Sterenn (kelaouenn)

Sterenn a oa ur gelaouenn lennegel hollvrezhonek ha miziek, embannet e Brest dindan renerezh Roparz Hemon etre Genver 1941 ha 1943.

Stumm ha perzhioù

Ment in-folio (22 cm) a oa dezhi gant 60-100 pajenn war baper tev gant ur golo e paper peuzparch. Dek lur e oa ar priz dre niverenn ha 100 lur ar c'houmanant bloaz. Pemp niverenn a yae d'ober ul levrenn.

Boîte postale 75 – Brest e oa chomlec'h-post ar gelaouenn, met ar chekennoù hag al lizhiri-arc'hant a zlee bezañ kaset da chomlec'h Roparz Hemon, 12 place de la Tour d'Auvergne – Brest ha 110 boulevard de Metz – Roazhon da c'houde. 12 rue Puebla, Lambézellec e oa ar chomlec'h pennañ.

Ne c'hellas ket Roparz Hemon lakaat ar gelaouenn da badout pelloc'h eget 12 miz, ken sammet e oa gant e gargoù (Radio-Roazhon, Framm keltiek, kelaouennoù all). Ul levrenn ustitlet Sterenn hep niverenn a zeuas er-maez e 1943. Teir diwar an dek niverenn a voe skrivet pe kempennet gant Abeozen hag eñ a oa e genlabourer evit Radio-Roazhon war ar pemdez er mare-se.

Roll an testennoù

1. Maodez Glanndour, Imram (Merdeadur), barzhonegoù, Genver 1941
2. Farnachanavan, Ar grilheta e Breiz, studiadenn, C'hwevrer 1941
3. William Shakespeare, MakBez, troet gant Roparz Hemon, c'hoariva saoznek, Meurz 1941
4. Frañsez Vallée, Eñvorennou beaj, eil levrenn, Ebrel 1941
5. Frañsez Vallée, Eñvorennou ur brezonegour, emvuhezskrid, Mae 1941
6. Paskal Kerenveier, Ar Farvel goapaer, kempennet gant Roparz Hemon, c'hoariva brezhonek, Mezeven 1941.
7. Abeozen, Yezhadur ar brezhoneg krenn, Gouere 1941
8. Frañsez Vallée, Eñvorennou beaj, trede levrenn, Eost 1941
9. Skridou brezhonek krenn, kempennet gant Abeozen, Gwengolo 1941.
10. Abeozen, Geriadurig brezonek krenn, Here-Du 1941.
11. Tri glac'har an danevellañ, troet gant Roparz Hemon, Kerzu 1941.

E-maez ar steudad : Lan Devenneg, Traoniennou ha kaniennou-mor, studiadenn douarstummadouriezh, 1943.