Pistolet automatique modèle 1935A
Arabat eo droukveskañ gant Pistolet automatique modèle 1935S.| PA 35A | |
|---|---|
 Ur bistolenn PA 35A | |
| Kinnig | |
| Bro |  Frañs
|
| Mont en-dro | Pistolenn damaotomatek, un-ober |
| Munisionoù | 7,65 × 20 mm Long |
| Produer | SACM (uzin Cholet) |
| Mare produiñ | 1937 - 1950 |
| Niver produet | War-dro 85.000 |
| Pouez ha muzulioù | |
| Mas (hep kartouchenn) | 0,730 kg |
| Hirder | 197 mm |
| Hirder ar c'hanol | 109 mm |
| Perzhioù all | |
| Endalc'h | Karger fiñv 8 kartouchenn |
| Lezenn | |
| Rummad e Bro-C'hall | B |
Ar PA 35A (PA evit Pistolet Automatique, Pistolenn Aotomatek), anvet Pistolet automatique modèle 1935A en ur mod ofisiel, zo ur bistolenn damaotomatek un-ober ijinet gant ar Suis Charles Petter, ha produet gant ar SACM[1] etre 1935 ha 1950 evit arme Bro-C'hall dreist-holl[2]. Servijout a reas war an dachenn etre fin ar bloavezhioù 1930 ha 1950.
Istor
[kemmañ | kemmañ ar vammenn]E-pad ar Brezel-bed Kentañ o doa diskouezet ar pistolennoù damaotomatek evel ar Colt M1911 stadunanat hag al Luger P08 alaman bezañ talvoudus war an dachenn-emgann. Goude ar brezel e tivizas Frañs cheñch e revolverioù standart Modèle 1892 evit un arm-dorn damaotomatek nevez. E deroù ar bloavezhioù 1920 e voe dibabet da gentañ ar c'hartouchennoù 9 × 19 mm Parabellum evit o fourveziañ, abalamour e oa bet tapet kalz stokoù anezhe digant an Alamaned goude harz-brezel 1918. E 1922 e voe esaet un nebeud armoù kambret e 9 mm, met ne voe kemeret diviz ebet war un arm standart nevez.
Dont a reas ar Stadunaniz a-benn da werzhañ stokoù dreist munisionoù 7,65 × 20 mm Long d'an arme c'hall, a choazas anezhañ evel he c'hartouchenn standart nevez e kreiz ar bloavezhioù 1920. E 1935, ne oa ket bet choazet arm-dorn nevez ebet gant an arme c'hall c'hoazh. Amprouennoù nevez a voe kaset. Daou bimpatrom pistolennoù a voe choazet : unan savet gant ar SACM (PA 35A) hag unan all ijinet gant ar MAS e Saint-Étienne (ar PA 35S)[2]. Dibab daou arm war an dro a oa ur mod da adtapout dale Frañs war dachenn an armoù-dorn damaotomatek o klask produiñ muioc'h anezhe.
85.000 skouerenn eus ar PA 35A a voe produet etre 1937 ha 1950 e uzin SACM Cholet. En o zouez, 10.000 hepken a oa bet savet a-raok harz-brezel miz Even 1940. 23.850 a voe produet etre miz Here 1940 ha miz Ebrel 1944 evit ar Wehrmacht, a implijas anezhe dindan an anv Pistole 625(f). Ar peurrest a voe produet etre 1945 ha 1950, daoust d'ar bistolenn bezañ diamzeriet ha re wan he munisionoù e-keñver ar re broduet gant ar broioù all en Europa ha Norzhamerika er memes koulz[2]. Implijet e voe ar PA 35A da vare Brezel Indez-Sina[1]. Ar MAC 50 a gemeras plas ar PA 35A ha PA 35S en arme c'hall adalek 1950.
Ar SIG P210 zo bet savet diwar brevedoù ar PA 35A.
Levrlennadur
[kemmañ | kemmañ ar vammenn]- '(fr)' BASTIÉ Jean-Pierre, Les armes réglementaires françaises en 7,65 Long - PA 1935 A & S, PM 1938, Crépin-Leblond, 2021, 208 p., ISBN 9782703004646
Liammoù diavaez
[kemmañ | kemmañ ar vammenn]- (fr) Deskrivadur ar PA 35A gant fotoioù war Arme et Passion
