Yann-Loeiz Rozeg
Yann-Loeiz Rozeg, Brogarour e anv-pluenn, bet ganet d'ar 14 a viz Genver 1898 e Ploueskad ha marvet d'an 2 a viz Gwengolo 1946 e Gwipavaz, a oa ur beleg misioner, ur saver kantikoù brezhonek hag ur skrivagner brezhonek eus Bro-Leon.
Buhez
[kemmañ | kemmañ ar vammenn]Labourerien-douar er Roc'hoù Bras e Ploueskad e oa e dud, Yann Rozeg ha Mari Kervoal. E Plouider e voe skoliataet er c'hentañ derez kent mont da skol abostolel Pontkastell-Keren e Bro-Naoned evit an eil derez. E dibenn e studi eno ec'h eas da gloerdi ar misionoù en abati Sant Jakez e Moñforzh.
Goude bout bet beleget en abati e voe kelenner e Kalvar Pontkastell e-pad bloaz a-raok bout anvet e kouent Tadoù Moñforzh e Josilin, ma voulc'has e vuhez a visioner. E 1936, diwar c'houlenn Adolphe Duparc, eskob Kemper ha Leon, e voe staliet un ti evit misionerien Moñforzh e Gwipavaz gant an tad Rozeg da briol ; adalek 1940 e voe misionerien vrezhoneger o vont di.
E-kerzh ar mediñ e miz Gwengolo e 48vet bloaz e varvas trumm Y.-L. Rozeg diwar ur stankadur-gwad p'edo o voueta un dornerez.
E-kichen e respet en Iliz e kasas Yann-Loeiz Rozeg unan el lennegezh vrezhoneg adalek 1932, d'an oad a 34 bloaz, dindan an anv-pluenn Brogarour. Romantoù berr a voe embannet a-rannoù er sizhunieg Breiz. E brezhoneg ivez ec'h embannas ul levr kantikoù hag un dastumad kanaouennoù, koulz ha pennadoù e meur a gelaouenn.
En e baperoù e voe kavet goude e dremenvan un droidigezh vrezhonek eus oberennoù an tad Moñforzh, a zo chomet diembann.
Oberennoù
[kemmañ | kemmañ ar vammenn]- Levrioù
- 1935 : Trec'h ar garantez • Ar voterez
- 1936 : Onenn
- 1939 : Kontammet !...
- 1945 : Eur veilhadenn vreizk dirak kraouig Bethleem
- Breiz a gan (divloaz)
- Kenlabour
- 1932 : Toliou lagad : nag eun dra souezus ?, e Breiz.
- 1933 : Digareziou ar yaouankiz, en Ar Vuhez Kristen.
- 1934 : Isor I.V. Wir Zikour Gwengamp, e Feiz ha Breiz.
- 1937 : Aer ger, e Feiz ha Breiz.
- 1938 : Chenchet penn d'ar vaz, en An Oaled • Goueliou brezonek an hanv-man, e Breizadig.
- 1939 : An tri venez, e Breiz • Kevell Breiz, en An Oaled.
- 1942 : An daouarn o bizied kamm, en Ar Vuhez Kristen.
- 1943 : Più e zo da damal ?, e Dihunamb • Bloavezh mat, en Arvor.
- 1948 : Ar beleg, e Kroaz Breiz.
- 1958 : Evit saludi, e Bleun Brug.
Levrlennadur
[kemmañ | kemmañ ar vammenn]- Elies, Fañch (Abeozen). Istor lennegezh an amzer-vremañ. Brest : Al Liamm, 1957, pp. 152-153
- Raoul, Lukian. Geriadur ar skrivagnerien ha yezhourien. Brest: Al Liamm, 1992, p. 376 (ISBN 978-2-7368-0034-5)