Dwynwen

Eus Wikipedia
Sauter à la navigation Sauter à la recherche

Ur santez a Gembre er Vvet kantved, eo DwynwenDouenwenn e brezhoneg. Anavezet eo e Breizh ivez. E Plouha, ma veze graet Santez Twina ar Mor anezhi, e veze pedet ar santez ouzh an derzhienn, ha pardon a veze d'ar 16 a viz Mae, hag e Sant-Maloù ma vez graet "Sainte Ouine" anezhi, ha ma vez ur foar en hec'h anv etre miz Genver ha miz C'hwevrer.

Anv zo anezhi e barzhoneg Anatol ar Braz "Deus feunteun santez Dwinen".

Kembreadez[kemmañ | kemmañ ar vammenn]

Dismantroù iliz Sant Dwuynwen e Llanddwyn.

Merc'h e oa Dwynwen, pe Dwyn, d'ar roue brezhon Brychan, a rene e Brycheiniog, er Vvet kantved. Hennezh en devoa merc'hed e-leizh, 24 hervez ar vojenn. Orgediñ a reas Dwynwen ouzh Maelon Dafodrill met ragaozet e oa un dimeziñ all gant he zad. Savet droug e Maelon, hag eñ da wallañ Dwynwen. Tec'hel a reas Dwynwen d'ar c'hoadeier ma c'houlennas ouzh Doue ankouaat Maelon.

Gant he c'hoar Ceinwen e oa aet da Enez Mon da chom, war an aod. Diwarni eo bet anvet Ynys Llanddwyn ha Porthddwyn, war lez ar Menai. Un iliz vihan zo bet savet eno d'ar santez. Menel a reas kousket. En he hunvre e welas un ael a roas dezhi ur banne died dous da ziverkañ ar soñj eus Maelon diwar he spered, ha treiñ ar paotr en skorn.

En Enez Llanddwyn, tostik da Enez Mon, e weler rivinoù iliz Dwynwen c'hoazh. Eno emañ Feunteun Dwynwen, ma'z eus ur pesk sakr o neuial, ha gantañ e vez diouganet planedenn an amourouzien. Mar berv an dour dirak ar weladennerien o devo karantez ha chañs vad, a gredont.

Er XIVvet kantved e voe gweladennet an enezenn gant ar barzh kembraek Dafydd ap Gwilym. Hennezh a welas ur skeudenn alaouret en iliz, poltred Dwynwen. Goulenn a reas digant ar santez mont da jubenn etrezañ ha Morfudd, ar plac'h a felle dezhañ gounit, petra bennak ma oa dimezet Morfudd !

Amourouzien[kemmañ | kemmañ ar vammenn]

Abaoe ar bloavezhioù 1960 e vez enoret Santez Dwynwen e Kembre war an ton bras, gant Dydd Santes Dwynwen (Deiz santez Dwynwen) d'ar 25 a viz Genver, evel santez an amourouzien, hag hini ar garantez, evel ma vez lidet Gouel Valentin e broioù zo e miz C'hwevrer. Embannet e vez kartennoù-post, aozet e vez sonadegoù.

Liammoù diavaez[kemmañ | kemmañ ar vammenn]

Lennadurezh[kemmañ | kemmañ ar vammenn]

  • Albert Deshayes, Dictionnaire des prénoms Celtiques, Le Chasse-Marée, Douarnenez.
  • Farmer, D.H., (1978) The Oxford Dictionary of Saints. Oxford: Clarendon Press.