Menelaos

Menelaos (a-zehou) o redek war-lerc'h Elena (kreiz) e-pad kemeridigezh Troia, krater atikat e dresadennoù ruz, 450-440 kent J.-K., kavet e Gnathia (hiziv Egnazia, Italia). Mirdi al Louvre

Menelaos (Μενέλαος / Menelaos e gregach, un anv hag a dalvezfe "galloud ar bobl) zo unan eus harozed akean pennañ brezel Troia. Roue Sparta e oa.

Yaouankiz Menelaos

Mab Atreus hag Aerope e oa hervez ar mojennoù. Hervez danevelloù all avat e oa mab da b-Pleistenes, a oa mab Atreüs, ha da g-Kleolla, a oa merc'h Dias.

Muntret e voe Atreus gant e niz, Aigistos, a gemeras neuze tron Mikenai hag a renas gant e dad Tiestes. E-pad ar prantad-se edo Menelaos hag Agamemnon, e vreur, o repuiñ e Sparta, e ti ar roue Tindares.

An eured gant Elena

Pa zegouezhas, gant Elena, merc'h Tindareos, ar mare da zimeziñ, e teuas kalz rouaned ha tierned da c'houlenn anezhi. En o zouez e oa Odisseüs, Ajas Veur, Menesteüs, Patrokles, Idomeneos. Gant an holl e voe degaset profoù prizius. Choazet e voe Menelaos evel pried avat daoust ma ne deuas ket e-unan, hervez danevelloù zo, p'en doa kaset e vreur en e lec'h.

Dimeziñ a reas Menelaos gant Elena eta hag Agamemnon gant he c'hoar Klitaimnestra. Dont a reas Menelaos da vezañ roue Sparta neuze rak marvet e oa mibien Tindareos : Kastor ha Polideukes. Ur mab, Lisander e anv, hag ur verc'h Hermione a roas Elena d'he fried.

Gant skoazell e vreur, Agamemnon a gasas kuit Tiestes hag Aigistos hag a bignas goude se war dron e dad. Dont a reas neuze da vezañ galloudusañ roue Bro-C'hres.

E Brezel Troia

Dimezet eo gant Elena a voe skrapet gant Paris, ar pezh a zegasas ar brezel. En Ilias, savet gant Homeros, e asant lakaat un termen d'ar brezel gant un duvell etre paris hag eñ. Tost eo da lazhañ anezhañ met savetaet eo mab Priam gant Afrodite.