Skol an Emsav

Logo Skol an Emsav.

Skol an Emsav zo ur gevredigezh ha skol vrezhonek, hiziv ur greizenn-stummañ, staliet e kreiz-kêr Roazhon. A-raok ar bloavezhioù 1980 e oa un aozadur broadelour evit ar stourm sevenadurel.

Palioù

Goude merkañ adarre n'eo stag SKOL AN EMSAV ouzh aozadur politikel ebet, eviti da gaout ur ster politikel anat, e kounomp ur wech c'hoazh en diwezh hec'h amkanioù :

1) kreñvaat an emskiant vroadel vrezhon ;

2) krouiñ ur gevredigezh vrezhon nevez ;

3) pourchas d'an Emsav hiziv ha d'ar Stad vrezhon warc'hoazh ar frammoù brezhon o devo ezhomm ;

4) bezañ, evit he ferzh ha dre hec'h emrended hec'h eeun, unan eus aotrouniezhoù speredel ar vroad.

– Imbourc'h niv. 13, 1971, p. 28

Kreizenn-stummañ

Ur greizenn-stummañ a vicher war ar brezhoneg eo, da lavaret eo ur skol da zeskiñ brezhoneg gant kelennerien gopret. Kentelioù-noz, stajoù berr ha stajoù hir a vez kinniget e Bro-Roazhon dreist-holl hag e Sant-Ervlan.

Lena Louarn a oa bet renerez etre 1989 ha 2010. Erlec'hiet e oa bet gant Gwenvael Jéquel betek dibenn 2020. Gwenael Dage eo ar rener abaoe deroù 2021. Ur pevarzek den bennak a vez gopret gant Skol an Emsav.

Embannadurioù

Er bloavezhioù 1970-1980 e veze embannet kelaouennoù-studi gant Skol an Emsav.

• Kudenn ar vroad, gant Fañch Kerraen, Ivon Gag, J. Chardronnet, Bernez Rouz ha Laorañs Guillaumie (Skol an Emsav niv. 15, miz Even 1975)
• Kentelioù Eil Derez gant Frañsez Favereau
• Diwar-benn ar sevenadur gant F. Kerrain, I. Gag, M. Noguti, Y.E. Broudig, F. Elegoed, Y. Olier, F. Favereau hag H. Latimier.
• Kompren hol lennegezh - Sens de la littérature bretonne
• Reolennoù an doare-skrivañ nevez gant Lukian Kergoad
• Méthode de breton pour débutants gant Mona Bouzec-Cassagnou e 1981

Pa voe digoret skolioù Diwan e voe embannet un toullad levrioù-bugale:

• An aotrou Nij
• Koulmig, troet diwar ar galleg gant Mark Kerrain.
• Lanig, troet diwar ar galleg gant Mark Kerrain.
• ar rummad levrioù Lom, troet diwar ar c'hatalaneg gant Mark Kerrain.
• Melenig hag an enezenn
• Nolig an Olifant, levrig da livañ, troet diwar ar c'hembraeg gant Mark Kerrain.
• Pare Paotred Dalton ha Ma Dalton, div levrenn eus dastumad Lucky Luke troet diwar ar galleg.
• Pinocchio

Levrioù-deskiñ

Bremañ e vez embannet levrioù-deskiñ :

• an hentenn Oulpan gant Nikolaz Davalan (teir levrenn gant pep a bladenn-arc'hant)
• Les 1000 premiers mots en breton, stumm brezhonek gant Lukian Kergoat
• Poiladesnouilles, ur c'haier poelladennoù anezhañ, gant Nikolaz Davalan
• Un deiziataer e brezhoneg penn-da-benn, embannet bep bloaz

Kelaouennoù

Div gelaouenn a vez embannet :

• Bremañ, mizieg, abaoe 1980 (daouvizieg abaoe 2015)
• ♯brezhoneg, daouvizieg, abaoe 2014

Ur gelaouennig enlinenn a oa bet ivez :

• Bremaik, sizhunieg, etre 2004 ha 2011

Liamm diavaez

• Lec'hienn internet ar gevredigezh
• Ur skol evit an emsav

Porched Breizh – Adkavit pennadoù ha rummadoù Wikipedia a denn da Vreizh.