Loeiz Dujardin

Eus Wikipedia
(Adkaset eus Louis Dujardin)
Sauter à la navigation Sauter à la recherche

Loeiz Dujardin (Louis Marie Dujardin e marilhoù an ti-kêr) (Lokournan, 17 a viz Mae 1885 – Lokournan, 21 a viz Ebrel 1969) a oa mezeg eus e vicher hag aozer skridoù war al lennegezh vrezhonek war e amzer vak.

Buhez[kemmañ | kemmañ ar vammenn]

Genidik e oa eus Lokournan e Bro-Leon. Desavet e voe gant ur voereb kozh, rak mervel a reas e vamm pa c’hanas he bugel. Goude ar skol e Lokournan hag e Lesneven ez eas da studiañ ar vezegiezh, da Roazhon da gentañ ha da v-Montpellier da c’houde. Eno e voe prezidant Breuriezh ar Studierien Vreton. Tapout a reas, da 27 vloaz, e zoktorelezh war ar vezegiezh gant un dezenn anvet « Basse-Bretagne et Bas-Bretons : étude d’hygiène » ("Breizh-Izel ha Breizhizeliz : studiadenn war ar yec’hedouriezh")[1]. Distreiñ a reas da Lokournan hag eno e tremenas e vuhez evel mezeg familh.

E-pad ar Brezel-bed Kentañ ez eas d’an arme ha medisin e voe war an talbenn adalek an 20 a viz Here 1914. Chom a reas d’ober war-dro ar soudarded c’hloazet betek an 12 a viz Meurzh 1919, war-bouez ur pennad e 1917 ma voe adkaset en a-dreñv dre ma oa klañv. Anvet e voe da varc’heg en urzh al Lejion a enor, evit ar perzh a gemeras er brezel-bed kentañ. E 1939 e voe galvet d’an arme adarre, met chom a reas e Breizh, evel rener ospital-soudarded Landreger da gentañ hag e Trebeurden da c’houde.

Ar gouizieg[kemmañ | kemmañ ar vammenn]

E-kichen e vicher mezeg e pledas a-zevri, a-hed e vuhez, gant studiadennoù war istor Breizh, ar brezhoneg hag e lennegezh. Degemeret e voe e Gorsedd Breizh e 1911, gant an anv barzh Loeiz Locronan.[2] D'ar mare-se ivez e oa ezel eus Kevredigezh Vroadel Breizh (U.R.B.), met kuitaat a reas ar strollad-se e miz Gwengolo 1911, e-pad kendalc'h Lokournan..[3] Prezidant ar Bleun-Brug e voe eus 1920 da 1927. Etre 1922 ha 1925 e reas war-dro Emgleo Sant Iltud, ur gevredigezh katolik savet evit embann ha skignañ levrioù brezhonek. Sevel a reas pennadoù en ur bern kelaouennoù, brezhonek ha gallek : Feiz ha Breiz (pennadoù war ar yec’hed, dreist-holl, etre 1912 ha 1928), Gwalarn, Sav, Arvor (pennadoù sinet Loeiz Lok diwar-benn ar skrivagnerien vrezhonek), Kaierou Kristen, Kroaz Breiz, Mouez Sant Ronan (kannadig Lokournan), Les Cahiers de l'Iroise.

Oberennoù[kemmañ | kemmañ ar vammenn]

  • Sant Ronan (e brezhoneg), Brest, Imprimerie de la Presse libérale, 1935
  • Saint Ronan. Notes sur sa vie et sur son culte (e galleg), Brest, Imprimerie de la Presse libérale, 1935 ; eil embannadur adwelet ha kresket e 1935 ivez.
  • Lanber, eur barrezig a Vro-Leon, Moullerezh Kreiz, Roazhon, 1942
  • Gwerz Lazadeg Skolidigou Itron Varia Montroulez, ti-moullañ ar C’hastell, Brest, 1943
  • La Vie et les Œuvres de Jean-François-Marie-Maurice-Agathe Le Gonidec : Grammairien et Lexicographe breton, 1775-1838, rakskrid gant Pêr ar Rouz, Brest, Imprimerie Commerciale & Administrative, 1949.
  • Matériaux pour servir à l’histoire de la langue bretonne : les œuvres en langue bretonne du R.P. Julien Maunoir, 1606-1683, embannet gant an oberour, 1958.
  • Toponymie de la côte bretonne entre le Conquet et Argenton, enquête de Louis Dujardin, Paris, Imprimerie nationale, 1953.
  • Toponymie nautique de l'île de Batz et de ses abords, enquêtes de Louis Dujardin-Troadec et Alain Le Berre, Paris, Imprimerie nationale, 1965
  • Calendriers iconographiques anglais de 1525 et 1396, inspirateurs probables des cartographes bretons du Conquet (XVIe siècle), Louis Dujardin-Troadec, Paris, 1965
  • Les Cartographes Bretons du Conquet, la navigation en images, 1534-1650, rakskrid gant Henri Dyèvre, pennad-digeriñ gant Michel Mollat, Brest, Imprimerie Commerciale & Administrative, 1966
  • Hor Skrivagnerien (dastumad eus pennadoù Dujardin embannet er gelaouenn Arvor), levrenn 1 (1992) ha levrenn 2 (1995), Mouladurioù Hor Yezh

Lennadurezh[kemmañ | kemmañ ar vammenn]

  • ArMen, n°198, janvier-février 2014, Louis Marie Dujardin, médecin photographe, gant Audrey Civran
  • Dalc'homp Soñj, niv. 17, 1986, Un érudit breton Louis-Marie Dujardin (1885-1969), gant Yann Bouëssel du Bourg

Liammoù divaez[kemmañ | kemmañ ar vammenn]

Notennoù[kemmañ | kemmañ ar vammenn]

  1. World Cat
  2. Philippe Le Stum, Le néo-druidisme en Bretagne, Éditions Ouest-France, 1998, p. 122
  3. Le néo-druidisme en Bretagne, pp. 127-129