9 × 19 mm Parabellum

Arabat eo droukveskañ gant 9 × 19 mm Glisenti.

9 × 19 mm Parabellum
Kartouchennoù 9 mm Parabellum hag o boled (e-kreiz)
Doare
Doare korf an douilhez	kreuzenn, eeun
Doare skeiñ	e-kreiz
Bro orin	Impalaeriezh alaman
Muzulioù
Ø bannadell	9,01 mm
Ø trogleuziñ	8,82 mm
Ø kolier	9,65 mm
Ø korf an douilhez	9,93 mm
Ø strad	9,96 mm
Tevder ar strad	1,27 mm
Hirder an douilhez	19,15 mm
Hirder ar gartouchenn	29,69 mm
Perzhioù all
Pouez ar gartouchenn	12 g
Pouez ar vannadell	3,9 g - 8,4 g Boled standart : 125 greunenn (8,10 g)
Tizh mont e-maez V0	350 - 610 m/s
Gwask ar gazoù d'ar muiañ	2.350 bar
Energiezh ar vannadell	481 - 538 J
Emors	SP
Lezenn
Rummad e Bro-C'hall	B

An 9 × 19 mm Parabelllum, anvet ivez 9 mm Luger, zo ur c'halibr kartouchennoù savet e 1902 evit ar pistolennoù damaotomatek Parabellum a groge da vezañ implijet en arme alaman. Ar c'halibr armoù-dorn implijetañ eo er bed bremañ, abalamour dezhañ da vezañ unan eus munisionoù standart AFNA.

Istor

Savet e voe ar gartouchenn e 1902 diwar c'houlenn morlu an Impalaeriezh alaman, a oa plijet gant ar c'hartouchennoù 7,65 mm Parabellum met a glaske ur galloud-herzel uheloc'h. An embregerezh DWM a verraas neuze hirder douilhez ar 7,65 mm hag a uhelaas kalibr he munision betek 9,01 mm. Ar morlu a zibabas ar bistolenn Parabellum kambret evit ar gartouchenn nevez e 1904. Heuliet e voe gant an tirlu e 1908, pa choazas ar bistolenn Parabellum P08. E 1917 e voe kemmet ar boled krenngernennek orin evit unan begek ha gwisket. Ar stumm-mañ eo ar vannadell standart implijet betek hiziv. Goude ar Brezel-bed Kentañ e krogas broioù all da implijout ar munision en o armoù standart. An hini gentañ anezhe e voe Belgia, a choazas ar Browning Hi-Power kambret e 9 mm Parabellum.

Tri doare 9 mm Parabellum, a gleiz da zehou : boled plom krenngernennek, boled kernennek FMJ (Full Metal Jacket), boled HP (Hollow Point)

Implijet e voe ar munision gant an armeoù alaman e-pad an Eil Brezel-bed, e-barzh armoù standart evel an MP40 pe ar Walther P38, met broioù all a grogas da sevel armoù kambret evit ar munision, evel ar bistolenn-vindrailher STEN saoz, evit aesaat o implij gant ar Rezistanted a-drugarez da gartouchennoù seziset da gentañ. Goude ar brezel e ledas tamm-ha-tamm implij an 9 mm Parabellum evel kartouchennoù standart an armoù-dorn hag ar pistolennoù-mindrailher e armeoù AFNA hag e kalz servijoù polis. Ar Stadoù-Unanet a chomas pelloc'h gant ar .45 ACP, met choaz armoù evel ar Beretta 92 evit an arme stadunanat er bloavezhioù 1980 a lakaas an 9 mm Parabellum da vezañ ar c'halibr armoù-dorn implijetañ er bed hiziv an deiz.

Danvez

Boledoù an 9 mm Parabellum a vez alies ur galonenn blom gwisket gant laton, ha douilhez ar munision a zo e laton ivez peurliesañ. Douilhezioù e danvezioù all evel an dir kouevret (Alamagn, 1940), an dir penn-da-benn (Alamagn, 1941-1945 pe Frañs e 1954) pe an aluminioù (Suis e-pad an Eil Brezel-bed) a gaver ivez. An houarn zo bet implijet evit produiñ boledoù gant an Trede Reich ivez, pa oa berrentez war ar plom e-kerzh ar brezel.

Anvioù

Implijet e voe ar gartouchenn er bistolenn Luger P08 savet gant Georg Luger, un arm hag a zeuas da vezañ poblek e Stadoù-Unanet Amerika e hanterenn gentañ an XXvet kantved. En Europa e raer gant an anv 9 mm Parabellum pe 9 mm Para ; e Stadoù-Unanet Amerika e vez anvet aliesoc'h 9 mm Luger. Saverien munisionoù eus Europa evel Sellier & Bellot a ra muioc'h-mui gant an anv Luger da glask gounit tachenn war ar marc'had amerikan.

Un nebeud armoù brudet kambret e 9 mm Parabellum

• 
  Luger P08
• 
  Walther P38
• 
  Beretta 92
• 
  Mac modèle 50
• 
  STEN
• 
  MP40
• 
  Glock 17
• 
  SIG P210

Muzulioù

Liammoù diavaez

• (fr) Taolenn ar munision war lec'hienn ar CIP

Daveennoù

  Stag eo ar bajenn-mañ ouzh Porched an Armoù-tan