Fañch Peru

Ur skrivagner brezhonek a Vro-Dreger eo Fañch Peru. Skrivet en deus un toullad levrioù, romantoù, eñvorennoù bugaleaj ha barzhonegoù, en ur yezh aes ha levezonet gant brezhoneg e gavell. Kelenner brezhoneg eo bet e Landreger, maer Konfort-Berc'hed e Treger a-raok mont war e leve.

Buhez

Ganet eo Fañch Peru e 1940 e Kerofern. E dad a oa botaouer-koat hag e vamm ostizez. Skoliataet eo bet e skol vihan Kerofern, skol Plouared, skol normal Sant-Brieg ha Roazhon. Komz a rae brezhoneg er gêr, ha desket en deus galleg e skol-veur Roazhon (CAPES war al lizhiri modern). Erruet e skol-veur Brest en deus studiet brezhoneg ha tudoniezh (Aotregezh ha DEA). Da c’houde eo bet kelenner galleg ha brezhoneg e skolaj ha lise Landreger eus 1965 da 1998, pa 'z eo aet war e leve, hag ivez sevenadur Breizh en I.U.F.M Sant-Brieg. Hiziv an deiz e kelenn diwar-benn gizioù kozh Breizh e skol-veur Brest (div eur bep sizhun).

Skrivagner

Kroget eo da skrivañ e brezhoneg pa oa studier e Roazhon. Ur pezhig-c’hoari "Pennherez ar Genkiz" a zo bet embannet gant Brud e 1996. Goude-se en deus skrivet dreist-holl pennadoù e brezhoneg pe e galleg evit kazetennoù pe kelaouennoù: Le Trégor, Skol Vreizh, Ar Falz, Le Peuple Breton... Pa oa bihan e rae ivez kenstrivadegoù reizhskrivañ, ret e oa ober un enklask ha da c’houde sevel ur pennad-skrid diwar-benn an enklask-se. Staget en deus da skrivañ pennadoù modernoc’h evit e skolajidi (e 1970). A-benn ar fin en doa graet levrigoù gant ar pennadoù-se, hag e-pad 17 bloaz ur gronikenn bep miz, ha diwar-se ez eus bet embannet 4 levr kronikoù.

Pa oa yaouank e skrive pa'n deveze amzer, met abaoe m'emañ war e leve e skriv diouzh beure. Skrivañ a ra bep beure ur frazenn pe div war e gaieroù skol. Skrivañ a ra un toullad mennozhioù mesk-ha-mesk, dreist-holl diwar-benn e vugaleaj, an natur...

Roet ez eus bet dezhañ medalenn Marc'heger Urzh an Arzoù hag al Lizhiri gant ar Stad C'hall e 2002.

Oberennoù

Romantoù

• An traoniennoù-glas
• Enezenn an eñvor, 1991
• Kernigelled ar Goañv, 1997
• Envorennoù melen ki bihan rodellek, 1999
• Eus an aod d’ar c’hoad don, 2002
• Kanfarded Milin ar Wern, 2008

Skridoù evit ar re yaouank

• Teñzor Run ar Gov (e gentañ levr evit ar grennarded)
• Bugel ar c'hoad
• Gwaskado

Barzhonegoù

Kroget eo Fañch Peru da skrivañ barzhonegoù diwezhatoc'h, war-dro ar bloavezhioù 1990. Al levr kentañ barzhonegoù en deus skrivet a oa divyezhek (Etrezek an aber sall).

• Etrezek an aber sall
• Hentoù ar c'hornog (divyezhek), skrivet e 1998.
• Va enezenn din-me deuet maez e 2000. (brezhoneg hepken)
• Gwenojennoù hon hunvreoù (2007) (divyezhek)

Troidigezhioù

• Koroll an Haïku, ul levr da zeskiñ skrivañ an Haïku. Troet diwar ar japaneg gant Alan Kervern.
• Levrioù barzhonegoù ar skrivagner saoz Roy Eales
• C'hoarioù Breizh troet diwar ar galleg, diwar-benn c'hoarioù Breizh.
• Kanfarded Milin ar Wern

Liammoù

• Pennad-kaoz war kaouenn.net amañ, amañ, hag amañ
• Pennad-kaoz war tv-tregor.com