Draen (armoù)

Draen ur bistolenn damaotomatek.

Draen un arm eo ar pezh a laosk an tenn da vont pa vez pouezet warnañ, gant ar biz-yod peurliesañ. Drein a gaver war an armoù-tan, an armoù dre aer gwasket, an arbalastroù pe ar fuzuilhoù-harpon.

Drein an armoù-tan

Draen ar braz eus an armoù-tan a-vremañ zo ul loc’hennig plat dirak dornell an arm. An draen a vez gwarezet alies gant ur pezh-surentez tro-dro dezhañ anvet pontig. An draen a c'hall bezañ ur bouton a bouezer warnañ gant ar biz-meud evel war ar vindrailherez Browning M2.

Pezhioù gwikefre ur fuzuilh-vorailh : (A) draen, (B) pluenn, (C) gwinterell ar skoer, (D) skoer

Pazennoù mont en-dro un draen

Ar red a zo etre stad an draen er paouez hag al laoskel, da lavaret eo ar poent ma lakay an arm da dennañ. Disheñvel e c’hall bezañ keit ar red hervez an armoù. Berr-tre eo da skouer war ar revolverioù kentañ un-ober a veze produet en XIX^vet kantved evel ar Colt Single Action Army. Kalz hiroc’h eo war ar pistolennoù modern implijet gant an arme pe ar polis evit abegoù surentez. Hervez kalite an armoù e c’hall skrabat muioc’h pe nebeutoc’h an draen, ma vez berus gwikefre an arm pe get.

Al loc'hañ (break e saozneg) eo ar mare rik ma vez laosket gwinterell ar skoer da vont gant an draen evit skeiñ ouzh emors ar gartouchenn, dre hanterouriezh ar bluenn.

Fin ar red eo ar red berr a ra an draen war an adreñv goude al loc'hañ abalamour da nerzh anniñv ar biz. Pa ne vez ket mestroniet mat fin ar red e c’hall degas kudennoù war resisted an tenn.

Evit echuiñ e tistro an draen e-unan d'e blas orin. Pa vez re brim a c’hell izelaat resisted an tenn ivez.

Pa vez implijet un arm e mod un-ober e servij an draen da dennañ nemetken. Pa vez implijet ur blatinenn daou-ober pe daou-ober-nemetken, an draen a arm ar wikefre hag a denn war un dro.

Pouez-loc'hañ

Pouez-loc'hañ un draen (a zo un nerzh e gwirionez) eo ar pouez a ranker lakaat warnañ da dizhout poent al loc'hañ, da lavaret eo tennañ ar boled da vat. Disheñvel eo pouezioù-loc’hañ an drein hervez an doareoù armoù-tan hag o implij.

War an armoù-dorn implijet e mod daou-ober pe dezhe ur blatinenn daou-ober-nemetken e servij an draen da zaou dra : ardarmiñ ar wikefre da gentañ ha tennañ goude. Muioc’h a bouez a ranko bezañ lakaet war an draen da dennañ neuze. War ar revolverioù un-ober pe ar pistolennoù damaotomatek un-ober (evel ar Colt M1911) evit an tenn kentañ, e vo izeloc’h ar pouez-loc'hañ dre ma ranker armiñ ar wikefre gant ar c’hi da gentañ.

Skouerioù pouezioù-loc'hañ (reolet en uzin)

• Karabinenn CZ 457 : etre 1,1 kg ha 1,4 kg
• Karabinenn Remington 700 : 1,36 kg
• Pistolenn SIG-Sauer P220 : 2 kg e SA, 5,5 kg e DA
• Pistolenn MAB F : 0,95 kg
• Revolver Smith & Wesson Model 67 : 2 kg e SA, 5,9 kg e DA
• ar c'harabinennoù implijet er biatlon a rank bezañ o fouez-loc'hañ a-us da 500 gramm.

War an armoù-dorn implijet gant ar polis e vez uhel alies ar pouez-loc’hañ evit izelaat ar riskloù gwallzarvoudoù pe tennoù hep c’hoant. War an armoù implijet er sportoù tennañ e c’hall bezañ izel-tre ar pouez-loc’hañ evit bihanaat levezon ar fiñvoù mekanik war resisted an tenn.

Ur morailh-pontig war ur fuzuilh-arsailh DesertTech MDR.

Surentez

Ur bouton pe ul loc’henn surentez a gaver war ar braz eus an armoù-tan modern da stankañ an draen, hag ur morailh-pontig a c’hell bezañ implijet evit herzel un den da bouezañ warnañ. Ne viront ket ouzh an arm da laoskel un tenn atav peogwir ne ampech ket ar skoer da vont en-dro, ha gellet a ra ur gartouchenn bezañ skoet ma kouezh an arm da skouer.

Pennad kar

• Geriaoueg an armoù-tan

Daveennoù

  Stag eo ar bajenn-mañ ouzh Porched an Armoù-tan