Torrebenn !

Torrebenn ! zo ur romant istorel gant ar Bigouter Yann Bijer.

• Ti-embann : Embannadurioù Al Liamm,
• Deiziad embannadur : 25 a viz Gouere 2011,
• Niver a bajennoù : pevar c'hant daouzek (412).

An danvez

18 a viz Mae 1675 : emañ Laou ar Prad a-gevret gant e vamm (Mari-Gaourantina) en o ziig-soul e parrez Kombrid.
29 a viz Gwengolo 1675 : kuitaat a ra Laou hag e garedig Madalen enez Penfred (Inizi Glenan), hag int war bourzh un teirgwern hollandat, da glask repu e Kernev-Veur.

Etre an daou zeiziad-mañ ez eo pal an oberour, da-heul Laou ar pesketaer yaouank, reiñ da Yann Lenner da anavezout dre ar munud an darvoudoù kriz a zeuas da zrastañ tud ha parrezioù ar C'hab Kaval a-hed nevezamzer ha hañv 1675 (Emsavadeg ar Bonedoù ruz).

Graet e veze gant an droienn Torr e benn ! evel galv d'an emgann gant an emsaverien hag implijet e voe-hi ivez, d'an 2 a viz Gouere 1675 e chapel Itron-Varia Dreminou (Ploveur), evel sinadur da beurechuiñ krouidigezh ar C'hod Kouer gant dileuridi ar pevarzek parrez kenunanet en emsav.

Tudennoù istorel...

...al levr

• Nikolaz Euzennou a Gersalaun (?-1675), aotrou maner ar Gozhkêr (Kombrid).

...meneget el levr

• Michiel de Ruyter (1607-1676), amiral hollandat,
• Charles d'Albert d'Ailly (1625-1698), dug a Chaulnes, Gouarnour Breizh (1670-1695),
• Armand-Jean de Vignerot du Plessis (1629-1715), dug a Richelieu hag a Fronsas, aotrou baron Pont-'n-Abad,
• Sebastian ar Balp (1639-1675), unan eus pennoù-bras emsavidi Kreiz Breizh,
• François Michel Le Tellier de Louvois (1641-1691), ministr Loeiz XIV.

Goproù

Tapet e voe un nebeud prizioù koulz gant an oberenn hag ar skrivagner e 2012 :

• Ar Prizioù - Levrioù a faltazi ha Priz Rannvroel Dazont ar Brezhoneg - Levr Faltazi
• Priz Lennegel Sten Kidna – Le long cours du Bono