AK-47
.
An AK-47, e rusianeg Автомат Калашникова, Avtomat Kalachnikova [stumm] 1947, anavezet muioc'h dre an anv Kalachnikov, a zo ur fuzuilh-arsailh savet gant Mic'hail Kalachnikov e 1947. E 1949 e vezo lakaet dindan un doare ofisiel da vezañ degemeret evel arm al lu Rusian ha d'e heuil gant broioù Pakt Varsovia.
An arm-tan muiañ-kenderc'het ha muiañ-gwerzhet en Istor mab-den eo an AK-47. Marc'had-mat eo, aes da implij, padus, ha ral eo e chomfe boud. Implij a ra bolodoù ponner ar re 7.62x39mm.
Ar strolladoù reveulziañ eus an tu-kleiz, an tu dehoù, ar vroadelourien, ar sponterien, luioù ar Stadoù a implij an arm AK-47.
Etre 70 ha 110 million a skouerennoù eus an AK-47 a zo bet savet ha gwerzhet dre ar bed.
Kenderc'hel a ra hiziv an deiz c'hoazh da vezañ produet.
Istor an AK-47[kemmañ | kemmañ ar vammenn]
E-kerzh an Eil brezel-bed ez eo bet degaset gant an Alamanted un arm nevez war an tachennioù emgann, an Stg-44 (Sturmgewehr 44 an arm korventenn). Bammet ha sabatuet net e voe an URSS o welet un arm ken vodern o tont war-wel gant an Trede Reich. D'ar 15 a viz gouere 1943, Komiserdi poblel an armañ a roas urzh bras da sevel un arm soviedel evit talañ d'al lañs a oa gant an Alamanted. Ur skipailh en e benn an ijinour N.M. Elizarov (Н.М. Елизаров) a voe karget d'ober war-dro ha da renkañ ar buanañ ar gwellañ ar gudenn 'se. Int-i a vo o kavout e vije mat implij bolodoù 7.62×39mm. E 1944 dre ma ne oa ket bet diluziet ar gudenn c'hoazh e voe roet lañs dre an URSS a-bezh dindan stumm ur genstrivadeg da grouiñ an arm hag a rae diouer anezhi.
Mic'hail Kalachnikov en deus kroget gant hent ar sevel armoù en e wele ospital goude bezañ bet gwallaozet e-pad emgann Briansk. E 1944 e gemer perzh er genstrivadeg sevel an arm. Gant an diaz roet d'an arm ar bolodoù 7.62×41mm degaset kement gant Yelizarov ha Syomin Mic'hail Kalachnikov a ginnigas un arm met koll a reas e-tal Sergueï Simonov hag e mennozh arm an SKS-45.
Mennozh hag ambroug an ijinour Kalachnikov a voe merzhet ha setu anezhañ savet da ijinour e-penn ur skipailh enklask gant ar memes pal. E fin ar bloavezh 1946 ur wech savet ul lod prototipoù eus an AK-1, setu unan eus skipailh Kalachnikov o vountañ trumm warnañ evit cheñch stumm an arm d'e simplaat. Aleksandr Zaitsev a zeuas a-benn da cheñch tro-spered penn e skipailh memes ma voe diaes dre ma oa dammechu an AK-1 hag e soñje da Galachnikov e oant sur da vezañ tec'h er genstrivadeg.
Da heuil an AK-1 e voe savet an AK-2 hag an AK-3 ha peurechuet lod anezho e miz du 1947. E 1948 e grog ur broduerezh sioul eus an AK-47 en embregerezh produiñ armoù Izhevsk, en uzin 524. Er bloavezh 1949 e voe lakaet da arm ofisiel al lu soviedel dindan an anv "7.62 mm fuzuilh-arsailh Kalachnikov (AK)"
Tro-dro d'an AK-47[kemmañ | kemmañ ar vammenn]
- Er film Lord Of War embannet e 2005, a gont istor damwir ur gwerzher armoù, ec'h adkaver kalz ar fuzuilhoù-arsailh AK-47.
- Diouzhtu e digoradur ar film ec'h heulier savidigezh ur boled AK-47 betek an dachenn-emgann.
- Ken marc'had-mat eo an AK-47 ma voe emsavoc'h da broduerien Lord Of War prenañ 3 000 arm gwirion eget prenañ reoù faos.
- Alies e vez keñveriet an AK-47 gant e vreur enebour an M-16. E-kerzh brezel Vietnam dreist-holl ez eo bet an daou arm o talañ an eil ouzh egile.
- An tu a vez da implij an AK-47 er c'hoari digoust enlinenn Battlefield Play4free pa vezer gant ur renk soudard pe medisin.
