Amfion

Eus Wikipedia
Mont da : merdeiñ, klask

Amfion (henc'hresianeg: Ἀμφίων) a oa mab da Zeus ha da Antiope, ha breur gevell Zethos, ha roue Thebai. Soner ha barzh e oa ivez.

Ganedigezh[kemmañ]

Gwallet e oa bet o mamm Antiope gant Zeus, ha hi da dec'hel gant ar vezh da Sikion. Eno e timezas d'ar roue Epopeus. Arsailhet e voe Sikion gant un arme eus Tebai, renet gant Likos (pe Lykos) pe gant e vreur Nikteos, ha kaset e voe ar vaouez d'ar gêr da vout kastizet. Gwilioudiñ a reas war hent ar gêr, ha genel daou vab en ur c'hofad. Ret e voe dezhi diskouez anezho d'ar bobl war ar menez Kiteron, ma voe laosket ar vugale, ha kaset o mamm da Debai da vout sklavez gant ar rouanez Dirke.

Bugaleaj[kemmañ]

Hag ar vugale gaezh dilaosket war ar menez Kiteron gant o eontr kriz, Likos, roue Thebai. Kavet e voent gant mesaerien avat, ha desavet gante.

Meur a vloaz goude e tec'has Antiope hag e kavas he bugale war ar menez ma oant bet ganet. Pa oa bet graet vil d'o mamm gant Dirke ez ejont d'he lazhañ: staget e voe gante etre kerniel un tarv. Sevel a rejont un arme hag aloubiñ Tebai. Goude e voe savet mogerioù kêr Tebai gante, pep hini en e zoare.


Soner[kemmañ]

Donet a reas Amfion da vout ur barzh hag ur soner ken barrek hag Orfeüs. Hennezh all a ouie sachañ al loened war e lerc'h, Amfion a c'halle lakaat ar vein da fiñval. Desket e oa bet gant an doue Hermes da seniñ fleut ha lirenn.

Gwreg ha bugale[kemmañ]

Digant Niobe, merc'h da d-Tantalos, roue Lydia, en doa meur a vugel, an Niobeezed a vez graet anezhe. Met brasoni a savas enni, ha kunujenniñ an doueez Leto a gredas ober.

Sevel Tebai[kemmañ]

Zetos a zeuas da vout hemolc'her ha mesaer, troet gant ar sevel chatal. Sevel a rejont mogerioù en-dro da Gadmea, gwikadell Tebai. Zetos a zouge ar vein, hag Amfion a sone an delenn ken flour ma teue ar vein d'e heul ha ma'z aent o-unan d'al lec'h ma tleent. [1] Abalamour da se eo e teskas seniñ an delenn e doare Lidia, hag e lakaas teir c'hordenn outi ouzhpenn.[2] Dimeziñ a eure Zetos gant Thebe, a roas hec'h anv da gêr Tebai.

Gwalleurioù[kemmañ]

Niobe, gwreg Amfion, he devoa ur ribitailh bugale, met c'hwezet e oa dezhi ha fae a reas war an doueez Leto ha n'he devoa nemet daou, Artemis hag Apollon. Da gastizañ Niobe ez eas bugale Leto da lazhañ hec'h holl bugale.

Neuze, hervez Ovidius, en em lazhas Amfion gant ar glac'har. Hervez Telesilla avat e voe lazhet a-gevet gant e vugale gant saezhadoù Artemis hag Apollo. Hyginus en deus skrivet ez eas da argadiñ rempl Apollon a skoas e saezhoù outañ. [3]

Zetos n'en doa nemet ur mab, a varvas war-lerc'h ur fazi graet gant e vamm Thebe, ma'z eas an tad d'en em lazhañ.[4] En Odissea avat (el levr IX) e vez graet merc'h Pandareüs eus gwreg Zetos, ha pa lazhas he mab Itilos a-greiz trelatiñ e voe troet en un eostig.[5]

Goude marv Amfion ha Zetos e tistroas Laius da Debai ma voe lakaet da roue.

Evezhiadenn[kemmañ]

Gallout a reer tostaat ar vojenn-mañ ouzh hini Kastor ha Polideukes , en Hellaz, ha hini Romulus ha Remus e Roma gozh.

Dave ha notennoù[kemmañ]

  1. Tripp, Edward. Crowell's Handbook of Classical Mythology. New York: Thomas Crowell Company, 1970, p. 44.
  2. Tripp, Edward. Crowell's Handbook of Classical Mythology. New York: Thomas Crowell Company, 1970, p. 43
  3. Gantz, Timothy. Early Greek Myth. Baltimore: Johns Hopkins University Press, 1993, p. 539
  4. Tripp, Edward. Crowell's Handbook of Classical Mythology. New York: Thomas Crowell Company, 1970, p. 44
  5. Homer. The Odyssey. Trans. Richmond Lattimore. New York: Harper Collins, 1967, p. 295