dre Lizer, diwar skouer Skol Ober;
• ar beleg Visant Fave, bet chaloni, ha goude eileskob Kemper
• Per-Jakez Helias, kelenner skol normal
• Pêr Mari Mevel
• Pêr Trepos, kelenner skol-veur
• Loeiz Roparz, kelenner skol normal
• Anna-Vari Arzur, leanez
• Remi Derrien (1946-2009), kelenner saozneg, den a c'hoariva

Izili a vremañ

• Fañch Broudig (prezidant a-vremañ)
• Andreo ar Merser, Charlez ar Gall, Marie Kermarrec, Gilles Goyat, Patrig Gouedig, Jakez Andre, Louis Grall, Maguy Kerisit...

Kenlabourerien

E-touez kenlabourerien Brud Nevez e kaver muioc'h-mui a dud a skrive e peurunvan da gentañ: Sylvain Botrel, Henri Dorsel, Jakez-Erwan Mouton, Envel Kerhoaz... Darn ivez o deus bet embannet un oberenn bennak e peurunvan : Mikael Madeg, Maguy Kerisit, ...

Liamm diavaez

• Actualité d’Emgleo Breiz ?, pennad gant Fañch Broudic e-barzh La Bretagne Linguistique

Porched Breizh – Adkavit pennadoù ha rummadoù Wikipedia a denn da Vreizh.