Alan IV

Alan IV, lesanvet Alan Fergant, gant Édouard Odier (1800-1887)

Alan IV, hervez un daolenn gollet

Alan IV, lesanvet Alan Fergant, ganet war-dro 1060 ha marvet d'an 13 a viz Here 1119, a oa Dug Breizh eus 1084 da 1112.

Mab e oa da Hoel, kont Kernev ha Naoned, ha da Hawiz Breizh, c'hoar da Gonan II, dug Breizh.

Pa varvas Konan e 1066 e oa bet lakaet Hoel da zug war e lerc'h. Tri mab en doe Hoel, Alan Fergant, Mazheaz ha Benedig.

E Bro-Saoz

Hoel, evit dont a-benn eus Eozen Penteur ha re all en em savet en e enep, en doe ezhomm eus harp Gwilherm, dug Normandi. Pa dreuzas Gwilherm ar mor e 1066 evit mont da gemer Bro-Saoz, e oa Bretoned en e arme, 5000 a dud, a lavarer, en o fenn (hervez istorourien 'zo da vihanañ) Alan Fergant.

Alan Fergant e Roazhon

Alan Fergant, a c'hellje bezañ bet dug goude marv e vamm e 1071, en doa re a zoujañs ouzh e dad evit lemel an dugelezh digantañ. Ne zougas an anv a zug eta nemet goude marv Hoel, e 1084. Kentañ tra a reas voe reiñ kontelezh Naoned d'e vreur Mazheaz ha mont da Roazhon da gemer e gurunenn. E eontr Jafrez, a oa mestr e Roazhon, a lakaas serriñ dorioù kêr outañ. Ret e voe da Alan en em gannañ gant Jafrez, a voe trec'het ha kaset da Gemper, ma varvas nebeut amzer goude.

Brezel hag eured kentañ

Gwilherm, distro eus Bro-Saoz, a fellas dezhañ lakaat Alan Fergant da zont da Normandi evit touiñ lealded dezhañ. Alan a nac'has. Gwilherm a zeuas e Breizh gant un arme hag a glaskas kemer Dol. Alan koulskoude a zalc'he penn outañ, hag harpet gant roue Bro-C'hall, e tistrujas darn eus e arme. Gwilherm a reas ar peoc'h, hag a roas da Alan e verc'h Konstanza da bried. An eured a voe graet e Caen e 1085.

Ermengard

Konstanza a varvas daou vloaz goude. Alan a zimezas neuze da Ermengard Anjev, merc'h kont Anjev. Ermengarde a zo chomet brudet en istor Breizh abalamour d'he furnezh ha d'he deoliezh. A-drugarez dezhi, a lavarer, e voe graet lezennoù a reas kalz evit lakaat an urzh vat da ren.

Brezel ar Groaz

Ar Pab Urban II a reas e 1095 ur c'halvadenn da briñsed ha renerien ar C'huzh-Heol evit mont da adc'hounit an Douar Santel digant Islamiz. Alan Fergant hag uhelidi all a Vreizh a gemeras perzh e kentañ Brezel ar Groaz, hag a voe e-touez ar re gentañ da vont da Jeruzalem. Ne zistroas da Vreizh nemet goude pemp bloaz.

Herri, mab yaouankañ Gwilherm, en doa kemeret kurunenn vro-Saoz war-lerc'h marv e vreur Gwilherm II, hag a yeas neuze da gemer Normandi digant ur breur all, Roperzh. Herri a voe harpet gant dug Breizh, ha Roperzh,trec'het en emgann Tinohebray, e 1106, a voe prizoniet.

Bloavezhioù diwezhañ

Alan Fergant a gouezhas klañv e 1111. Reiñ a reas an dugelezh d'e vab Konan, ha mont da chom da Redon gant ar venec'h. Eno e varvas e 1119. E wreg Ermengard en em roas ivez da oberoù a relijion. Mont a reas da Abati Fontevraud, da Citeaux, da Palestina, ha distreiñ da vevañ e-kichen he mab. Mervel a reas e 1141.

Dimezioù ha bugale

E 1087 e timezas Alan ha Konstanza. Bugel ebet n'o doe .

E 1093 ec'h addimezas Alan da Ermangard. Tri bugel o doe :

• Konan, a vo Konan III, dug Breizh
• Hawiz Breizh, a vo pried Baldwin VII, kont Flandrez, a gasas anezhi kuit e 1110,
• Jafrez ar Rouz, a varvas e Jeruzalem e 1116.

• Ouzhpenn e vugale gant Ermengard en doa ur mab bastard e Bro-Saoz, Brien FitzCount. N'ouzer ket piv e oa ar vamm.

Lennegezh

Meneget eo e anv er Trioedd Ynys Prydein, ma'z eo anvet Alan Fyrgan.

En e raok: Hoel II

Dug Breizh 1084 – 1112

War e lerc'h: Konan III