Llanddewi Nant Hodni

Eus Wikipedia
Mont da : merdeiñ, klask
Ur pennad Llanddewi zo ivez.
Llanddewi Nant Hodni gwelet eus ar c'hornôg.
Prioldi Llanddewi Nant Hodni

Llanddewi Nant Hodni pe Llanddewi Nant Honddu (a-wechoù Llanhonddu pe Llanhodni; Llanthony e saozneg) zo ur gêriadenn vihan eus Sir Fynwy, e gevred Kembre. Emañ en hanternoz da Y Fenni, e gwalarn ar gontelezh, war an hent a gas da g-Capel-y-ffin hag Y Gelli Gandryll e kontelezh Powys. War lez ar stêr Honddu emañ.

Emañ ar gêriadenn en draoñienn digenvez anvet Dyffryn Ewias, war harzoù reter ar Mynydd Du ha Park Broadel Bannau Brycheiniog.

E-kichen ar gêriadenn emañ dismantroù Prioldi Llanddewi Nant Hodni, savet gant an aotrou William de Lacy, aotrou broig Ewias, e deroù an XIIvet kantved. A-raok ar mare-se dija e oa ur peniti keltiek eno. Tremen a reas Giraldus Cambrensis, arc'hdiagon Brycheiniog, dre ar prioldi e 1188 ha kontañ a ra e voe savet ar peniti gant daou benitiour kembreat. Llan Nant Hodni, hag a yeas diwezhatoc'h da Llantoni, e oa anv ar prioldi nevez, ha se eo orin stumm saoznek anv ar gêriadenn hiziv (Llanthony).