Jeff Cooper

John Dean Cooper, anvet boaz Jeff Cooper, ganet d'an 10 a viz Mae 1920 e Los Angeles (Kalifornia) ha marvet d'ar 25 a viz Gwengolo 2006 e Paulden (Arizona)^[1], a oa ul letanant-koronal eus an US Marines, bet kelenner war an Istor goude e amzer-soudard. Brudet eo e bed an armoù-tan evit an teknikoù hag ar meizadoù en deus degaset d'an tennañ.

Buhez

Kas a reas Jeff Cooper e yaouankiz e Los Angeles, e-lec'h ma voe ganet. Kregiñ a reas da dennañ gant armoù d'an oad a 11 vloaz. Kas a reas e studioù e skol-veur Stanford e-lec'h ma tapas un diplom war ar skiantoù politikel^[1]. Rollañ a reas en US Marine Corps e miz Gwengolo 1941. E-pad an Eil Brezel-bed e oa perzh eus ar Marine Detachment war an USS Pennsylvania. Kuitaat a reas ar servij oberiant e 1951, gantañ ar grad a vajor^[1]. Da vare brezel Korea (1950-1953) e rollas en-dro, ha kemer a reas perzh en emgannoù. Eno e voe anvet da letanant-koronal^[2]. Goude ar brezel e kelennas an Istor e lise Big Bear City (Kalifornia) hag er skol-veur.

Gunsite Ranch

E 1976 e savas Cooper an American Pistol Institute^[2], ur greizenn evit deskiñ teknikoù an tennañ gant armoù-dorn d'ar brasañ-niver, e Paulden (Arizona)^[1]. Kreskiñ a reas ar greizenn er bloavezhioù war-lerc'h, ha kelennet e voe eno an tennañ gant armoù-tan a bep seurt evel ar c'harabinennoù, ar fuzuilhoù-chase pe ar mindrailherezioù memes. Cheñchet e voe anv ar greizenn da Gunsite Ranch. E 1992 e werzhas Cooper ar greizenn, met kenderc'hel a reas da vevañ eno. Digreskiñ a reas kalite kentelioù ar greizenn, hag adwerzhet e voe d'un den all e 1999. Cooper a asantas distreiñ da gelenn di betek 2003, pa rankas paouez abalamour d'e yec'hed^[3]. Digor eo ar greizenn hiziv-an-deiz c'hoazh dindan an anv Gunsite Academy^[4]. Etre 1976 ha marv Cooper e 2006 ec'h istimer e oa bet 40.000 den o teskiñ dornata an armoù-tan eno^[1].

Tenn pleustrek

Pennad pennañ : Tenn pleustrek

Kemer a reas perzh Jeff Cooper e ganedigezh an tenn pleustrek, a oa e bal kentañ lakaat ar muiañ a dud da bleustriñ war an doare da implijout un arm-tan evit en em zifenn. Distag eo an tenn pleustrek diouzh an emzifenn hiziv-an-deiz, ha deuet eo da vezañ ur sport tennañ penn-da-benn. Prezidant kentañ ar gevredad tenn pleustrek etrebroadel IPSC e voe Cooper e 1976^[1].

Oberioù all

Skrivañ a reas Cooper ingal er gelaouenn Guns & Ammo. Bet e voe ezel eus komite renerezh an NRA stadunanat^[3].

Meizadoù

Lies eo ar meizadoù ijinet pe diorroet gant Cooper. Embannet int bet en e levrioù, en e gentelioù e Gunsite Ranch, e videoioù, e-barzh pennadoù war kelaouennoù evel Guns & Ammo, pe er Commentaries skrivet evitañ e-unan hag embannet dibaoe.

Ar peder reolenn surentez

Jeff Cooper a embannas evit e greizenn peder reolenn surentez diazez war dornata an armoù-tan. Kelennet e vezont hiziv-an-deiz e standoù tennañ er bed a-bezh. Ar reolennoù-mañ a zo ^[5]:

gwelet e arm evel karget bepred
chom hep bukañ un dra n'ho peus ket c'hoant da dizhout gant an arm
chom hep lakaat e viz war an draen, nemet da vare an tennañ
diwall ouzh e endro

Modern Technique

Ur **Colt M1911 A1**, unan eus armoù prizietañ Jeff Cooper

Ar Modern Technique (teknik modern) zo e gwirionez un hollad teknikoù stag ouzh implij un arm-dorn evit en em zifenn. Implijet e vez hiziv-an-deiz gant kalz polisoù er bed a-bezh^[1]. E-barzh e kaver hervez Cooper^[2] :

an arm da implijout : ur bistolenn damaotomatek kambret en ur c'halibr bras. An hini brizietañ gant Cooper e oa ar Colt M1911 kambret e .45 ACP
ar Weaver stance, pe derc'hel e gorf hag an arm gant an div vrec'h evel termenet gant Jack Weaver
ar Flash Sight Picture (skeudenn brim ar c'houch) evit linennañ ar buanañ ar gwellañ e gouch gant e lagad hag ar sibl
ar Compressed Surprise Break, un teknik evit pouezañ war an draen hep koll resisted

