Jeanne Malivel

den
Reizh pe jener	plac'h
Bro ar geodedouriezh	Frañs
Anv-bihan	Jeanne
Anv-familh	Malivel
Deiziad ganedigezh	15 Ebr 1895
Lec'h ganedigezh	Loudieg
Deiziad ar marv	2 Gwe 1926
Lec'h ar marv	Roazhon
Doare mervel	abeg naturel
Abeg ar marv	Terzhienn-domm, torzhellegezh, paratyphoid fever
Lec'h douaridigezh	Loudieg
Yezhoù komzet pe skrivet	galleg, gallaoueg
Karg	kelenner
Bet war ar studi e	Beaux-Arts de Paris
Perzhiad e	International Exhibition of Modern Decorative and Industrial Arts
Luskad	Unvaniez ar Seiz Breur
Ezel eus	Unvaniez ar Seiz Breur, Q106540831
Deskrivet en URL	http://centredhistoiredebretagne.com/jeanne-malivel-1895-1926-ou-la-renaissance-de-lart-breton/
Oberennoù zo en dastumad	Mirdi Breizh
Statud e wirioù aozer	Ar gwirioù aozer ne dalvezont ket ken

Jeanne Malivel (15 a viz Ebrel 1895 e Loudieg^[1] - 2 a viz Gwengolo 1926 e Roazhon) a oa un arzourez vreizhat ha kendiazezerez Unvaniez ar Seiz Breur.

Yaouankiz

Merc'h e oa da Albert Malivel ha da Anne Marie Victorine Hermange, kenwerzhourien anezhe. He zad a voe kuzulier-kêr Loudieg. Pa oa bihan Jeanne Malivel e plije dezhi tresañ. Ken troet war an arzoù e oa ma implije forzh peseurt danvez evit krouiñ : war he c'haieroù-skol e trese ingal ha kistin a gizelle.

Studierez ha klañvdiourez

Merzout a reas he zad hag he mamm he deus Jeanne Malivel un donezon evit an tresañ. Goulenn a reont alioù digant Louise Gicquel, kelennerez war an arzoù e Roazhon. Kinnig a ra-hi dezho reiñ kentelioù da Jeanne Malivel e-pad ar vakañsoù. Heuliañ a ra Jeanne Malivel he studioù en « Immaculée Conception » e Roazhon. Merket eo bet du-se gant he c'helennerez war an arzoù, Louise Gicquel. Mont da arzourez a-vicher a ziviz Jeanne Malivel. A-du oa he zud evit ma'z afe da Bariz da genderc'hel gant he studioù war an arzoù-kaer. Koulskoude pa darzh ar Brezel-bed kentañ e fell dezhi distreiñ da Vreizh da vezañ klañvdiourez en Ospitalioù milourel Loudieg ha Trestraou. Sevel a ra damdresadennoù niverus eus an dud gloazet he deus pareet. E 1916 he doa heuliet kentelioù an Akademiezh Julian e Pariz. Bloaz goude e tremen ar genstrivadeg evit mont e Skol Vroadel Uhel an Arzoù-Kaer. Dipitet e voe abalamour ma'z erru er 14vet plas. Gant ar 4^e plas e voe degemeret e 1918 goude bezañ prientet an arnodennoù gant Ferdinand Humbert. Hennezh a roe ar c'hentelioù nemeto digor d'ar merc'hed.

Hiraezh ouzh Breizh

E Pariz he deus tañvaet an aergelc'h arzel e Montparnasse. Kejet he deus ouzh kalz arzourien vreton harluet evel René Quillivic (1879-1969), James Bouillé (1894-1945) ha René-Yves Creston (1898-1964) ha Suzanne Candé-Kreston (1899-1979). Maurice Denis a ginnig dezhi aozañ kentelioù engravañ en "Ateliers d'art sacré", atalieroù savet gantañ. Met ne zeu-hi ket a-benn d'en em gustumiñ gant Pariz. Ken dipitet eo gant buhez kêr-benn Bro-C'hall ma en em laka da zeskiñ brezhoneg. Labourat ha bevañ en he bro he deus c'hoant. E 1923 he doa bet tro da zistreiñ da Vreizh : kelenn a ra koadengravañ e Skol rannvroel an Arzoù-Kaer Roazhon.

