Steyr Arms

Steyr Arms, anavezet ivez dindan e anv bet Steyr-Mannlicher, zo un embregerezh armoù-tan hiniennel aostrian krouet e 1864 gant Josef Werndl. Stag eo e istor ouzh anv Ferdinand von Mannlicher, un ijiner en deus merket industriezh an armoù e dibenn an XIXvet kantved.

Istor

Orin

Brudet eo kêr Steyr, e norzh Aostria, evit he mengleuzioù houarn, anavezet abaoe ar Grennamzer uhel da nebeutañ. A-drugarez dezhe e teuas ar vro da vezañ ul lec'h-produiñ armoù adalek ar Brezel Tregont Vloaz (1618-1648). Eno e veze produet mouskedoù ha pistolennoù evit armeoù an Impalaeriezh Santel roman german^[1]. E 1821 e krogas ur gov anvet Leopold Werndl da labourat eno. Joseph Werndl, e eil bugel ganet e 1831, a voe kaset da zeskiñ ar vicher armeurer e Vienna, Praha ha Bavaria, ha goude-se e atalieroù Colt ha Remington er Stadoù-Unanet^[2]. Pa varvas e dad e 1855 e tistroas Joseph da Aostria. Asambles gant e vreur e savas e 1864 ar Josef und Franz Werndl & Company e Oberletten, e-kichen Steyr^[3].

Labour evit arme Aostria-Hungaria

E 1867 e voe choazet gant arme Aostria-Hungaria ar Werndl-Holub, ur fuzuilh un-tenn karget dre he c'hulasenn ijinet en embregerezh. Evit dont a-benn da bourvezañ ar miliadoù a armoù goulennet e tegemeras an embregerezh arc'hant a-berzh posterien, hag adanvet e voe Œsterreichische Waffenfabriksgesellschaft (ŒWG)^[3]. E 1872 e implije 45.000 labourer evit produiñ 622.000 fuzuilh bep bloaz^[2]. E 1885 e choazas arme ar vro ar fuzuilh nevez M1885 savet gant an ijinour Ferdinand Mannlicher, a laboure asambles gant ŒWG. Un arm-tennata e oa, dezhañ ur sistem morailh linennek. Mannlicher a zeuas da labourat en embregerezh da vat e 1887^[2], hag adanvet e voe anezhañ Steyr-Mannlicher pa zeuas Mannlicher da vezañ e benn-ijinour.

E 1894 e krogas Steyr-Mannlicher da broduiñ marc'hoù-houarn ivez, ouzhpenn ar 500.000 arm savet bep bloaz^[3]. Mervel a reas Ferdinand Mannlicher e 1904. Just a-raok ar Brezel-bed Kentañ e savas an embregerezh uzinoù nevez evit fonnusaat e broduerezh. Ouzhpenn an armoù-skoaz e farde ivez pistolennoù damaotomatek evel ar Steyr M1912. Asambles gant ar fuzuilh Mannlicher M1895 e voe unan eus armoù reolius soudarded Aostria-Hungaria e 1914-1918.

Eus an eil brezel d'egile (1919-1945)

Goude feur-emglev Saint-Germain-en-Laye (1919) e voe dismantret an impalaeriezh hag izelaet a galz an niver a armoù a c'halle bezañ produet eno. Darbet e voe da Steyr-Mannlicher ober freuz-stal, met savetaet e voe a-drugarez d'ar produerezh marc'hoù-houarn^[1]. Adanvet e voe Steyr Werke AG e 1926. Adkregiñ a reas ar produiñ armoù a-nebeudoù e 1930. E 1938 e voe seziset an embregerezh gant an nazied da vare an Anschluss. Diwar-neuze e savas armoù evit ar Wehrmacht hag an nerzhioù alaman, evel ar pistolennoù-mindrailher MP34 hag MP40, ha diwezhatoc'h fuzuilhoù-arsailh Sturmgewehr 44. Goude aloubadeg Polonia e 1939 e kemeras Steyr ar galloud war uzinoù Radom, e-lec'h ma voe savet karabinennoù Karabiner 98k^[4]. Bombezet e voe ar gêr hag an uzinoù e 1944 gant ar 15th Air Force stadunanat, abalamour d'ar c'hefluskerioù kirri-nij a veze produet eno ivez dreist-holl, met kenderc'hel a reas ar produiñ betek fin ar brezel. Kejañ a reas an US Army hag an Arme Ruz e kêr Steyr e 1945, hag aloubet e voe kêr gant an US Army betek 1955^[2]. Paouez a reas ar produiñ armoù betek 1950^[4].

Adsavidigezh adalek 1950

E 1950 e roas an Amerikaned an aotre da broduiñ en-dro fuzuilhoù Mannlicher-Schönauer 1903, a oa priziet gant ar chaseourien, ha kanet meuleudi dezhi gant tud evel Robert Ruark pe Ernest Hemingway^[2], en doa kaset unan gantañ evit e safari kentañ e 1933^[5]. Er bloavezhioù 1960 e voe ijinet gant Steyr ar fuzuilhoù-resisted SSG 69, hag a voe implijet gant an arme aostrian. E 1977 e kinnigas ar Steyr AUG ur fuzuilh-arsailh doare bullpup a reas berzh hag a voe implijet gant meur a arme er bed^[2]. Hiziv-an-deiz en deus an embregerezh lec'hioù-produiñ e Aostralia ha Malaysia^[1].

