Gwener (deiz)

Eus Wikipedia

Ar Gwener eo an deiz etre ar Yaou hag ar Sadorn. Hervez ar reizhiad a laka ar sizhun da gregiñ gant al Lun, ha homañ eo ar reizhiad erbedet gant ISO 8601, ez eo ar pempvet deiz eus ar sizhun. Gant ar reizhiad a laka ar sizhun da gregiñ gant ar Sul, hengounel e meur a vro eus kornaoueg Europa, hag a-orin yuzev-kristen, ez eo ar c'hwec'hvet devezh. Donet a ra an anv diwar an doueez Gwener, unan eus doueed pennañ ar Romaned, adalek amzer Julius Caesar.

Yezh[kemmañ | kemmañ ar vammenn]

  • Ar Gwener eo anv an deiz, ar gwenervezh pa gomzer eus an devezh, ha gwenervezhiad pa gomzer eus ar c'hementad (labour da skouer) graet en deiz-se.
  • D'ar Gwener a vez lâret, pe digwener pa gomzer eus ar Gwener kentañ pe eus an hini diwezhañ.

Relijion[kemmañ | kemmañ ar vammenn]

Ar Gwener er relijion gristen[kemmañ | kemmañ ar vammenn]

Deiz marv Jezuz war ar groaz eo, hag abalamour da se e tle ar gristenien ober vijil en deiz-se. Gwelet ar c'hrennlavar: Ar Gwener, Devezh peñver. E Breizh ne veze ket debret kig gwechall neuze, hag ar c'hiz e oa debriñ krampouezh pe pesked. Un devezh a-bouez eo Gwener diwezhañ ar C'horaiz, a vez graet Gwener-ar-Groaz anezhañ.

Gwener-ar-Groaz[kemmañ | kemmañ ar vammenn]

Un deiz a-bouez eo Gwener-ar Groaz-er relijion gristen pa lavar Sant Yann Aveliour eo en deiz ma veze lidet Pask gant ar Yuzevien ez eo bet barnet ha kondaonet Jezuz-Krist da vezañ kroazstaget. Sul-Fask eo anv ar Sul a zeu goude ha Yaou-Gamblit ar Yaou en e raok.
N'eo ket stabil deiziad Gwener-ar-Groaz pa vez jedet pegoulz e vo deiz Sul-Fask diwar deiziadur al loar.

Ar Gwener en Islam[kemmañ | kemmañ ar vammenn]

Un deiz a-bouez eo pep Gwener evit ar vuzulmaned sunnit ha chiit pa vezont kustum da vont d'ober o lidoù d'ar voskeenn. Er broioù muzulman ne labour ket kalz a dud en deiz-se.

Liammoù diavaez[kemmañ | kemmañ ar vammenn]

Wikeriadur
Sellit ouzh ar ger Gwener er
wikeriadur, ar geriadur frank.


Deizioù ar sizhun
LunMeurzhMerc'herYaouGwenerSadornSul