Raktres Unvaniez ar Seiz Breur

Obererezh brudetañ Jeanne Malivel eo krouidigezh Unvaniez ar Seiz Breur. Goude bezañ en em gavet gant Reun Kreston (1922) e talc'h Jeanne Malivel da sevel ur strollad mignoned hep skodenn na reolenn, hep prezidant na renkadurezh. Dont a ra anv ar strollad eus ur gontadenn bet dastumet ha troet e gallaoueg gant Jeanne Malivel : Ar Seiz Breur. Un heklev diouzh ar Seiz Sant diazezer eo ivez. Ha diazez an arz a-vremañ e Breizh eo deuet da vezañ luskad arzel ar Seiz Breur. O c'hoant da vodernaat an arzoù breizhat hep treiñ kein diouzh an hengoun a zo bev c'hoazh e Breizh. Pal kentañ ar Seiz Breur a oa sevel ur raktres evit diskouezadeg 1925 Mirdi etrevroadel an arzoù kinklañ hag greantel modern e Pariz. Strollad ar Seiz Breur en doa labouret asambles gant ar priedoù Creston (René-Yves , Pierre-Abadie-Landel (1896-1972) hag artizaned evel Gaston Sébilleau (1894-1957) pe Christian Lepart (1902-1944). E fin 1923 hag e 1924 e oa dreist-holl ul labour a-stroll evit ar raktres. Jeanne Malivel a grou kinkladurioù, arrebeuri, gwiadoù, taolioù ha livañ mogerioù. Treset he doa ivez ur servij ha gwerennoù evit Feilhañserezh Henriot. E 1925 he doa anavezet strollad ar Seiz Breur stegnadurioù. Dibabet he doa Jeanne Malivel mont kuit deus ar strollad. Memestra e oa deuet a-benn ar strollad arzourien vreizhat da c'hounid prizioù kinkladur meur a-wech^[2]

Engravadur « La France protégeant la Bretagne », Istor hon Breizh

Engravadur brudetañ Jeanne Malivel a oa bet embannet en Istor hon Breizh, ul levr bet skrivet gant Jeanne Coroller-Danio, ur stourmerez vreizhat. Anaoudegezh o doa graet an eil gant eben en ospital milourel^[3]. Savet he deus Jeanne Malivel 74 engravadur war goad evit skeudenniñ levr he mignonez. Burutellet kalz zo bet al levr evit he zestennoù, met an engravadurioù zo bet kavet brav-tre. Koulskoude e oa bet rebechet groñs da Jeanne Malivel bezañ savet un engravadur el lec'h ma vez gwelet Bro-C'hall o laerezh yalc'had Breizh, Union de la Bretagne à la France, hec'h anv pe La France protégeant la Bretagne. Adembannet eo bet al levr goude bezañ tennet engravadurioù Jeanne Malivel. Morse n'he deus dinac'het hec'h engravadur.

Bloaz 1925 : dimeziñ ha marv Jeanne Malivel

Dimeziñ a reas e 1925 gant Maurice Alphonse Hund ha mervel a reas bloaz goude da 31 bloaz digant un derzhienn-alter.

Skeudennoù

Oberennoù Jeanne Malivel
Nominoë triomphant, engravadur war goad evit L'Histoire de notre Bretagne (1922).
Engravadur war goad evit L'Histoire de notre Bretagne (1922).
L'exécution du marquis de Pontcallec.
Bataille de Saint-Aubin-du-Cormier.
Sainte Mère de Dieu (war-dro 1925), feilhañs^[4], Mirdi ar feilhañs e Kemper.
Kador, Roazhon, mirdi Breizh.

Levrlennadur

Jeanne Coroller-Danio , Histoire de notre Bretagne, Embannadurioù Elor, Sant-Visant-an-Oud, 1922, adembannet e 1997 ;
J.R. Rotté, Ar Seiz Breur, Embannadurioù Breizh Hor Bro ;
Octave-Louis Aubert ha Reun Kreston, Jeanne Malivel, son œuvre et les 7 frères, Embannadurioù Aubert, 1929. Adembannet gant Les Presses Bretonnes e 1995 ;
Association Mémoire du Pays de Loudéac, Jeanne Malivel, poème des 7 frères.
Daniel Le Couédic ha Yann-Cheun Veillard, Ar Seiz Breur 1923-1947, Terre de Brume ha Mirdi Breizh, Éditions Palantines, 2000. Embannet al levr kaer-se e galleg ivez.
Olivier Levasseur, Jeanne Malivel, Coop Breizh, 2013

Liammoù diavaez

Commons

Muioc'h a restroù diwar-benn

Jeanne Malivel

a vo kavet e Wikimedia Commons.

(br) Nikolaz Graignic, Jeanne Malivel : Ar Seiz Breur ha Breizh - An Istor Livet, Brezhoweb, 14 a viz C'hwevrer 2024 (pe war YouTube)

Daveennoù

↑ Akt ganedigezh, dielldi Aodoù-an-Arvor
↑ [1], Lec'hienn "En eñvor".
↑ Le Pays de Loudéac et la Grande Guerre 1914-1918, Mémoire du Pays de Loudéac, Eil c'hwec'hmiziad 1995, pajenn 18.
↑ Patrom gant Jeanne Malivel savet gant Renée Trudon, michererezh ar Feilhañserezh Henriot.

[1] Akt ganedigezh, dielldi Aodoù-an-Arvor

[test-2] [1], Lec'hienn "En eñvor".

[3] Le Pays de Loudéac et la Grande Guerre 1914-1918, Mémoire du Pays de Loudéac, Eil c'hwec'hmiziad 1995, pajenn 18.

[4] Patrom gant Jeanne Malivel savet gant Renée Trudon, michererezh ar Feilhañserezh Henriot.

[1]

[2]

[3]

[4]