Treiñ e brezhoneg

Eus Wikipedia
Sauter à la navigation Sauter à la recherche

Treiñ a vez graet e brezhoneg evel ma vez graet en holl yezhoù.
Hogen kalz nebeutoc'h e vez troet e brezhoneg eget er yezhoù amezek, bras pe vihan. N'eus nemet e kerneveureg, a douez ar yezhoù amezek, e vez troet nebeutoc'h eget e brezhoneg, peogwir ez eus nebeutoc'h a droerien ha nebeutoc'h a lennerien, daou dra a zo ezhomm evit ober troidigezhioù.

Lec'h an treiñ er yezh[kemmañ | kemmañ ar vammenn]

Sant Hieronimos, troour ar Vulgat, en e sal-studi. Murlivadur gant Domenico Ghirlandaio, 1480 (Ognissanti, Firenze). Paeron an droourien eo sant Hieronimos.

Un darn eus al labour graet e brezhoneg eo an treiñ, hag un darn nemetken. Treiñ e brezhoneg a vez graet gant an holl vrezhonegerien un tamm bennak dre gomz; dre skrid avat ne vez ket graet gant kalz tud, ha gant tud gopret d'en ober nebeutoc'h c'hoazh. Ha ma ne vez ket lennet kalz brezhoneg dre vras e vez lennet an troidigezhioù nebeutoc'h c'hoazh.
N'eo ket bet kont evel-se atav: un amzer zo bet ma ne veze embannet nemet troidigezhioù relijiel tost a-walc'h.

Petra a vez troet e brezhoneg ?[kemmañ | kemmañ ar vammenn]

A-raok an XXvet kantved[kemmañ | kemmañ ar vammenn]

  • Gwechall ne veze troet nemet levrioù relijion: an Testamant Nevez, buhezioù sent.
  • Un nebeud skridoù dispac'hel a voe troet e dibenn an XVIIIvet kantved, a-raok ma voe kroget d'ober brezel d'ar brezhoneg da vat adalek Grégoire.

XIXvet kantved[kemmañ | kemmañ ar vammenn]

Adalek an XXvet kantved[kemmañ | kemmañ ar vammenn]

  • Gant Gwalarn e voe troet skridoù eus lennegezhioù ar bed-holl, eus ar broioù keltiek da gentañ-penn: Mabinogion Kembre, mojennoù Iwerzhon...
  • Kalz danevelloù zo bet troet, diwar ar saozneg dreist-holl, e-barzh Al Liamm. Met dastumad ebet.
  • Diwezhatoc'h, pa voe savet An Here, ha keit ha ma oa en e sav, e veze troet kalzik a levrioù bugale.
  • E dibenn an XX-vet kantved e veze troet lennegezh dreist-holl, ha fablennoù La Fontaine adarre, evel en XIXvet kantved.
  • Barzhonegoù a veze troet stank un amzer zo bet ivez. Un nebeudig dastumadoù zo bet.

Met pa dostaer ouzh pezh a vez graet e yezhoù all, evel ar c'hembraeg pe ar galizeg, eo dister ken ez eo. Hag e katalaneg e vez troet muioc'h c'hoazh.

Estreget levrioù[kemmañ | kemmañ ar vammenn]

Ouzhpenn levrioù a vez troet bremañ.

  • Panelloù war an hentoù
  • Bruderezh a bep seurt: Arabat butuniñ
  • Danevelloù-labour kevredigezhioù zo (divyezhek eo melestradurezh Diwan)
  • Skridoù war kartennoù douaroniezh
  • Pennadoù kazetennoù e-barzh Al Lanv pe Bremañ a-wechoù
  • Abaoe un nebeud bloavezhioù e ve troet programoù pe etrefasoù (re wikipedia da skouer).

Treiñ ha reizhañ[kemmañ | kemmañ ar vammenn]

Kalz labour treiñ a vez graet gant kenlabourerien Wikipedia, ha difaziet e vez al labour-se ivez gant un toulladig tud. Gant se eo ur seurt skol treiñ (ha ne vez ket implijet a-walc'h) pa n'eus ket re all o vont en-dro e brezhoneg. N'eo ket troidigezhioù lennegel a vez graet avat, treuzskrivañ kentoc'h. Ul labour kalz spisoc'h eo an treiñ lennegel.

