Jil Penneg

Jil Penneg (Gilles Pennec er marihoù) zo un aktour brezhonek a vicher, un troour, ur c'helaouenner hag un danevellour brezhonek, bet kelenner war ar brezhoneg ivez, ganet e Kemper e miz Meurzh 1959.

Buhez

Bet eo bet Jil Penneg o labourat er c'henwerzh etrebroadel ha labouret en deus evel redaktour kevratoù evit an Ifremer goude-se. Dielfenner programmoù eo bet ivez war an urzhiataerezh. Evit sevel Geriadur brezhoneg An Here en deus labouret ivez hag aet eo da gelenner war ar brezhoneg gant ar gevredigezh Mervent e Kerne-Izel ha gant Stumdi ivez.

Aktour hag eilvouezhier brezhonek ha troer

Krog e oa da labourat evit ar skinwel brezhonek pa oa bet tutaet e 2000 evit advouezhiañ tresadennoù-bev evit TV Breizh, ha diwezhatoc'h filmoù evel an heuliad skinwel Perry Mason. Mouezh Sean Connery e brezhoneg eo ivez.

Sevel istitloù brezhonek en deus bet graet ivez evit Frañs 3 Kornôg ha Dizale.

Tapet en deus muioc'h a vrud p'en deus c'hoariet e 2007 an dudenn Jean-Paul Paul, hag eñ barman, er sitkom Leurenn BZH skignet war TV Roazhon hag embannet dindan stumm un DVD.

Troer eo ivez. Troet e vez gantañ tresadennoù-bev ha filmoù advouezhiet gant ar gevredigezh Dizale.

Skrivagner

Skrivet en deus pennadoù brezhonek sizhuniek e-barzh Le Télégramme etre 2008 ha 2016. Sinet e vez e bennadoù dindan ar stumm ofisiel "Gilles Pennec". Padal eo techet bremañ Patrom:Abaoe pegoulz? da sinañ "Jil Penneg" kentoc'h pa vez labour lennegel. E dibenn miz Even 2016 en doa sinet e bennad diwezhañ evit "Spered ar Vro". Evit an Télégramme, war-dro pevar c'hant poltred en doa skrivet e-pad ouzhpenn eizh vloaz.

Pennadoù brezhonek all en deus bet skrivet evit "Al Lanv" ha "Bremañ". Danevelloù bet skrivet gantañ zo bet embannet e-barzh ar gelaouenn "Al Liamm" ivez. Darn anezho zo bet embannet en ul levr e 2020 gant Embannadurioù Al Liamm.

Un troour galleg-brezhoneg a-vicher hag a-youl-vat eo bet a-viskoazh.

Oberennoù

Troidigezhioù galleg-brezhoneg

• Agnès Pormenté, Le labyrinthe de l'ours, Perros-Guirec, La Tilv, 1999. Kontadenn.ISNI 0000 0000 0182 5590
• Roba, Waou ! Alo Billig ? Bannoù-Heol, 2002. Bandennoù treset. Troidigezh asamblez gant Arno Elegoet ha Maurice Hamon.
• Bruno Bertin, Tro-gaer estlamm Vick ha Vicky, Roazhon, Embann P'tit Louis, 2003. Bandennoù treset.
• Bruno Bertin, Sébastien Tanguy, Sorserezed Breselien, 3 levrenn, Roazhon, Embann P'tit Louis, 2003-2004. Bandennoù treset.
• Marie-Josée Christien, Un monde de pierres-Steudadoù Karnag, Carhaix, Les Éditions sauvages, 2015. Brezhoneg war lerc'h an destenn c'hallek. Barzhoniezh.
• Marie-Josée Christien, Gwernioù kuzhet, Les Éditions sauvages, 2022. Barzhoniezh.

Faltazi

• 2020 : Koktel ar vuhez, Al Liamm. 15 danevell (ISBN 978-2-7368-0140-3)
• 2021 : Koktel ar vuhez 2, Al Liamm (ISBN 978-2-7368-0149-6)
• 2022 : Koktel ar vuhez 3, Al Liamm

A bep seurt

• (br) (fr) Jil Penneg, D'ar skol ! Diwan, 40 ans/bloaz, Locus Solus, 2017 (ISBN 978-2-36833-185-9)

Levrlennadur

• (fr) Yann Rivallain, Ur c'hoktel eo ar vuhez. In Bretons, niv. 161, Février 2020. Enni e kont e vuhez.