AK-47

Avtomat Kalachnikova 47
	; ; Ur fuzuilh-arsailh AK-47
Kinnig
Bro	URSS
Doare	Fuzuilh-arsailh damaotomatek/aotomatek
Mont en-dro	Tennata dre amprest-gazoù, piston
Munision	7,62 × 39 mm M43
Ijiner	Mic'hail Kalachnikov
Mare produiñ	Abaoe 1947
Meneger GRAU	6P1
Perzhioù teknikel
Mas (hep kartouchenn)	4,300 kg
Mas (karget)	5,117 kg
Hirder	870 mm
Hirder ar c'hanol	415 mm
Hed-tenn pleustrek	Etre 200 ha 400 m
Tizh ar boledoù V0	710 m/s
Lusk-tennañ	600 tenn/mn
Endalc'h	Karger fiñv 30 kartouchenn (a-wechoù 40 pe 75 kartouchenn)
Adstummoù nesañ	AKS,AKSN; AKM, AKMS, AKML, AKMN; RPK;
Lezenn
Rummad e Bro-C'hall	A

Evit implijoù all, gwelet Kalachnikov.

An AK-47, e rusianeg Автомат Калашникова, Avtomat Kalachnikova [stumm] 1947, anavezet muioc'h dre an anv Kalachnikov, a zo ur fuzuilh-arsailh savet gant Mic'hail Kalachnikov e 1947. A-raok donedigezh an AK-74 er bloavezhioù 1970 e veze graet AK nemetken anezhi en anvadurezh soviedel.

Kambret eo er c'halibr 7,62 × 39 mm. E 1949 e oa bet lakaet da arm ofisiel al lu rusian ha da heul gant broioù Pakt Varsovia. Abalamour da levezon URSS eo bet implijet gant kalz a strolladoù dispac'hour, sponterien hag armeoù Stadoù er bed a-bezh. An arm-tan gwerzhet ar muiañ en Istor eo an AK-47 : etre 75^[1] ha 100 milion a zo bet produet hervez ar mammennoù, met diaes eo gouzout an niver abalamour d'an niver uhel a skouerennoù savet dre guzh^[2]. Marc'had-mat eo, aes da implijout, padus, ha ral eo e chomfe bout^[3]. Savet eo bet evit bezañ implijet e endroioù lous pe start. An AK-47 hag he c'hopiennoù zo e-kreiz an trafikerezh armoù o tont eus broioù ar Balkanioù^[4]. Produet e vez c'hoazh hiziv an deiz.

Istor

E-kerzh an Eil Brezel-bed e voe amprouet gant an Alamaned pimpatromoù Sturmgewehr 44, un arm aotomatek nevez kambret en ur munision berroc'h evit ar re a veze implijet betek-neuze. Bamet e voe renerien an URSS o welet un arm ken modern o tont war-wel. D'ar 15 a viz Gouere 1943, Komiserdi poblel an armañ a roas urzh da sevel un arm soviedel evit talañ d'al lañs a oa gant an Alamaned. Ur skipailh en e benn an ijinour N.M. Elizarov (Н.М. Елизаров) a voe karget d'ober war-dro ha da gavout un arm ken efedus ar buanañ ar gwellañ. Diorroet e voe ar c'hartouchennoù 7,62 × 39 mm evit an arm da zont. E 1944 e voe roet lañs d'ur genstrivadeg da grouiñ an arm-mañ.

Mic'hail Kalachnikov, ur bleiner kirri-houarnet soviedel, a oa krog da sevel armoù en e wele ospital goude bezañ bet gloazet da vare emgann Bryansk. E 1944 e kemeras perzh er genstrivadeg evit sevel an arm aotomatek nevez. Kinnig a reas e raktres fuzuilh met koll a reas a-enep Sergey Gavrilovitch Simonov hag e SKS-45.

Merzhet e voe memestra barregezhioù Kalachnikov hag anvet e voe da ijinour, e penn ur skipailh enklask war an armoù aotomatek. E fin ar bloavezh 1946 e oa savet pimpatromoù kentañ an AK-1. Un ezel eus ar skipailh, Aleksandr Zaitsev, a deuas a-benn da gendrec'hiñ Kalachnikov da simplaat e arm.

Pimpatromoù all (AK-2 hag AK-3) a voe savet ha peurechuet e miz Du 1947. E 1948 e krogas produerezh an AK-47 en embregerezh IJMACH, en uzin 524. E 1949 e voe lakaet da arm ofisiel al lu soviedel.

An AK-74 a gemeras he flas en arme soviedel adalek ar bloavezhioù 1970. War-dro 75 milion a skouerennoù eus an AK-47 zo bet produet betek hiziv en ur mod ofisiel^[1].

Perzhioù teknikel

An AK-47 zo dezhi ur sistem tennata dre amprest gazoù dre biston. Boest he c'hulasenn zo e dir koaget : mestroniañ an doare-produiñ-mañ a oa nevez er bloavezhioù 1940. Ur golo fiñv zo war he c'hulasenn evit mirout anezhi da zegemer loustoni. Perzhioù all eus ar fuzuilhoù-arsailh modern en deus an arm, evel ur c'harger uhel e endalc'h (30 tenn) hag ur c'hanol berr a-walc'h (415 mm)^[1].

