Fuzuilh

Eus Wikipedia
Ur sell a-dostoc'h ouzh ur fuzuilh chase, dezhi daou ganol flour da wintañ kalibr 18.
Ar Sturmgewehr 44, unan eus ar fuzuilhoù-arsailh kentañ ijinet e fin an Eil Brezel Bed.

Ur fuzuilh zo un arm-tan hir evit tennañ a-bell hag a rank sañset bezañ implijet gant e zaouarn pe pozet war ur pezh (daoubez, trebez, sac'h) pa denner. E geriaoueg an arme ez eo ur fuzuilh un arm-tan dezhañ ur c'hanol rizennet. Pa raer anv eus armoù implijet er-maez eus an arme (evit chaseal dreist-holl) ez eo ur fuzuilh un arm dezhañ unan pe meur a ganol flour.[1]

Lies eo ar fuzuilhoù. Ar fuzuilhoù-arsailh a zo implijet dreist-holl gant an armeoù. Ar fuzuilhoù-resisted a vez implijet gant an armeoù ha strolladoù surentez ar Stadoù evel ar polis. Fuzuilhoù poultr-du a vez implijet c'hoazh gant dastumerien hag e kenstrivadegoù tennañ gant armoù kozh.

Pa raer anv eus un arm-tan hir rizennet e ganol(ioù) hag implijet evit chaseal pe e bed an tennerezh-sport e implijer kentoc'h ar ger karabinenn. Met e geriaoueg an arme e implijer a-wechoù ar ger karabinenn evit armoù rizennet o c'hanol berroc'h o ment hag o hed-tenn (Karabiner 98k, M1 Carbine).

Fuzuilh-arsailh[kemmañ | kemmañ ar vammenn]

Ur fuzuilh-arsailh, pe fuzuilh-argad, a zo graet evit tennañ betek 300 metrad gant ar mod damaotomatek, pe betek 30 metrad er mod aotomatek. Hendad ar fuzuilhoù-arsailh en istor a voe an avtomat Ferodova, krouet e Impalaeriezh Rusia e 1916. E fin an Eil Brezel-bed e voe ijinet en Alamagn ar Sturmgewehr 44, a zo gwelet evel ar fuzuilh-arsailh modern kentañ. Hiziv e implij ar bras eus an armoù-mañ ar c'halibr standart 5,56 x 45 mm NATO. E-touez ar c'halibroù all implijet ar muiañ e kaver ar 7,62 x 51 mm NATO pe ar 7,62 x 39 soviedel.

Un AK-47, a zo e-touez ar fuzuilhoù-arsailh implijetañ er bed ablamour d'he soluter ha d'he friz izel.[2]

Skouerioù fuzuilhoù-arsailh[kemmañ | kemmañ ar vammenn]

Fuzuilh-resisted[kemmañ | kemmañ ar vammenn]

Ur fuzuilh resisted a vez implijet gant an armeoù da lazhañ enebourien pe distruj dafar en tu all da 300 metrad. Bremañ e vez atav pourveziet gant ul lunedenn da welet pell. E miz Mae 2017 ez eus bet lazhet un den da 3.540 metrad gant ur soudard kanadian e Irak[3]. E-touez ar c'halibroù bras implijet ar muiañ hiziv e kaver an .50 BMG, an .338 Lapua Magnum, ar re .375 ha .408 CheyTac. En XXvet kantved ez eus bet implijet kenañ kalibroù evel an .30-06 Springfield gant arme Stadoù-Unanet Amerika. Ar c'halibr .308 Winchester a vez implijet c'hoazh e fuzuilhoù a-bell gant kalz strolladoù polis er bed. A-wechoù e vez graet gant ur c'halibr bihanañ evel an 5,56 x 45 NATO implijet e fuzuilhoù Sig Sauer 550 ar GIGN e Frañs[4].

Ur fuzuilh a-bell M40 amerikan gant he lunedenn hag he daoubez.

Skouerioù fuzuilhoù a-bell[kemmañ | kemmañ ar vammenn]

  • SVD Dragunov (URSS, 1963)
  • An M40 amerikan (1966), diazezet war ar garabinenn Remington 700
  • FR-F1 (Frañs, 1966)
  • FN SCAR-H PR (Belgia)
  • Barrett M82 (Stadoù-Unanet Amerika, 1982)
  • M24 (Stadoù-Unanet Amerika, 1988)
  • McMillan TAC-50 LRSW (Stadoù-Unanet Amerika, fin ar bloavezhioù 1980)
  • Accuracy International AWM (Rouantelezh-Unanet, 1996)

Fuzuilh-chase[kemmañ | kemmañ ar vammenn]

Ur fuzuilh chaseal tri zenn damaotomatek Franchi Fast Pro, kalibr 12/76.

Ur fuzuilh-chase he deus alies daou ganol flour, a-wechoù unan pe dri. Implijet e vez da dennañ war loened tost a-walc'h (dindan 50 metrad). Gellet a ra bezañ karget gant kartouchennoù plom evit ar jiboez bihan pe gant kartouchennoù slug enne ur boled evit al loened brasoc'h (moc'h-gouez, kirvi...). E-touez ar c'halibroù implijet ar muiañ e kaver ar c'halibroù 12 ha 20. Ar c'halibr 16 a oa an hini implijetañ e Frañs a-raok ar bloavezhioù 1970. Ar c'halibr .410 (pe 36 magnum) a gaver e fuzuilhoù bihan da lazhañ loened bihan a-dost. En Europa eo kambret peurliesañ ar fuzuilhoù chase e 65 mm, 70 mm pe 76 mm (magnum).

Ur fuzuilh-chase daou denn Browning B25 kalibr 12. He daou ganol a vez gwintet da gargañ anezhi.

Skouerioù fuzuilhoù-chase[kemmañ | kemmañ ar vammenn]

Fuzuilh poultr-du[kemmañ | kemmañ ar vammenn]

Da glokaat.

Gwelet ivez[kemmañ | kemmañ ar vammenn]

Wikeriadur
Sellit ouzh ar ger Fuzuilh er
wikeriadur, ar geriadur frank.


Notennoù ha daveennoù[kemmañ | kemmañ ar vammenn]

  1. Olivier ACHARD, L'Univers des fusils, Solar 2002, p. 15
  2. [1] Comment la kalachnikov a changé le monde, troet gant Jean-Clément NAU, Slate, 11 a viz C'hwevrer 2012
  3. [2] Irak: Un sniper canadien abat un djihadiste de Daesh à une distance de 3.500 mètres, 20 minutes avec agences, 23 a viz Gouere 2017
  4. [3] Pajenn GIGN.org.
  Stag eo ar bajenn-mañ ouzh Porched an Armoù-tan