Iarlles y Ffynnon

Owain tapet dindan ur barrad kazarc'h, e-kichen ar feunteun (skeudenn eus embannadur Mabinogion Charlotte Guest (eil embannadur, 1877)

Owain o saveteiñ al leon. Livadur tennet eus un dornskrid gallek.

Iarlles y Ffynnon (Itron ar Feunteun e brezhoneg), pe Owain, zo unan eus danevelloù ar Mabinogi kembraek, hag unan eus an teir danevell a ya d'ober skourr An Tri Romant, anv al lodenn eus ar Mabinogi a zo kaoz enne eus ar Roue Arzhur.

An Tri Romant

Peredur fab Efrawg ha Geraint ac Enid eo anvioù an daou romant all. An tri a gaver e daou zornskrid eus ar XIV^vet kantved: Levr Gwenn Rhydderch ha Levr Ruz Hergest.

Dornskridoù

Anavezet eo dre daou zornskrid kozh: Levr Gwenn Rhydderch ha Levr Ruz Hergest, o-daou eus ar XIV^vet kantved. Un darn eus an danevell a gaver ivez en un dornskrid arall anvet Jesus Colleg Oxford MS. XX, a zo er Jesus College en Oxford. N'eus nemet el Levr Ruz e kaver ar skrid en e hed.

Orin an danevell

Gallout a rafe dont eus ar romant gallek Yvain ou le Chevalier au lion gant Chrétien de Troyes, savet en eil hanterenn an XII^vet kantved, etre 1170 ha 1180. Tennañ a ra dezhañ.

Awenet eo bet krouer ar romant gant an istor hag ar roue brezhon Owain mab Urien, roue Rheged, en Hen Ogledd, er VI^vet kantved.

Ar Mabinogi, pe Mabinogion, zo anezhe en anv-se abaoe ma voent troet hag embannet gant Charlotte Guest en XIX^vet kantved.

Owain hag Yvain a oa, a soñjed gwechall, div dudenn deuet eus ur skrid all, ar memes hini, hogen kollet. Hiziv avat e kreder eo savet istor Owain war-eeun, pe dre hanterouriezh unan all, diwar barzhoneg Chrétien, gant elfennoù lec'hel ouzhpenn evit plijout da dud Kembre. Chrétien koulskoude en dije bet anaoudegezh eus skridoù pe mojennoù keltiek, rak elfennoù zo a seblant dont eus Buhez Sant Mungo (anvet ivez Kentigern), ur sant brezhon eus Strat Clut.

An istor

Dimezet eo ar marc'heg Owein d'an Itron ar Feunteun. Met koll anezhi a ra pa'z a da glask ober taolioù-kaer ur marc'heg e-lec'h chom d'ober war he zro.

Levrlennadur

E kembraeg

• Meic Stephens, Cydymaith i Lenyddiaeth Cymru, Gwasg Prifysgol Cymru, 1986. ISBN 0-7083-0915-1
• R. L. Thomson (gol.), Owein or Chwedyl Iarlles y Ffynnawn (Dulyn, 1986). Golygiad o'r testun gwreiddiol, gyda nodiadau.
• Y Tair Rhamant - skrid nevesaet gant Bobi Jones. Cymdeithas Lyfrau Ceredigion, Aberystwyth, 1960.

E brezhoneg

• Ar Mabinogion, troet gant Fañch Elies, embannet gant Mouladurioù Hor Yezh e 1991.

E galleg

• (fr) Les Quatre branches du Mabinogi et autres contes gallois du Moyen-Age traduit du gallois, présenté et annoté par Pierre-Yves Lambert, Éditions Gallimard, collection « L'aube des peuples », Paris, 1993, (ISBN 2-07-073201-0).

Liamm diavaez

• (fr) Owain, ou la dame à la fontaine , troidigezh Job Loth, e Celtic links.

Pennadoù kar

• Charlotte Guest ~ Mabinogion