8 mm Lebel
| 8 mm Lebel | |
|---|---|
 Ur gartouchenn 8x51R anvet boaz 8 mm Lebel | |
| Perzhioù | |
| Kalibr | 8 mm |
| Doare korf an douilhez | bourled |
| Doare skeiñ | e-kreiz |
| Bro orin |  Bro-C'hall
|
| Muzulioù | |
| Ø bannadell | 8,3 mm |
| Ø kolier | 8,9 mm |
| Ø stagell an douilhez | 11,42 mm |
| Ø korf an douilhez | 13,77 mm |
| Ø strad | 16 mm |
| Hirder an douilhez | 51 mm |
| Hirder ar gartouchenn | 75 mm |
| Perzhioù all | |
| Pouez ar vannadell | 12,8 g |
| Tizh o vont e-maez V0 | 632 m/s (er fuzuilh Lebel) |
| Energiezh ar vannadell | 3.364 J |
| Lezenn | |
| Rummad e Bro-C'hall | C |
An 8 mm Lebel, hervez e anv ofisiel evit ar CIP 8 x 51 R (gwechall 8 x 50 R) a oa ar munision ijinet evit ar fuzuilh Lebel e 1886. Implijet eo bet ivez en un nebeud armoù gall betek an Eil Brezel-bed dreist-holl.
Istor[kemmañ | kemmañ ar vammenn]
Krouidigezh[kemmañ | kemmañ ar vammenn]
E miz Genver 1886 e c'houlennas ar jeneral Boulanger, ministr nevez ar Brezel e Frañs, e vije kinniget dezhañ er bloaz un arm hag ur munision nevez o tennañ gounid eus ar poultr hep moged ijinet e fin 1884 gant Paul Vieille. Pemp miz war-lerc'h e voe kinniget dezhañ ar fuzuilh Lebel hag ar gartouchenn 8 mm savet eviti. An daou a voe dibabet diouzhtu evit armeoù ar vro.[1]
Un araokadenn vras e oa ar gartouchenn 8 mm Lebel. Betek-neuze e veze implijet bannadelloù 11 mm o zreuzkiz, met a-drugarez d'ar poultr hep moged e c'hellas bezañ implijet bannadelloù bihanoc'h o zreuzkiz, dezhe tizhoù kalz uheloc'h evit reoù ar boledoù kaset gant poultr du (632 m/s evit ur boled Lebel, war-dro 350 m/s d'ar muiañ gant an doare kozh). Ar soudarded a c'helle ivez tennañ hep sevel pezhioù koumoul moged a zitoure o enebourien war o lec'h-tennañ. Boledoù an 8 mm Lebel a oa ar re gentañ gwisket gant mailhchor, memes ma rankjont bezañ savet e laton penn-da-benn adalek 1898 abalamour da gudennoù tarzhañ. Un nebeud adstummoù eus ar gartouchenn a voe savet betek ar Modèle 1932, he stumm diwezhañ.[1]
Implij[kemmañ | kemmañ ar vammenn]
Implijet e voe ar c'hartouchennoù 8 x 51 R a-hed ar Brezel-bed Kentañ gant ar soudarded war-droad gall en o fuzuilh reoliek Lebel. Un nebeud armoù gall all a voe kambret evit ar munision-mañ, en o zouez :
- fuzuilhoù Berthier 1902, 1907, 07/15 ha 1916
- Fusil Automatique Modèle 1917
- mindrailherezioù Saint-Étienne modèle 1907 hag Hotchkiss modèle 1914
Dilezet e voe ar c'halibr tamm-ha-tamm gant an arme c'hall adalek ar bloavezhioù 1920 dre m'o doa diskouezet ar munisionoù gant ur bourled bezañ kudennek en armoù aotomatek. Produet e vez c'hoazh kartouchennoù 8 mm Lebel evit an TAR (Tennañ gant Armoù Reoliek) gant un dornad embregerezhioù evel Fiocchi, Prvi Partizan pe Cartouches Sologne.
Levrlennadur[kemmañ | kemmañ ar vammenn]
- (fr) HUON Jean & BARRELIER Alain, Les cartouches 8 mm Lebel, Crépon-Leblond, 2016, 184 p.
Daveennoù[kemmañ | kemmañ ar vammenn]
- ↑ 1,0 ha1,1 (fr) 8 mm Lebel war Arme Et Passion (lennet d'an 12/05/2024)
