Krag-Jørgensen
| Krag-Jørgensen | |
|---|---|
 Pimpatrom 1892 eus ur fuzuilh Krag-Jørgensen M1894 norvegian | |
| Kinnig | |
| Bro |  Norvegia
|
| Doare | Fuzuilh |
| Mont en-dro | Tennata dre zorn, dre vorailh |
| Munisionoù | 6,5 × 55 mm (stumm norvegian) .30-40 Krag (stumm amerikan) 8 x 58 mm R (stumm danat) |
| Produerien | Kongsberg Våpenfabrikk Springfield Armory Austrian Arms Company |
| Niver produet | War-dro 700.000 |
| Mare implij | 1889-1940 |
| Pouez ha muzulioù (hervez an adstummoù) | |
| Mas (hep kartouchenn) | Etre 3,380 ha 5,160 kg |
| Hirder | Etre 986 ha 1.328 mm |
| Hirder ar c'hanol | Etre 520 ha 832 mm |
| Perzhioù all | |
| Hed-tenn pleustrek | 900 m |
| Tizh mont e-maez ar boledoù | Etre 580 ha 870 m/s hervez ar munisionoù |
| Endalc'h | Karger diabarzh 5 kartouchenn |
| Adstummoù nesañ | M1889 (danat), M1892 (stadunanat), M1894 (norvegian), dezhe bep a adstummoù |
| Lezenn | |
| Rummad e Bro-C'hall | C |
Ar Krag-Jørgensen a oa ur fuzuilh tennata dre zorn norvegian ijinet gant Ole Herman Johannes Krag, ofiser ha rener ar Kongsberg Våpenfabrikk, arsanailh stad Norvegia, asambles gant an ijinour Erik Jørgensen. Un arm-skoaz standart e voe en armeoù Danmark, Stadoù-Unanet Amerika[1] ha Norvegia.
Istor
[kemmañ | kemmañ ar vammenn]Stumm danat
[kemmañ | kemmañ ar vammenn]E 1886 e klaske an Danmark ur fuzuilh nevez evit e arme. Krag ha Jørgensen a ginnigas dezhe pimpatrom ur fuzuilh-vorailh nevez, enni ur c'harger da wintañ 10 kartouchenn, e stumm ur glozenn diavaez, tro-dro da gulasenn an arm. Nevez e oa da-geñver ar c'hargerioù korzennek kinniget er fuzuilhoù Krag betek-neuze.
Goude un nebeud esaeoù war an dachenn e voe digresket an niver a gartouchennoù er glozenn da 5 ha dibabet an arm gant an arme danat e 1889. Kambret e oa e 8 × 58 mm R. Stummoù all a voe savet : ur garabinenn verroc'h hag ur fuzuilh-resisted ponneroc'h he c'hanol. Implijet e voent gant an arme danat betek 1940. Anvet eo peurliesañ Krag-Jørgensen M1889 ; ar stumm ralañ da gavout eo hiziv an deiz.
Stummoù amerikan ha norvegian
[kemmañ | kemmañ ar vammenn]E deroù ar bloavezhioù 1890 e klaske ar Stadoù-Unanet un arm nevez evit kemer plas ar fuzuilhoù un-tenn Springfield M1873 implijet betek-neuze ha diamzeriet e-keñver an armoù nevez produet en Europa. Choazet e voe e 1892 ar Krag-Jørgensen kambret evit kartouchennoù all (.30-40 Krag) ha dezhe ur glozenn un tammig disheñvel. Tro 500.000 anezhe a voe produet e arsanailh Springfield etre 1894 ha 1904. Anvet eo ar stumm-mañ Krag-Jørgensen M1892.
Implijet e voe an arm gant arme ar Stadoù-Unanet er brezel a-enep Spagn e 1898 e Kuba hag er Filipinez. Diskouez a reas bezañ ur fuzuilh aes da zornata, fiziapl ha solut, met gwan e oa galloud-herzel he boledoù e-keñver reoù ar Mauser Model 1893 implijet gant Spagn, enni kartouchennoù 7 × 57 mm Mauser. Klasket e voe implijout munisionoù kreñvoc'h er Krag-Jørgensen, met distummañ a raent ar glozenn.[1] Divizet e voe dibab un arm nevez e-lec'h klask gwellaat ar Krag-Jørgensen : ar Springfield M1903 a gemeras e blas e 1903.
Ur stumm all, tost d'ar stumm amerikan, a voe dibabet evel arm standart gant arme Norvegia e 1894. Kambret e oa e 8 × 58 mm R. War-dro 133.000 skouerenn anezhe a voe produet.[2] Krag-Jørgensen M1894 eo anvet peurvuiañ.
Liamm diavaez
[kemmañ | kemmañ ar vammenn]- (fr) Krag-Jørgensen Danois m1889/10 war ar chadenn Le feu aux poudres, 09/06/2021
Daveennoù
[kemmañ | kemmañ ar vammenn]- ↑ 1,0 ha1,1 (fr) GUILLOU Luc, MATOUS Hervé, Les fusils Krag-Jorgensen US 2ème partie e Cibles n°643, miz Genver 2024, pp. 76-80
- ↑ (en) The Norwegian M1894 Krag-Jorgensen rifle (lennet d'ar 01/05/2024)
