Jil Penneg

Eus Wikipedia
(Adkaset eus Gilles Penneg)
Sauter à la navigation Sauter à la recherche

Jil Penneg a zo un aktour brezhonek a vicher, bet kelenner war ar brezhoneg ivez, ganet e Kemper e miz Meurzh 1959.

Buhez[kemmañ | kemmañ ar vammenn]

Bet eo bet Jil Penneg o labourat er c'henwerzh etrebroadel ha labouret en deus evel redaktour kevratoù evit an Ifremer goude-se. Dielfenner programmoù eo bet ivez war an urzhiataerezh. Evit sevel Geriadur brezhoneg An Here en deus labouret ivez hag aet eo da gelenner war ar brezhoneg dindan ar gevredigezh Mervent e Kerne-Izel.

Aktour hag advouezhier brezhonek ha troer[kemmañ | kemmañ ar vammenn]

Krog e oa da labourat evit ar skinwel brezhonek pa oa bet tutaet e 2000 evit advouezhiañ tresadennoù-bev evit TV Breizh, ha diwezhatoc'h filmoù evel an heuliad skinwel Perry Mason.
Sevel istitloù brezhonek en deus bet graet ivez evit Frañs 3 Kornôg ha Dizale.
Tapet en deus muioc'h a vrud p'en deus c'hoariet e 2007 an dudenn Jean-Paul Paul, hag eñ ur barman, er sitkom Leurenn BZH skignet war TV Roazhon hag embannet dindan stumm un DVD.

Troer eo ivez. Troet e vez gantañ tresadennoù-bev ha filmoù advouezhiet gant ar gevredigezh Dizale da skouer. Stummer eo war ar brezhoneg evit ul lodenn eus e amzer labour.

Skrivañ[kemmañ | kemmañ ar vammenn]

Skrivañ a ra pennadoù brezhonek sizhuniek e-barzh Le Télégramme abaoe 2008. Sinet e vez e bennadoù dindan ar stumm ofisiel "Gilles Pennec". Padal eo techet bremañ Patrom:Abaoe pegoulz? da sinañ "Jil Penneg" kentoc'h pa vez labour lennegel. E dibenn miz Even 2016 en doa sinet e bennad diwezhañ evit "Spered ar Vro" e-barzh an Télégramme. War-dro pevar c'hant poltred en doa skrivet e-pad ouzhpenn eizh vloaz.

Pennadoù all en deus bet skrivet evit "Al Lanv" ha "Bremañ". Danevelloù bet skrivet gantañ zo bet embannet e-barzh ar gelaouenn "Al Liamm" ivez.