Armoù produet

Hiziv-an-deiz e produ Steyr armoù-skoaz nemetken, war-bouez ar bistolenn damaotomatek A2MF ha redueroù-son^[6].

Fuzuilhoù-arsailh

Steyr AUG – fuzuilh-arsailh
Steyr ACR – fuzuilh biroùigoù-dir arnodel
Steyr STM556 – fuzuilh-arsailh

Fuzuilhoù-emgann

Sturmgewehr 58 (adstumm an FN FAL)

Fuzuilhoù ha karabinennoù

Mannlicher M1885 – fuzuilh-vorailh
Mannlicher M1888 – fuzuilh-vorailh
Mannlicher M1890 – fuzuilh-vorailh
Mannlicher M1895 – fuzuilh-vorailh
Mannlicher–Schönauer – fuzuilh-vorailh
Steyr Model 1912 Mauser – fuzuilh-vorailh
Steyr SSG 69 – fuzuilh-resisted
Steyr Scout – scout rifle
Steyr SSG 04 – fuzuilh-resisted
Steyr SSG 08 – fuzuilh-resisted
Steyr HS .50 – fuzuilh enepdafar
Steyr IWS 2000 – fuzuilh enepdafar 15,2 mm
DMR 762 - fuzuilh-resisted damaotomatek

Mindrailherezioù

Steyr MPi 69 (hag hec'h adstumm Steyr MPi 81)
Steyr TMP

Pistolennoù

Steyr Mannlicher M1894 (1894–?)
Steyr Mannlicher M1901 (1901–1903)
M.7 (1908–1913)
Steyr M1912 (1912–1945)
Steyr SP (1957-1964)
Steyr GB (1981–1988)
Steyr M (1999–bremañ)

Bannerezed-greunadennoù

GL 40 – 40 mm

Armoù produet evit an Trede Reich (1938-1945)

Kodoù produiñ

Ar pistolennoù Steyr zo e-kichen o zoull-distrinkañ ur c'hod teirlizherennek : al lizherenn gentañ a zo evit ar miz produiñ, hag an div lizherenn all evit ar bloavezh-produiñ. Un arm merket BOY a zo bet produet da skouer e miz Ebrel 2007.

Mizioù


Lizherenn	Miz	Lizherenn	Miz
E	Genver	G	Gouere
L	C'hwevrer	P	Eost
N	Meurzh	I	Gwengolo
B	Ebrel	C	Here
S	Mae	V	Du
Z	Even	A	Kerzu

Bloavezhioù


Lizherenn	Sifr	Lizherenn	Sifr
O	0	M	5
W	1	H	6
K	2	Y	7
R	3	T	8
F	4	D	9

Daveennoù

↑ ^1,0 ^1,1 ha^1,2 (fr) ROB Houston, STROYAN Christine (renerezh), Armes à feu de légende, Larousse, 2019, pp. 290-291
↑ ^2,0 ^2,1 ^2,2 ^2,3 ^2,4 ha^2,5 (en) About Steyr war lec'hienn Steyr Arms USA (lennet d'an 23/10/2024)
↑ ^3,0 ^3,1 ha^3,2 (de) Geschichte war lec'hienn Steyr Arms (lennet d'an 23/10/2024)
↑ ^4,0 ha^4,1 (en) NEWLAND Samuel J., A Forgotten Giant: A Brief Look at Military Small Arms Production at Steyr, Austria, 1864–1945, e Bulletin n°94, American Society of Arms Collectors, miz Gwengolo 2006 (pellgarget d'an 23/10/2024)
↑ (en) KNUPP Jeremiah, The 1903 Mannlicher-Schoenauer Carbine, American Rifleman, 25/04/2016 (lennet d'an 23/10/2024)
↑ (en) Products war lec'hienn an embregerezh (lennet d'an 23/10/2024)

Stag eo ar bajenn-mañ ouzh Porched an Armoù-tan

[:2-1] 1,0 ^1,1 ha^1,2 (fr) ROB Houston, STROYAN Christine (renerezh), Armes à feu de légende, Larousse, 2019, pp. 290-291

[:0-2] 2,0 ^2,1 ^2,2 ^2,3 ^2,4 ha^2,5 (en) About Steyr war lec'hienn Steyr Arms USA (lennet d'an 23/10/2024)

[:1-3] 3,0 ^3,1 ha^3,2 (de) Geschichte war lec'hienn Steyr Arms (lennet d'an 23/10/2024)

[:3-4] 4,0 ha^4,1 (en) NEWLAND Samuel J., A Forgotten Giant: A Brief Look at Military Small Arms Production at Steyr, Austria, 1864–1945, e Bulletin n°94, American Society of Arms Collectors, miz Gwengolo 2006 (pellgarget d'an 23/10/2024)

[5] (en) KNUPP Jeremiah, The 1903 Mannlicher-Schoenauer Carbine, American Rifleman, 25/04/2016 (lennet d'an 23/10/2024)

[6] (en) Products war lec'hienn an embregerezh (lennet d'an 23/10/2024)

[1]

[2]

[3]

[4]

[5]

[6]