Olga Novo

Olga Novo

Olga Novo a zo ur varzhez hag un arnodskriderez galizek, ganet e Vilarmao (kêriadenn eus kumun A Pobra do Brollón), Proviñs Lugo, Galiza, e 1975, ha bet o chom e Breizh.

Ar skrivagnerez

Mestroniet war al lizhiri galizek ha portugalek e Skol-Veur Sant-Jakez Kompostela, e voe kelennerez e meur a Lise e Kalaikia a-raok divroañ da gelenn he yezh e Skol-Veur Breizh-Uhel, e Roazhon, hag e Skol-Veur Kreistez Breizh en Oriant goude. Distroet eo da C'haliza m'emañ bremañ o kelenn galizeg e Monforte de Lemos.

Tri barzhaz he deus embannet: A teta sobre o sol (1996), Nós nus (1997) e A cousa vermella (2004).

Ul levr arz — Magnalia an talbenn anezhañ — he deus skrivet gant al livourez Alexandra Domínguez hag ar barzh Xoán Abeleira. Savet ganti, a-hend-all, kalzik barzhonegoù strewet e bleunioù pe kelaouennoù (Festa da Palabra Silenciada, Dorna, Xistral) pe kazetennoù pemdeziek (El País, ABC).

Renet he doa bodadoù-skridaozañ ar c'helaouennoù Ólisbos, Animal ha Valdeleite, hag e talc'h da gemer perzh e hini Unión Libre abaoe an deroù.

Studioù he deus savet evit kendalc'hioù ha kelaouennoù, ma tielfenn alies oberennoù liammet gant an dreistgwirvoudelezh (pennadoù a-zivout ar skrivagner André Breton, ar c'haner Léo Ferré hag al livour Eugenio Granell, h.a.), pe gant kraf ar revelezh (evel a gaver en hec'h arnodskrid Tratado da pel (A-zivout ar c'hroc'hen), embannet e niverenn Erotismos ar gelaouenn Unión Libre (1999), renet ganti.

Dedennet gant ar varzhoniezh arnevez, he deus studiet barzhed evel ar barzh portugalat Fernando Pessoa hag an dreistgwirvoudelour brazilat Sérgio Lima.

En hañv 2009 he deus kemeret perzh en Emvod ar Gelted, en Oriant, o kenskrivañ un abadenn sonerezh ha fiñvkeudennerezh gant Alan Penneg ha fiñvskeudennaoueg Breizh diwar-benn ar skrivagner galizat Castelao hag o prezegenniñ (e galleg) a-ziwar Breizh e lennegezh Galiza.

E 2010 eo bet roet hec'h anv da Casa da Cultura e Pobra do Brollón.

Oberennoù

Barzhoniezh

• A teta sobre o sol (1996)
• Nós nus (1997)
• A cousa vermella (2004)
• Cráter (2011)

Arnodskridoù

• Por un vocabulario galego do sexo. A terminoloxía erótica de Claudio Rodríguez Fer, 1995.
• O lume vital de Claudio Rodríguez Fer (1999 , ha kresket e 2008)
• Uxío Novoneyra. Lingua loaira 2005.
• Introdución a Unha tempada no paraíso de Claudio Rodríguez Fer (2010)
• Erótica Medieval Galaica (2013)
• No principio foi o pracer (2017)

Troidigezh

Eus ar c'halaikeg, e kastilhaneg:

• El contradiscurso de las mujeres. Historia del proceso feminista, gant Carmen Blanco.

Eus ar galleg, e kastilhaneg:

• Vidas imaginarias gant Marcel Schwob. 2009. (Sinet an droidigezh dindan an anv Olga Novo Presa.)

Eus ar c'halaikeg, e galleg:

• Dédalus en Compostela / Dedalus à Compostelle, gant Vicente Risco. 2010. Kenembannet gant gouarnamant Kalaikia (Xunta de Galicia) ha Fundación Vicente Risco.

Prizioù

Meur a briz he deus bet:

• Premio Ánxel Fole
• Premio Losada Diéguez.
• Dezhi e oa gouestlet Devezh ar Varzhoniezh kalaikek gant Patronato da Cultura Galega de Montevideo e 2004.

Liammoù diavaez

• Pajenn gallek load ar gellaouenn ArMen a gaver enni testenn un atersadenn ag ar varzhez da geñver abadenn Alan Penneg en Emvod ar Gelted 2009
• Pajenn c'hallek Daktu a-zivout abadenn Castelao da vare Emvod ar Gelted 2009
• Pajenn c'hallek Daktu a-zivout prezegennoù Olga Novo da vare Emvod ar Gelted 2009
• Pajenn gallek ha kalaikek Daktu ma komzer eus abadenn Alan Penneg en Emvod ar Gelted 2009, ha ma kaver un tamm fiñvskeud eus deroù an abadenn, gant Olga Novo o tibunañ un destenn skrivet ganti e gallek
• Fichenn ar skrivagnerez er Biblioteca Virtual Galega
• Er Barcelona Review
• Las Afinidades Electivas
• Union Libre