Maschinenpistole 40
| Maschinenpistole 40 | |
|---|---|
 Ur Maschinenpistole 40 | |
| Kinnig | |
| Bro | .svg){kind=small} Trede Reich
|
| Mont en-dro | Pistolenn-vindrailher aotomatek |
| Munision | 9 × 19 mm Parabellum |
| Produerien | ERMA Steyr Haenel |
| Mare implij | 1940–1945 (gant an Trede Reich), brezelioù all dibaoe |
| Pouez ha muzulioù | |
| Mas (hep kartouchenn) | 4,03 kg |
| Mas (karget) | 4,70 kg |
| Hirder | 630 mm (lamm pleget), 833 mm (lamm dibleget) |
| Hirder ar c'hanol | 250 mm |
| Perzhioù all | |
| Hed-tenn pleustrek | 100 m |
| Tizh mont e-maez ar boledoù | 380 m/s |
| Lusk-tennañ | 500 tenn/mn |
| Endalc'h | Karger-fiñv 32 gartouchenn |
| Lezenn | |
| Rummad e Bro-C'hall | A |
Ar Maschinenpistole 40, anvet alies MP40, zo ur bistolenn-vindrailher alaman kambret evit ar munision 9 × 19 mm Parabellum. Deveret eo eus an MP38 hag eus an MP 38-40. Ar memes doare kulasenn zigor hag hini an MP38 he deus met simploc'h e oa he froduiñ. Ouzhpenn 1,2 milion a MP38, MP 38-40 hag MP40 zo bet produet en Istor. Unan eus armoù hiniennel anavezetañ an Eil Brezel-bed eo.
Istor
[kemmañ | kemmañ ar vammenn]An MP38, MP 38-40 hag MP40 a voe ijinet gant Heinrich Vollmer en uzin armoù ERMA (Erfurter Maschinenfabrik Geipel) en Erfurt. Diazezet e oa war an MP36, ijinet gant Hugo Schmeisser. Lesanvet e voe dre fazi an MP 40 « Schmeisser » gant ar soudarded amerikan, pa ne oa ket eñ ijinour an arm.[1]
Produet e voe en uzinoù ERMA, gant C.G. Haenel e Suhl (Alamagn) ha gant an embregerezh Steyr e Steyr (Aostria) betek miz Here 1944. 746.000 skouerenn anezhi a voe savet.
Deskrivadur
[kemmañ | kemmañ ar vammenn]E dibenn ar bloavezhioù 1930 e voulc'has an Trede Reich produiñ e brasniver an MP38, he doa diskouezet bezañ talvoudus war dachennoù-emgann Brezel Spagn.
An MP38 a oa an arm kentañ er bed dezhañ ul lamm blegus e dir. Ur perzh mat e oa hervez ar Wehrmacht peogwir e oa akomotoc'h d'ar soudarded karget e-barzh kirri-houarnet evit ar Blitzkrieg da zont.
Dre uzinaj e veze produet an MP38, setu e ranked kaout labourerien stummet mat ha danvezioù kentañ a galite uhel evit he sevel. Gwellaet e voe ar jeu gant an MP 38-40, met en ur zegas teknikoù-produiñ nevez (koagañ, soudadur dre boentoù) evit an MP40 e c'hallas an Alamagn produiñ anezhe e brasniver.
An MP38-40 a zegase araokadennoù bras e-keñver ar pistolennoù-mindrailher all produet betek neuze. Ouzhpenn al lamm blegus e voe implijet bakelit, marc'hadmatoc'h hag aesoc'h da labourat evit ar c'hoad, evit ar grogenn ha plakennoù an dornell. Aluminiom ha dir koaget a voe implijet forzhik en MP38 hag en MP40 ivez.
Dasparzhet mat e oa pouez an arm etre an dornell ha toull ar c'harger, ha kempouez e oa an MP40. Ne oa ket uhel-tre he lusk-tennañ (500 tenn/mn). Abalamour da se e oa stabil a-walc'h pa veze tennet ganti a-dennadegoù.
Daou si nes a oa gant an MP40 memestra. En he c'harger e oa dasparzhet an 32 gartouchenn war div golonenn pa oa pourveziet an arm war ur golonenn nemetken e krec'h ar c'harger. Pa oa lous ar c'hartouchennoù e c'hoarveze dezhe pegañ an eil ouzh eben ha chom a rae bout an arm. Kudennoù surentez a oa ivez dre ma ne c'halled ket stankañ ar gulasenn war stummoù kentañ an arm : a-wechoù e c'hoarveze d'ur gartouchenn bezañ kambret hec'h-unan ha riskloù a oa e vefe tennet ur boled en ur mod dic'hortoz. Adalek 1941 e voe ouzhpennet ur sistem da stankañ ar gulasenn war an armoù nevez-broduet.
Implij
[kemmañ | kemmañ ar vammenn]Soñjet e oa bet reiñ pistolennoù-mindrailher MP 38 da vagadoù ar c'hirri-houarnet nemetken, met dre ma reas berzh e voe implijet tamm-ha-tamm gant rannoù all eus an arme alaman. Daoust d'ar pezh a weler er filmoù istorel a-wechoù, ne oa ket pourveziet an holl soudarded alaman gant MP40 : peurliesañ e veze unan gant an is-ofiser a oa e penn ur gevrenn hag e rae ar soudarded all kentoc'h gant karabinennoù Mauser 98k.
C'hwec'h karger a veze pourveziet gant pep arm. Ar soudarded alaman a oa war o lifre div c'hodellad tri c'harger, unan a bep tu d'o c'hof.
Goude an Eil Brezel-bed
[kemmañ | kemmañ ar vammenn]Ul lod eus an MP40 a voe kaset da Balestina goude ar brezel evit pourveziañ an arme israelian da zont. Harzlammerien ar vro a implijas an arm en ur mod ofisiel betek 1956.
An arme c'hall a implijas kalz MP40 ivez da vare brezel Indez-Sina. Priziet e oa gant an harzlammerien. Er bloavezhioù 1960 e voe tennet an arm eus stokoù an arme.
Skouerennoù eus an MP40 a voe implijet e 1999 da vare brezel Kosovo. Lod a zo bet gwelet memes en emgannoù brezel Siria e fin ar bloavezhioù 2010.[2]
Liammoù diavaez
[kemmañ | kemmañ ar vammenn]- (en) Die Maschinenpistole 40, ul lec'hienn gouestlet penn-da-benn da istor an MP40
Levrlennadur
[kemmañ | kemmañ ar vammenn]- (en) GUILLOU Luc, German Submachine Guns 1918-1945, Schiffer Publishing, 80 p. ISBN 9780764354861
- (fr) LES PM ALLEMANDS 1918/1945, Gazette des Armes HS n°19, miz Even 2012, 80 p.
Daveennoù
[kemmañ | kemmañ ar vammenn]- ↑ (fr) HENROTIN Gérard, Le pistolet mitrailleur allemand MP40 expliqué, HLebooks.com, 2016
- ↑ (en) MP40 sub-machine gun in Syria war TheFireArmBlog.com, 06/04/2017 (lennet d'ar 24/01/2024)
