Kastell Susinioù

Eus Wikipedia
Mont da : merdeiñ, klask
Kastell Susinioù, gwelet eus ar geunioù, e tu an aod

Emañ Kastell Susinioù e Gourenez Rewiz, e kumun Sarzhav, nepell diouzh ar mor bras. Savet e voe gant Duged Breizh etre an XIIIvet hag ar XVvet kantved. E-kichen ar c'hastell, savet etre ar mor hag ar geunioù, e c'heller gwelet ivez rivinoù ur chapel hag ur c'houldri.

Istor[kemmañ]

E deroù an XIIIvet kantved e voe kroget da sevel eno un ti-annez evit Duged Breizh, evito da zont da chaseal er c'hornad. E dibenn ar XIVvet kantved, goude Brezel Hêrezh Breizh, e voe brasaet ha kreñvaet ar c'hastell, a zeuas neuze da gaout tres ur c'hastell-kreñv goude al labourioù kaset da benn gant Yann IV ha Yann V.

E penn kentañ ar XVIvet kantved e voe skrapet ar c'hastell gant ar roue gall Frañsez Iañ ha profet d'unan eus e vestrezed. Dilezet e voe tamm-ha-tamm goude-se ha kregiñ a reas da gouezhañ en e boull. Da vare an Dispac'h gall e voe prenet gant ur marc'hadour pinvidik en em lakaas da werzhañ ar mein anezhañ.

Ar c'hastell kempennet a-nevez, gwelet eus ar porzh diabarzh

Prenet e voe ar c'hastell gant departamant ar Mor-Bihan e 1965 digant ar familh de Francheville a oa perc'henn warnañ hag a oa krog da glask adkempenn anezhañ. Gant an departamant e voe kaset al labour adkempenn war-raok, a-zevri, e fin an XXvet kantved. Dismantroù ur chapel a voe kavet e-kichen ar c'hastell hag enni ul leur daret kaer (diskouezet e vez al leur-se er c'hastell bremañ).

Bremañ en deus adkavet kastell Susinioù e neuz a wechall, neuz ur c'hastell-kreñv eus fin ar Grennamzer. Derc'hel a reer d'e gempenn un tammig ha digoret e vez d'ar weladennerien.

Ar c'hastell evel ma oa e deroù an XXvet kantved
Ar c'hastell e 2005. Labourioù zo d'ober c'hoazh



Liammoù diavaez[kemmañ]


Commons
Muioc'h a skeudennoù diwar-benn

a vo kavet e Kerandafar, ar sanailh ma vez klenket dafar ar Wikipedia.