Rouantelezh Kent

Kent
Vvet kantved – 825 →
Kêr-benn	Not specified
Yezh(où)	Hensaozneg
Gouarnamant	Monarkiezh
Istor
- Krouidigezh	Vvet kantved
- Staget ouzh Wessex	825

Rouantelezh Kent a oa ur rouantelezh angl-ha-saoz a gloke e dache tro pe dro gant kontelezh Kent. Krouet e voe war a-seblant er V^vet kantved gant Juted hag unan eus ar rouantelezhioù angl-ha-saoz pouezusañ e voe betek ar VI^vet kantved. Goude-se war zigresk ez eas e levezon ha goude an hanterenn gentañ ar VII^vet kantved ez eas da vezañ sujet d'e amezeien Wessex ha da c'houde Wessex. Tennañ a ra e anv eus meuriad brezhon, ar Cantiaci, a oa anvet ar vro Ceint diouto war a-seblant.

Savidigezh

Hervez Nennius hag ar C'hronik angl-ha-saoz e vefe bet krouet rouantelezh kent gant Hengist hag e vab Horsa, daou goprsoudard germanek a vefe bet galvet gant Vortigern d'e skoazell da zifenn Preden ouzh ar Bikted. Dezho en-defe roet Vortigern enez Thanet ha e verc'h Rowena en-defe euredet.

Goude m'o-doa paouezet ar vrezhoned d'e baeañ en defe Hengist en em savet ha stourmet ouzh Vortigern hag e vab Vortimer en emgannoù Wippedesfleot, Aegelesthrep ha Crecganford war-dro 450. Divarrek e vefe bet ar saksoned d'aloubiñ Preden a-bezh met mirout a reas Kent. Hervez Nennius en-defe Hengist aozet ur banvez gant uhelidi Preden da sinañ ur feur-skrid peoc'h met o zrubardiñ ha lazhadegañ en defe graet.

Difizius ez eo Nennius hag ar C'hronik angl-ha-saoz evit ar prantad-se, avat, hag heñvel-tre eo an danevell-se ouzh ar mojennoù germanek. Adkavout a reer, evit skouer, istor ar banvez en Niebelungenslied, gant Attila e perzh an trubard. Gwirheñvel eo mojennel pe damvojenell hag e oa kalz liesekoc'h istor savidigezh ar rouantelezh.

Hervez ar C'hronik angl-ha-saoz e vefe bet Oisc Kent roue kentañ ar vro hag anezhañ e tenn an dierniezh e anv - an oiscingas. Gwirheñvel e voe furmet ar rouantelezh a-nebeudoù e fin ar V^vet kantved hag e deroù ar VI^vet kantved gant goprsoudarded o-defe skrapet ar galloud digant an noblañs vrezhon.

Ar VI^vet kantved

Hogozik netra a anavezer diwar-benn istor Kent e-pad ar VI^vet kantved met, war a seblant e oa unan eus ar rouantelezhioù pouezusañ ha pinvidikañ e Preden. E binvidigezh e tenne eus e zarempredoù gant ar Franked hag e-pad ar prantad-se e oa ar greizenn genwerzhel pennañ er vro. Kornôk ar vro, a oa e sevenadur sakson kentoc'h eget jut, a voe aloubet ha staget gant rouaned Kent er VI^vet kantved, d'un ampoent n'anavezer ket. He feurheñvelder hag he sevenadur ispisial a viras ar rannvro hag un isrouantelezh e furmas alies evit hered ar gurun.

Abalamour d'e liammoù gant ar franked e voe Kent ar rouantelezh angl-ha-saoz kentañ gounezet d'ar feiz. E 597 ec'h erruas Sant-Aogustin er vro gant 40 manac'h hag ar pezh a yefe da vezañ arc'heskopti Canterbury a aozas.

Ar VII^vet kantved

Æthelbert Kent a voe gounezet d'ar feiz e 616. Unan eus ar rouaned angl-ha-saoz pouezusañ e oa war a seblant ha war un darn vras bro-Saoz en em astenne, ar pezh a lakaas Beda da reiñ an titl Brettwalda dezhañ. Aozañ a reas ul lezennaoueg, an hini gentañ e bro-Saoz.

Goude e varv ez eas war zigresk galloud Kent avat. Essex, a oa bet ur gwez dezhañ a adkavas e frankiz ha d'ar baganelezh e tistroas, ar pezh a viras an Iliz da lakaat e sez e Londrez evel ma venne. Kregiñ a reas ar rouantelezhioù arall da genwerzhañ gant ar c'hevandir ha da vihanoc'h ez eas perzh Kent. Goude 650 e oa aet war a seblant da sujet d'e amezeien. E 686 e voe aloubet gant Caedwalla Wessex a lakaas e vreur Mul Kent war an tron. Faezhet ha lazhet e voe gant un emsav e voe hemañ, avat ha daoust ma tistroas Caewalla da wastrañ ar rouantelezh e voe divarrek d'e aloubiñ adarre.

Mercia a aotrounie ar vro dre ur roue gwaz Oswine Kent war-dro 689 met ne renas hemañ nemet div vloavezh. Kaset kuit e voe gant Withred Kent a adsavas frankiz ar vro. E 694 e sinas ar peoc'h gant Wessex.

An VIII^vet kantved

Ar roue meur diwezhañ e voe Withred. Goudezañ e voe renet Kent gant meur a roue alies, daoust m'o-doe an dra-se en un doare peoc'hek. E 764 ez eas ar vro da sujet da Offa Mercia. O zitl a viras rouaned Kent da gentañ met er bloavezhioù 770 ec'h esaeas Offa da ren ar vro gantañ e unanig. Abeg un emsavadeg e voe an dra-se ha trec'h e voe tud Kent, war a seblant, en un emgann e-kichen Otford e 776 ; Reiñ a reas an trec'h-se tro d'ar vro da chom frank un nebeut bloavezhioù rak, war a seblant, Egbert II Kent hag Ealhmund Kent a oa barrek da ren en un doare dizalc'h. Ne badas ket, avat, hag adsevel a reas e aotrouniezh Offa e 785.

Ouzh Mercia e chomas staget Kent eus 785 betek 796. Goude marv Offa, avat e tistroas her ar rouantelezh, Eadbert Praen ha mont a reas da benn d'adsevel ar vro e-pad div vloavezh. Faezhet e voe gant Coenwulf Mercia e 798. E vreur Cuthred Kent e plasas hemañ war dron Kent. Goude e varv e 807 e voe adstaget Kent ouzh Mercia.

An IX^vet kantved

Kent a voe adsavet war-dro 820 gant Mercia ha roet d'un isroue Baldred Kent. E 825 e voe faezhet Mercia gant Egbert Wessex en Emgann Ellendun ha gant hemañ e voe skrapet Kent. Diarbennet e voe Baldred ha staget e voe tachenn Kent ouzh Wessex. D'un darn eus isrouantelezh Æthelstan Wessex ez eas war-dro 839 met da Wessex e tistroas goude e varv.

Gwelet ivez

Roll rouaned Kent

Daveoù

• Kronik angl-ha-saoz
• Wade-Evans, A. W. 1938. Nennius’s History of the Britions.
• K. P. Witney, The Kingdom of Kent (1982)
• D. P. Kirby, The Earliest English Kings (London: Unwin Hyman, 1991), chap. 2

Liammoù diavaez

Rouantelezh Kent war an History Files