Scout rifle

Pennad pennañ : Scout Rifle

Termenet eo bet gant Cooper ar pezh a rankje bezañ perzhioù ur garabinenn liezimplij, gouest da servij evit ar chase koulz hag evit an dreistbevañ en natur ^[6]:

ur gulasenn-vorailh
ur pouez izel
un arm kambret evit ur c'halibr galloudus, boutin hag aes da gavout evel an .308 Winchester
ul lunedenn aes da zivontañ
ur c'houch
ur c'hanol berr

Er bloavezhioù 1990 e labouras Cooper gant an embregerezh aostrian Steyr evit sevel un arm a seurt-se^[7]. Estreget gant Steyr e vez produet karabinennoù doare Scout Rifle bremañ. Embregerezhioù evel Savage pe Ruger a ra ivez^[6].

Hoplofobiezh

Pennad pennañ : Hoplologiezh

Cooper a savas ar ger hoplophoby (hoplofobiezh) e 1962 evit envel an aon o dez tud 'zo rak an armoù-tan^[3]. Deveret eo eus ar ger hoplologiezh, da lavaret eo ar skiant a zo he fal studiañ istor, teknik hag implij an armoù.

Oberennoù

Levrioù diwar-benn an armoù-tan

Gargantuan Gunsite Gossip 3
Fighting Handguns (1958)
Principles of Personnal Defense (1972)
Jeff Cooper on Handguns (1974)
The Art of the Rifle (1997)

Levrioù war e vuhez, skridoù-arnod hag istorioù berr

Fire Works (1980)
Another Country: Personal Adventures of the Twentieth Century (1992)
To Ride, Shoot Straight and Speak the Truth (1988)
C Stories (2004)

Ur biografiezh eus Jeff Cooper anvet Jeff Cooper: the Soul and the Spirit a voe embannet gant e verc'h Lindy Wisdom e 1996.

Liammoù diavaez

(en) Commentaries Jeff Cooper da bellgargañ enlinenn (gwelet d'an 29/09/2024)
(en) Lec'hienn ar Jeff Cooper Legacy Foundation (gwelet d'an 29/09/2024)

Daveennoù

↑ ^1,0 ^1,1 ^1,2 ^1,3 ^1,4 ^1,5 ha^1,6 (en) McLELLAN Dennis, Jeff Cooper, 86; Firearms Expert Set Standard for Pistol Technique, Los Angeles Times, 01/10/2006 (lennet d'an 29/09/2024)
↑ ^2,0 ^2,1 ha^2,2 (en) SEILTGEN Friedrich, Get to Know Jeff Cooper, Gunpowder Magazine, 29/10/2021 (lennet d'an 29/09/2024)
↑ ^3,0 ^3,1 ha^3,2 (en) Cooper, firearms expert, dead at 86, The Daily Courier, 26/09/2006 (lennet d'an 29/09/2024)
↑ (en) Lec'hienn ar Gunsite Academy (lennet d'an 29/09/2024)
↑ (en) Diwar Col. Jeff Cooper: The 4 rules of gun safety, kentel gant Jeff Cooper filmet, embannet d'ar 04/03/2018
↑ ^6,0 ha^6,1 (en) WILSON Jim, The Scout Rifle Concept, Shooting Illustrated, 04/12/2012 (lennet d'an 29/09/2024)
↑ (en) Jeff Cooper Scout Rifle Package, American Hunter, 24/06/2010 (lennet d'an 29/09/2024)

Stag eo ar bajenn-mañ ouzh Porched an Armoù-tan

[:0-1] 1,0 ^1,1 ^1,2 ^1,3 ^1,4 ^1,5 ha^1,6 (en) McLELLAN Dennis, Jeff Cooper, 86; Firearms Expert Set Standard for Pistol Technique, Los Angeles Times, 01/10/2006 (lennet d'an 29/09/2024)

[:1-2] 2,0 ^2,1 ha^2,2 (en) SEILTGEN Friedrich, Get to Know Jeff Cooper, Gunpowder Magazine, 29/10/2021 (lennet d'an 29/09/2024)

[:2-3] 3,0 ^3,1 ha^3,2 (en) Cooper, firearms expert, dead at 86, The Daily Courier, 26/09/2006 (lennet d'an 29/09/2024)

[4] (en) Lec'hienn ar Gunsite Academy (lennet d'an 29/09/2024)

[5] (en) Diwar Col. Jeff Cooper: The 4 rules of gun safety, kentel gant Jeff Cooper filmet, embannet d'ar 04/03/2018

[:3-6] 6,0 ha^6,1 (en) WILSON Jim, The Scout Rifle Concept, Shooting Illustrated, 04/12/2012 (lennet d'an 29/09/2024)

[7] (en) Jeff Cooper Scout Rifle Package, American Hunter, 24/06/2010 (lennet d'an 29/09/2024)

[1]

[2]

[3]

[4]

[5]

[6]

[7]