Bilzig

Bilzig eo anv ur romant brezhonek skrivet gant Fañch al Lae.

An istor

Bilzig zo ur romant da gelenn ar yaouankiz. Embannet e voe al lodenn gentañ ("Bugaleach Bilzig") evit ar wech kentañ er gelaouenn Buhez Breiz, adal an niverenn 37 (miz Genver 1924) betek an niverenn 47 (miz Du 1924). E 1925 e voe embannet ar romant a-bezh.

Kontañ a ra bugaleaj ha yaouankiz ur paotr paour hag emzivad eus parrez Lokireg, e Bro-Dreger. Savet eo gant e voereb Izabel. Afer en deus ouzh ar person hag ar c'hont, dalc'herien ar galloud er barrez. War a seblant ez eo c'hoarvezet an istor en XVIII^vet kantved etre Lokireg, Plistin (Toull-ar-c'hirri, al Lev-Draezh), Sant-Eflamm), Lokmikael, Perroz-Gireg, Montroulez, Lannuon…

Lakaet en deus an aozer barzhonegoù e-barzh an istor.

Skrivañ a ra Fañch al Lae gant ar skritur KLT ha santet e vez da-vat blaz yezh Treger. Ne vez ket lakaet a ñ e fin an anv-verb, ao met ô, eur evit ur, buhe, anean, kenta, pôtr, penôs, ... Bez' ez eus gerioù a skriv evel e klev anezho.

Levrlennadur

Ur pennad diwarbenn Bilzig zo en Annales de Bretagne e 1958, e-lec'h ma 'n em c'houlenn Pêr Trepos hag-eñ ez eo tennet ar pennad tri eus Bilzig e gwirionez.

Embannadurioù

• Embannadur Buhez Breiz, e 1925.
• Embannadur Emgleo Breiz, e falc'huneg, e 1963 gant skeudennoù gant F. Ar Goail ; adembannet eo bet gant ur golo nevez e 1995.
• Un embannadur divyezhek, skrivet e KLT evel e 1925 gant un droidigezh e galleg graet gant Bernez Kabon, gant Skol Vreizh e 2003 (ISBN 978-2-911447-77-8).

Limmoù diavaez

• (fr) Katalog ar BnF