Liamm gant ar Sturmgewehr 44

An Alaman Hugo Schmeisser, saver an MP 40 hag ar Sturmgewehr 44, a oa bet rediet da labourat evit Soviediz etre 1945 ha 1952. Kaset e oa bet da uzin Izhevsk, ha kenlabouret en doa gant Mic'hail Kalachnikov. Daoust d'ar pezh a lenner pe a glever a-wechoù, n'eo ket an AK-47 ur gopienn eus an Stg 44, daoust d'o stumm a c'hell seblant damheñvel ha d'an implij a reont eus kartouchennoù berr. Disheñvelderioù bras a gaver etre an daou arm :

o sistem morailhañ ar gulasenn (o treiñ war an arm soviedel, dre ur c'hrog war an Stg 44) ;
ar winterell a lak ar gulasenn da vont war an a-raok adarre a zo e-barzh lamm an Stg 44. Er voestad kulasenn emañ en AK-47.
gwikefre an draen zo simploc'h war an arm soviedel ;
stummoù kentañ an AK-47, a-raok ar stumm AKM, a oa savet o boestad-kulasenn e dir ijinennet. An Stg 44 a oa savet gant dir darsanket dreist-holl.

Er sevenadur

Alies e vez keñveriet an AK-47 gant an M-16, arm enebourien stadunanat an URSS da vare ar Brezel Yen. E-kerzh brezel Viêt Nam dreist-holl ez eo bet an daou arm o talañ an eil ouzh egile.
Arouez brezelioù dieubidigezh kalz pobloù er bed eo deuet an AK-47 da vezañ, en Afrika hag er broioù arab dreist-holl, etre ar bloavezhioù 1950 ha 1980. Adalek ar bloavezhioù 1990 eo cheñchet skeudenn an arm er mediaoù european ha norzhamerikan evit dont da vezañ arouez ar sponterezh islamour. E Frañs eo stag ivez abaoe ar bloavezhioù 2010 an AK-47 ouzh ar muntroù stag d'an trafikerezh drammoù e karterioù Marselha pe bannlevioù Pariz^[5].
Un AK-47 a gaver war bannieloù aozadurioù zo evel an Hezbollah. An arm a gaver ivez war banniel ar Mozambik.
Er film Lord Of War embannet e 2005, a gont istor damwir un trafiker armoù, e weler kalz fuzuilhoù-arsailh AK-47. E digoradur ar film ec'h heulier savidigezh ur boled AK-47 eus an uzin betek an dachenn-emgann^[6]. Ken marc'had-mat eo an AK-47 ma voe emsavoc'h da broduerien Lord Of War prenañ 3 000 arm gwirion eget prenañ reoù faos.
Gellet a raed implijout an AK-47 e meur a c'hoari video, en o zouez er c'hoari digoust enlinenn Battlefield Play4free pa vezed gant ur renk soudard pe medisin.

Liammoù diavaez

Levrlennadur

(en) Duncan Long, AK47: The Complete Kalashnikov Family of Assault Rifles, Paladin, 1988, 192 p., ISBN 978-0873644778
(en) Gordon L. Rottman, The AK-47: Kalashnikov-series assault rifles, Osprey Publishing, 2011, 80 p., ISBN 9781849084611
(en) Joe Poyer, The AK-47 and AK74 Kalashnikov Rifles and Their Variations, North Cape Publications, 2013, 200 p., ISBN 978-1882391417
(en) Frank Iannamico, AK-47: The Grim Reaper, Chipotle Publishing, 2016, 1086 p., ISBN 978-0982391853

Daveennoù

1 2 3 (fr) HOUSTON Rob, STROYAN Christine (renerezh), Armes à feu de légende, Larousse, 2019, ISBN 978-2035979650, pp. 248-249
↑ (fr) Kalachnikov, l'inventeur du fusil le plus vendu au monde, est mort à 94 ans, e Jeune Afrique, 24/12/2013
↑ (fr) ACHARD Olivier, L'univers des fusils, Solar, 2002, p.76
↑ (fr) Trafic d'armes en France : la face cachée du crime, e La Croix, 11/06/2023
↑ Hervez ur studiadenn kaset gant Anaïs BENGUIGUI e 2014. Meneget gant Philippe BOULANGER e Géoplitiques et cultures Kalasnikov in Les Français et les armes à feu (fr), Maisonneuve & Larose, 2018, p. 351-363
↑ (en) Munutennoù kentañ Lord of War (gwelet d'ar 17/10/2024)

Stag eo ar bajenn-mañ ouzh Porched an Armoù-tan

[:0-1] 1 2 3 (fr) HOUSTON Rob, STROYAN Christine (renerezh), Armes à feu de légende, Larousse, 2019, ISBN 978-2035979650, pp. 248-249

[2] (fr) Kalachnikov, l'inventeur du fusil le plus vendu au monde, est mort à 94 ans, e Jeune Afrique, 24/12/2013

[3] (fr) ACHARD Olivier, L'univers des fusils, Solar, 2002, p.76

[4] (fr) Trafic d'armes en France : la face cachée du crime, e La Croix, 11/06/2023

[5] Hervez ur studiadenn kaset gant Anaïs BENGUIGUI e 2014. Meneget gant Philippe BOULANGER e Géoplitiques et cultures Kalasnikov in Les Français et les armes à feu (fr), Maisonneuve & Larose, 2018, p. 351-363

[6] (en) Munutennoù kentañ Lord of War (gwelet d'ar 17/10/2024)

[1]

[2]

[3]

[4]

[5]

[6]