Pan (doue)

Uhelvos d'an doue Pan, er Palez Nevez, e Roma.

Pan o kelenn d'e eromenos, ar mêsaer yaouank Dafnis, penaos seniñ fleüt. IIvet kantved. Delwenn roman e marmor, savet diwar un delwenn hellazat gant Heliodoros (IIIde-IIvet kantved kent JK). Dastumad Farnese, Mirdi broadel an hendraouriezh, e Napoli.

Pan (Πάν; genitiv: Πανός; e gregach, « holl ») e oa doue ar vêsaerien hag o chatal, ha hini an natur en he fezh (holl) e mojennoù Hellaz kozh. Klotañ a ra gant an doue roman Faunus.

Kerniel, divhar, ha penn a-dreñv evel re ur c'havr en deus, evel ur satir. Alies e vez heñvelekaet ouzh Fanes pe Protogonos. Er relijion orfek eo an doue nemetañ.

Mojenn

Droukvesk a vez alies etrezañ hag ar satired, hanter tud ha hanter bouc'hed, dezho divskouarn, lost ha treid givri. Neuze e vez gwelet Pan evel ar vilañ anezho, tres gouez dezhañ. Ar skeudenn-se eo an hini a deuio da vezañ an Diaoul betek en hon amzer-ni.

En Himn Homerek gouestlet dezhañ eo anvet mab da Hermes ha d'un nimfenn a zo merc'h da Dryops. Ganet eo war ar menez Cyllène, en Arkadia. O welout e neuz ken euzhus e tec'has e vamm, met e dad a gasas e vab d'ar menez Olympos(gant se en deus Pan un natur doueel pe damzoueel), ma plijas d'an doueed e welout. Hervez an oberour eo eus se e teu e anv, rak an holl (pan) a voe laouenaet gantañ.

Hervez mojennoù all e oa mab da Zeus ha da g-Kallisto pe da Zeus ha d'an nimfenn Thymbris, pe da Zeus ha da Hybris, doueez an Démesure.

Lennadurezh

• Catherine Johns, Sex or Symbol, Erotic Images of Greece and Rome, Londrez, 1983.
• The Great God Pan, romant gant Arthur Machen (1894).

Pennadoù kar

• Cernunnos
• Faunus