Youenn Troal

Youenn Troal
Anv ofisiel	Yves Troal
Anv pluenn	Youenn Troal
Obererezh	Beleg, danevellour
Ganedigezh	e Genver 1925 e Kombrid, Breizh
Marv	d'ar 24 a viz Mezheven 2016 e Kemper, Breizh
Yezh skrivañ	Brezhoneg
Oberennoù pennañ
Ar C'hrist d'an Amerindianed
Sinadur

Youenn Troal, Yves Troal e anv kefridiel, zo ur beleg hag ur skrivagner breizhat ganet e 1925 e Kombrid Aet eo d'an Anaon, d'ar 24 a viz Mezheven 2016..

Buhez hag oberenn

Desavet e voe en ur familh a gouerion vrezhoneger e Kombrid, e Bro-Vigoudenn. Beleget e voe e-kerzh ar bloavezh 1949, en eskopti Kemper ha Leon, gant an aotrou 'n eskob André Fauvel.

Anavezet eo dreist-holl evit bout skrivet al levr Ar C'hrist d'an Indianed, a zezrevell doare e abostolerezh e Perou eus 1963 da 1968 hag eus 1973 da 1979, da-heul ar c'halvadenn a reas ar Pab Pi XII en e lizher Fidei Donum e 1957 a c'houlenne digant beleion Europa da vont da sikour an Iliz en Afrika hag en Amerika ar Su. Embannet e voe e levr a-dammoù er gelaouenn Al Liamm da gentañ, er bloavezhioù 1970.

Adembannet eo bet al levr-se gant Mouladurioù Hor Yezh e div levrenn e 2007 ha 2010, dindan an titl Ar C'hrist d'an Amerindianed Dave a ra an aotrou 'n eskob Visant Fave d'e gefridi e Menez an Andoù en e levr War roudou or misionerien..

Kenlabourat a reas Youenn Troal gant Visant Seite evit ober kentelioù er gevredigezh Ar Skol dre Lizer etre 1968 ha 1973. Dont a reas da vout aotrou person parrez Plouneour-Menez er bloavezhioù 1980 ha kelenner evit Strollad ar Vro Bagan, hag e krogas da skrivañ pennadoù evit Imbourc'h. Fiñvskeudennet e voe gant Frañs 3 e 1973 er filmig Oaled ar vro-Bagan.

Anvet e voe da berson parrez Trêgad er bloavezhioù 1990, kent mont war e leve e parrez Langolen e 2002, e-men ez embann skeudennoù deol e brezhoneg. Harpet en deus ar gevredigezh Tiegezh Santez Anna evit embann he c'helaouenn Breizh da Jezuz.

Ingal e kendalc'h da skrivañ pennadoù a-ziwar lennadennoù eus an Aviel evit ar gelaouenn Kannadig Imbourc'h.

Pennadoù ha danevelloù gant Youenn Troal

• Troidigezh Ar Hyd y Nos diwar ar c'hembraeg ;
• Betek dent-heskenn an Andoù, Al Liamm, niverenn 109, 1965 ;
• Davet ar Prat du, Imbourc'h, niverennoù 60-85, 1973-1974 ;
• Va ene, skeudenn Doue, Kannadig Imbourc'h, niverenn 67, 2010 ;
• An daouarn naet, Kannadig Imbourc'h, niverenn 75, 2012 ;
• Ikonenn, Kannadig Imbourc'h, niverenn 82, 2013 (...)

Arroud

Yaou - 31 a viz Here (1974). Dec'h on pignet war gribenn ar menez da welout e pe stad edo ar vered, rak da Ouel an Anaon, emañ ar c'hiz mont di da lidañ an Oferenn. Sabatuet-mik on bet o welout eno ur pikol bez. Lavaromp kentoc'h ur pikol bern simant, ledan ken ma oa. D'an abardaez, e c'houlennis digant ar baotred ar penaos hag ar perak eus ur seurt savadur. Bez ur baotrez an hini eo. Dre wallzarvoud he doa en em lazhet er menezioù. N'eo ket bet lakaet he c'horf en douar ; gwisket he arc'h nemetken gant meur a sac'had simant. Hag an dud eta, o welout ur bez ken bras, zo staget da grediñ en doa kresket he c'horf goude he zremenvan.

Sellout a ran gant an distouver prenet ganin ; graet eo bet e Shangai. E Lima em eus gwelet e pep korn bernioù levrioù ha kelaouennoù, bruderezh ganto evit Sina Mao. Paotr yaouank lemmañ an tachad, Salomon e anv, en deus koumanantet, evit un nebeudig gwenneien, d'ur gelaouenn spagnolek, kaset dezhañ eus Pekin, e-pad daou vloaz. Va zommerez nevez prenet evit keginañ gant tireoul (petrol) a zeu eus Portugal hag ar gontell eus Alemania. Va metr eo merket warnañ Tchekoslovakia ha va heskenn Alemania.

Youenn Troal, Gant Indianed ar Perou, Al Liamm, 1974-1975, p. 26