Ithaca 37
| Ithaca Model 37 | |
|---|---|
 Ur fuzuilh-pomp Ithaca Model 37 dezhi ur c'hanol berraet | |
| Kinnig | |
| Bro |  Stadoù-Unanet Amerika
|
| Doare | Fuzuilh |
| Mont en-dro | Tennata dre bomp |
| Munisionoù | Kalibr 12 Kalibr 16 Kalibr 20 Kalibr 28 |
| Produer | Ithaca Gun Company |
| Bloavezh krouidigezh | 1933 |
| Mare produiñ | Abaoe 1937 |
| Niver produet | Ouzhpenn 2.000.000 |
| Pouez ha muzulioù | |
| Mas (hep kartouchenn) | 3,60 kg |
| Hirder | Etre 760 ha 1.010 mm |
| Hirder ar c'hanol | Etre 330 ha 760 mm |
| Perzhioù all | |
| Endalc'h | Karger korzennek 4, 5 pe 7 kartouchenn (mui unan er gambr) |
| Lezenn | |
| Rummad e Bro-C'hall | B |
An Ithaca zo ur fuzuilh-pomp produet gant an embregerezh stadunanat Ithaca abaoe 1937.
Istor
[kemmañ | kemmañ ar vammenn]Harry Howland, ijinour en embregerezh Ithaca, a gemmas e 1931 sistem skeiñ ha distrinkañ ar Remington Model 17 ijinet gant John Browning. Evit doujañ ouzh gwirioù e-keñver brevedoù e c'hortozas Ithaca 1937 evit kregiñ da broduiñ an Ithaca 37[1]. Disheñvel e oa diouzh kalz fuzuilhoù-pomp all abalamour d'he zoull-distrinkañ bezañ dindan an arm ha n'eo ket war e gostez : abalamour da se eo priziet gant ar gleizidi, pa ne erru ket gazoù tomm war-zu o fenn da vare an tennañ. Gwikefre an arm a c'hall lezel an tenner d'ober slamfire : trawalc'h eo chom pouezet e viz war an draen hep sevel anezhañ evit kenderc'hel da dennañ, gant ma fiñver pomp an arm. Dre se e vez uhelaet lusk-tennañ an arm[2].
Meur a stumm eus an Ithaca 37 a zo bet produet abaoe 1937, evit ar c'halibroù 12, 16, 20 hag 28, dezhe kanolioù 20, 26, 28 pe 30 meutad (etre 510 ha 760 mm), ha lammoù pe munudoù disheñvel hervez o implij[2].
Implij
[kemmañ | kemmañ ar vammenn]Poblek eo bet e meteier ar polis hag an armeoù[3]. Implijet eo bet gant an US Marines da vare brezel Viêt Nam, ha gant an NYPD hag an LAPD e-pad pell. E dibenn ar bloavezhioù 1970 e voe kemeret e blas gant ar Remington 870 pe ar Mossberg 500 e kalz unvezioù eus an arme stadunanat[2]. Ouzhpenn daou vilion a skouerennoù eus an Ithaca 37 zo bet produet betek hiziv.
Daveennoù
[kemmañ | kemmañ ar vammenn]- ↑ (en) HUTCHCROFT Joel J, Review: Ithaca Model 37 Shotgun, Shooting Times, 16/02/2016 (lennet d'ar 05/01/2025)
- ↑ 2,0 2,1 ha2,2 (en) THOMPSON Leroy, The Ithaca Model 37 Riot Shotgun: Historical Lookback, Firearms News, 09/08/2024 (lennet d'ar 05/01/2025)
- ↑ (fr) McNAB Chris, Armes à feu Encyclopédie visuelle, L'Imprévu, 2022, pp. 276-277
