Allobroged

Eus Wikipedia
Mont da : merdeiñ, klask
Galia er c’hentañ kantved kent JK

An Allobroged pe Allobroges (hervez al latin) a oa ur bobl c’halian diazezet etre ar stêr Ron ha Lenn Geneva er c’hentañ kantved kent JK, el lec’h m’emañ bremañ Savoia ha Daofinez. Vienne e oa o c’hêr-benn.

Diwar bluenn Caesar, en De Bello Gallico, e lenner e oant o chom e hanternoz Gallia Transalpina pe Narbonensis. Pelloc’h en hanternoz da Lenn Geneva edo an Helveted. Aloubet e voe o bro gant ar Romaned e -121, met ne oa ket deuet-mat ar vistri nevez hag o zailhoù gant an Allobroged ha meur a wech en em savjont a-enep o alouberien (-77, -61, -43).

Strolladoù Allobroged a gemeras perzh en armeoù Caesar koulskoude e-pad Brezel Galia. Da vare an impalaer Aogust e voe rannet Gallia Narbonensis e div lodenn ha krouet e voe proviñs Gallia Viennensis. Dont a reas Vienne da vezañ ur greizenn roman a bouez er broviñs-se.

E dibenn an Impalaeriezh roman, er IVe kantved, e teuas bro an Allobroged da vezañ anvet Sapaudia, ur ger hag a zo aet da Savoia diwezhatoc'h. Er Vvet kantved e voe taget hag aloubet proviñs Vienne ha Sapaudia gant pobloù german evel ar Vurgonded.

Talvezout a rafe an anv Allobroges kement ha « tud eus ur vro all », « tud arallvro », diwar an div elfenn c'halianek allo-, « all », ha *brogi- « bro »[1].

Les Allobroges pe Le Chant des Allobroges eo anv kan broadel Savoia.

Notennoù[kemmañ]

  1. Pierre-Yves Lambert, La langue gauloise, Errance, p. 36 ha p. 190

Liammoù diavaez[kemmañ]