Yann-Fañch Jacq

Eus Wikipedia
(Adkaset eus PAK)
Sauter à la navigation Sauter à la recherche
Yann-Fañch Jacq
Yann-Fañch Jacq
Obererezh Romantour, daneveller evit ar grennarded, embanner
Ganedigezh D'an 31 a viz Mae 1954
e Konk-Kerne, Breizh Breizh
Yezh skrivañ Brezhoneg
Enorioù Priz ar Yaouankiz 2004, 2005, 2008, 2009 ha 2010

Yann-Fañch Jacq a zo ur c'helenner, ur skrivagner hag un embanner brezhonek (Konk-Kerne 1954- ). Meur a vicher en deus bet graet, a-raok dont da vezañ kelenner e Diwan. Gantañ eo bet savet an ti-embann Keit Vimp Bev.


Buhez

Ganet eo Yann-Fañch Jacq, d’an 31 a viz Mae 1954 e Konk-Kerne. E Kemper (Kerne 29) en deus tremenet e yaouankiz. E-kerzh e vakañsoù ez ae da Laz Bro-Gerne, da di e eontr. Eno emañ o chom hiziv an deiz.

Evit ar pezh a sell ouzh e studioù, en deus tremenet ur vachelouriezh F1, sevel mekanikoù, e Likez Kemper hag ur BTS war ar vetalouriezh en deus heuliet war-lerc’h. Un diplom edukatour pe skoliour zo bet tapet gantañ oc'h heuliañ ur stummadur dibaouez e-pad 3 bloaz.

Kelenner eo bremañ war ar brezhoneg e Skolaj Diwan ar Releg hag e Lise Diwan Karaez. Ouzhpenn e vicher ez eo rener an embann e ti Keit 'Vimp Bev, un ti-embann brezhonek. Pennskrivagner eo ivez evit ar gelaouenn sizhuniek «Ya!», e brezhoneg.

Desket en deus brezhoneg dre lizher gant Skol Ober, e-pad e goñje er Gabon ha gant e dud, gant levr Pêr Denez, «Brezhoneg buan hag aes» hag en ur heuliañ stajoù.

Skrivagner

Per Denez en deus roet dezhañ un taol sikour evit kemer lañs ; dre m’en deus aotreet e vefe embannet e skrid kentañ, «Eus an tu all», istor ur pezh moneiz.

Kroget eo da skrivañ peogwir e oa aet skuizh gant al levrioù a veze kinniget dezhañ da lenn. Ne veze ket kavet e gont gantañ. Dre-vras e kave dezhañ e veze pounner an deskrivadurioù, ne veze ket lañs gant an darvoudoù, komz a raent eus ur bed kozh, ha ne veze graet netra evit sachañ evezh al lennerien. Setu en doa soñjet «Klemm a rit, paotr. N’ho peus ken nemet skrivañ».

Kustum eo Yann-Fañch Jacq da skrivañ, forzh peur, met kentoc’h pa vez un hanter-devezh dirazañ, d'ar mareoù ma ne vez ket dalc’het gant e labour kelenner : e-pad ar vakañsoù pe sizhun diwezhañ ar skol. Abaoe ma skriv en deus cheñchet e zoare da skrivañ. Er penn-kentañ ne c’helle ket skrivañ pa ne ouie ket ar fin. Ur wech pe ziv en deus graet er mod-se. Met neuze, d’ar poent-se e skriv al levr dindan nebeud rak aon en deus da goll an ijin, an aergelc’h en deus krouet.

Peseurt lennegezh a blij dezhañ ? Ne vez ket lennet kalz gantañ rak n’en deus ket kalz a amzer. Met plijadur en devez o lenn Yann Gerven, Yann Bijer ha Goulc'han Kervella. Evit ar mare, e galleg, eo plijet gant Harlan Coben.

Mennozhioù

Abaoe ar bloavezh 2000 e skriv levrioù, 200 pajennad enne. Skrivañ a ra e brezhoneg «peogwir e vank traoù» ha «D’an hini a gav dezhañ traoù eo dav bastañ d’an ezhommoù, den ebet ne raio evitañ». Dre m’en deus labouret kalz gant bugale ha krennarded, en deus bet c’hoant da skrivañ evite, dre ma’z int dazont ar yezh, daoust ma’z eo diaes skrivañ evito. Mod all, e vo torret ar chadenn a liamm ar re yaouank ouzh an dud en o oad gour.

Oberennoù

Romantoù, romantigoù ha bandennoù treset zo bet skrivet gant Yann-Fañch Jacq.

Romantoù
  • Eus an tu all, Hor Yezh, 1983 ; romantig
  • A-berzh mamm-gozh ; Keit 'Vimp Bev ; 1999
  • Da fall ha da viken ; Keit 'Vimp Bev ; 2000
  • Evel ma tro an heol ; Keit Vimp Bev, 2002
  • Tomm eo bet deomp ; Keit 'Vimp Bev; 2002
  • Bravoc'h e vo warc'hoazh, Keit Vimp Bev, 2004
  • Ur galon re dener; Keit Vimp Bev, 2005
  • Ken yen hag an avel, Keit Vimp Bev, Here 2006
Romantigoù evit ar grennarded

Pemp gwech en deus bet Priz ar Yaouankiz.

Levrioù bugale
Bannoù treset
  • Bannoù treset, skeudennaouet gant Laurent Escudié ha Malo Ar Menn.
  • An tokarn hud,skrivet gant YF Jacq gant tresadennoù graet gant Tudu (Tudual Huon).
Kelaouennoù
  • Moutig, kelaouenn ar vugale vihan.
  • Louarnig, kelaouenn evit ar vugale kentañ derez.
  • Meuriad, kelaouenn evit ar grennarded.
  • Ar sizhunieg YA
Troidigezhioù

Liammoù