Petra ne vez ket troet e brezhoneg ?[kemmañ | kemmañ ar vammenn]

Dre vras ne vez ket troet a-walc'h, ha diouer a levrioù zo. Ne vez ket troet romantoù, nag al lennegezh klasel saoz pe rus, nag ar romantoù-polis, nag ar skiant-faltazi. War a seblant e vank troerien evit ober al labour.

Ne vez ket troet kalz kanaouennoù. Koulskoude ne vije ket didalvoud lakaat e brezhoneg yac'h kanaouennoù brudetañ ar bed evit an nebeud kanerien vrezhonek a zo.
E 2013 e vank kenstrivadegoù kanaouennoù (n'eus hini ebet) evel ma vank kenstrivadegoù lennegel a zoare.

Krog e vezer da dreiñ un toullad filmoù gant Dizale, ha skignet e vez lod dre ar Genrouedad.

Perak e vez troet ken nebeut?[kemmañ | kemmañ ar vammenn]

Gwall nebeud e vez troet e brezhoneg abalamour ma n'eo ket niverus ar vrezhonegerien hag e renont o buhez e galleg dreist-holl. Ouzhpenn-se n'eus ket kalz a droerien, ha n'eus tamm politikerezh treiñ dre vras e Breizh, na gant an embannerien-levrioù zoken. Evel ma teu e teu, eo ar reolenn

Treiñ ha lenn[kemmañ | kemmañ ar vammenn]

Stag eo treiñ ha lenn. Nebeut a lennerien vrezhoneg a zo, n'a ket o niver war gresk. Gant se eo diaes krediñ ez ay an niver a levrioù troet hag a droerien war gresk ivez.

Koulskoude, ma vez kelennet brezhoneg er skolioù d'ar vugale arc'hoazh e vo ezhomm levrioù da reiñ dezho, nemet ne rafe ket ar skolaerien gant levrioù (ha ne reont ket holl, pa vez roet fotokopioù e-lec'h levrioù d'ar vugale) ha troerien yaouank d'ober al labour.

Ma ne vez ket kelennet brezhoneg evel-just ne vo ket eus ar gudenn.

Piv a dro e brezhoneg ?[kemmañ | kemmañ ar vammenn]

Alies e vez kelennerien yezhoù o treiñ diwar ar yezh a gelennont, pe ar yezhoù all o deus desket, evel Mikael Madeg diwar ar saozneg pe gouezeleg Skos, evel Alan Botrel diwar ar gresianeg.

Implijidi Ofis ar Brezhoneg o devez da dreiñ diwar ar galleg, hervez a c'haller lenn amañ hag ahont.

Kenlabourat a ra Corinne ar Mero gant Dizale evit azasaat e brezhoneg komzoù tresadennoù-bev ha filmoù.

Diwar pe yezhoù all e vez troet ?[kemmañ | kemmañ ar vammenn]

Diwar ar galleg e vez troet dreist-holl, ha levrioù bugale kentoc'h.

Diwar ar saozneg e veze troet un tamm lennegezh poent zo bet gant kelennerien saozneg pe saoznegerien evel Frañsez Favereau.

Diwar an alamaneg e vez troet nebeud: n'eo ket stank an alamanegerien ken e-touez ar vrezhonegerien, war a hañval. Muioc'h a spagnolegerien zo, met nebeud a dra zo bet troet eus ar yezh-se evit poent c'hoazh.

Skoazell d'an treiñ[kemmañ | kemmañ ar vammenn]

En holl vroioù o deus un tamm politikerezh sevenadurel e vez skoazellet an treiñ lennegel hag an treiñ filmoù. Kevredigezhioù troerien zo ivez, e Breizh avat n'eus ket.

Adalek 2004 e oa bet diskleriet gant ar C'huzul-rannvro e oa o vont da skoazellañ sevel troidigezhioù e brezhoneg, pe gentoc'h o skoazellañ an embannerien da baeañ troidigezhioù zo. Ret eo bet gortoz 2012 evit gwelout anezhañ o skoazellañ an hini kentañ, gant embannadur Harry Potter. Re all zo bet skoazellet e 2013ha 2014 : gant O fis ar Brezhoneg ez eus savet ul listennad oberennoù da dreiñ, met ne weler warni nemet oberennoù lennegel, klasel kentoc'h, ha n'eus lec'h ebet d'al levrioù bugale pe d'al levrioù istor, skiant, hag all. Ha n'eo ket sur e vo entanet an embannerien gant ar program a blij d'ar bolitikerien.

Pennadoù kar[kemmañ | kemmañ ar vammenn]

Liammoù diavaez[kemmañ | kemmañ ar vammenn]