Glock (pistolenn)

Glock
	; ; Ur bistolenn Glock 17 (pevare rummad)
Kinnig
Bro orin	Aostria
Doare	Pistolenn damaotomatek DAO
Mont en-dro	Tennata dre argil berr
Munisionoù	9 × 19 mm Parabellum; .22 Long Rifle; .40 S&W; .45 ACP; .45 GAP; .380 ACP; .357 SIG
Krouer	Gaston Glock
Produer	Glock
Mare produiñ	Abaoe 1982
Perzhioù teknikel; (Glock 17 standart, rummad 5)
Mas (gant he c'harger, hep kartouchenn)	705 g
Mas (karget, karger 17 tenn)	915 g
Hirder (stumm hirañ)	204 mm
Hirder ar c'hanol	114 mm
Endalc'h	Karger fiñv 17 kartouchenn (stumm diazez)
Lezenn
Rummad e Bro-C'hall	B

Evit sterioù all, gwelet Glock.

Ar Glock zo un rummad pistolennoù ijinet gant Gaston Glock etre 1979 ha 1982, ha produet gant an embregerezh Glock eus Deutsch-Wagram (Aostria) abaoe 1982. Da gentañ holl e voe implijet gant lu ha polis ar vro-se adalek 1982 dindan an anv P80. Anvet eo ivez Glock Safe Action gant an embregerezh abalamour d'he draen dezhi ur pouez-loc'hañ uhel ha da dri live surentez.

An holl rummadoù hag adstummoù eus ar bistolenn Glock zo savet tro-dro d'ar memes diazez, a oa modern-tre e deroù ar bloavezhioù 1980 :

ur framm e polimer, skañvoc'h evit ar pistolennoù hengounel e dir ;
ur skoer bannet ;
un endalc'h uhel (17 kartouchenn evit ar Glock 17 orin) ;
n'eus ki ebet, na surded diavaez ebet war an arm.

Rummadoù hag adstummoù

Glock 17

An adstumm diazez eo ar Glock 17, ijinet e 1979-1982 gant Gaston Glock. An niver 17 a dalveze e c'halle bezañ lakaet 17 kartouchenn e karger an arm. Pemp rummad Glock 17 a zo bet betek-henn^[1] hag ur c'hwec'hvet hini zo bet kemennet a-benn miz Genver 2026^[2]. Gwerzhet int dindan an anvioù Gen1 da Gen6.

Rummad 1 (1980-1982)

Produet e voe da gentañ dindan an anv P80 evit arme Aostria a oa o klask un arm-dorn standart nevez. Framm ar bistolenn a oa e polimer, un danvez marc'had-mat, skañv ha solut war un dro, un arguzenn vat evit implijerien evel soudarded pe poliserien a zouge o arm gante bemdez. He skoer a oa lañset, da lavaret eo e veze adarmet anezhañ betek-gouzout ne vije ket bet skoet mat ur gartouchenn. Hec'h endalc'h (17 + 1 kartouchenn) a oa e-touez ar re vrasañ war ar marc'had pa oa bet savet.

Rummad 2 (1988)

Un nebeud cheñchamantoù a voe degaset e framm an arm, evel ar pikoù war an dornell da aesaat an dornata.

Rummad 3 (1998)

Reilhoù a voe ouzhpennet d'ar framm da stagañ warni pezhioù ouzhpenn evel gouleier. Cheñch a reas an dornell da glotañ gwelloc'h ouzh stumm ar bizied.

Rummad 4 (2009)

Neuz danvez ar framm a cheñchas.

Rummad 5 (2017)

Kemmet e voe beskell toull ar c'harger da vuanaat ar pourvezañ, ha dilezet roudoù bizied ar rummadoù 3 ha 4^[3].

Rummad 6 (kemennet a-benn miz Genver 2026)

Kemmoù a zo bet degaset evit gwellaat ergonomiezh an arm dreist-holl : neuz ar grip zo un tamm disheñvel, ha grip ouzhpenn evit ar biz-meud a zo a-us d'ar pontig. Eeunoc'h eo an draen ha kemmet eo bet toull ar c'harger. An elfenn nevez a weler ar muiañ eo al lost hiroc'h a-dreñv d'an dornikez, evit delc'her gwelloc'h ar bistolenn^[4]. An adstummoù G17, G19 ha G45 a vo kinniget e stumm Gen6 er penn-kentañ^[2].

Glock 17 Gen 1 ("rummad 1") implijet gant an nerzhioù ispisial danat.
Glock 17 Gen 2 (1988)
Glock 17 Gen 3 (1998)
Glock 17 Gen 4 (2009)
Glock 17 Gen 5 (2017)

Adstummoù all

Meur a adstumm eus ar Glock 17 orin a zo bet kinniget abaoe deroù ar bloavezhioù 1980. Anvet int holl gant al lizherenn G hag un niver disheñvel. E 2025 e vez gwerzhet an adstummoù-mañ^[5] :

Kambret e 9 mm Parabellum

G18, stumm aotomatek
G19, stumm bihanoc'h Compact
G26, stumm bihan-kenañ Subcompact
G34, stumm Competition
G45, G47, G48

Kambret e .22 Long Rifle

G44

Kambret e .40 S&W

G22 Standard
G23, stumm Compact
G27, stumm Subcompact
G35, stumm Competition

Kambret e 10 mm Auto

G20 Standard
G29, stumm Subcompact
G40, stumm Long slide dezhi ur c'hanol hiroc'h

Kambret e .45 Auto

G21 Standard
G30, stumm Subcompact
G41, stumm Competition

Kambret e .45 GAP

G37 Standard
G38, stumm Compact
G39, stumm Subcompact

Kambret e .380 Auto

G25 Standard
G28, stumm Subcompact
G42, stumm Subcompact

Kambret e .357 SIG

G31 Standard
G32, stumm Compact
G33, stumm Subcompact

Implij

Polis hag arme Aostria e voe ar re gentañ o tibab pistolennoù Glock 17 evel armoù reolius, dindan an anv P80, e 1982. Norvegia (e 1985) ha Sveden (e 1988) a reas heñvel evit o armeoù^[6]. E 2018 e oa mestr Glock war 65% eus marc'had an armoù-dorn e Stadoù-Unanet Amerika evit an nerzhioù polis pe surentez^[7]. Nerzhioù lu, aozadurioù surentez ha nerzhioù polis e 48 bro dre ar bed d'an nebeutañ a zo bet pourvezet gant pistolennoù Glock. E 2022, tirlu Bro-C'hall en doa resevet 74.596 Glock 17 Gen 5 a oa bet urzhiet gantañ e 2020 evit dont da vezañ o arm-dorn standart nevez^[8].

Pa voe gwerzhet ar c'hentañ pistolennoù Glock war ar marc'had sivil, er Stadoù-Unanet peurgetket, e savas reuz : o frammoù polimer a oa eus un tu gwelet fall gant lod e bed an armerezh, pa soñje da dud zo e oant re vresk ; eus an tu all, nec'het e oa ar Stadoù hag an embregerezhioù surentez pa veze kredet ne c'halle ket bezañ diskoachet ar pistolennoù gant porchedoù surentez an aerborzhioù^[6]. N'eo ket gwir koulskoude abalamour ma vez implijet tammoù dir evit pezhioù zo (kanol, riklerez ha gwinterelloù da skouer.