Anv annezidi Stadoù-Unanet Amerika

Eus Wikipedia
Mont da : merdeiñ, klask

Stadunaniz a vez graet eus annezidi Stadoù-Unanet Amerika abaoe ur pennadig amzer da glotañ gant anv ar vro, diwar skouer ar spagnoleg dreist-holl.
Alies koulskoude e vez implijet an termen Amerikaned pa vez c'hoant d'ober anv eus Stadunaniz. Graet e vez e-giz-se dre m'eo deuet Stadoù-Unanet Amerika da vezañ ar galloud armerzhel ha politikel brasañ en Amerika hag er bed a-bezh. En em silañ a ra o levezon sevenadurel dre-holl ivez, ha dreist-holl abaoe an Eil Brezel-Bed.
Daoust da se eo re ledan ha re amresis an termen Amerikaned pa vez c'hoant d'ober anv en un doare reizh eus annezidi ar vro-hont. Kalz pelloc'h eget SUA ez a Amerika. Kizidik eo annezidi Suamerika dreist-holl war ar poent-mañ. Ganto e vez graet ingal gant an termen estadunidense pe estadounidense[1], ha n'eo ket gant Americanos (Amerikaned) evit ober anv eus tud SUA.

E brezhoneg[kemmañ]

E brezhoneg komzet ne vez graet nemet gant Amerikan en unander, hag Amerikaned el liester. Kinniget ez eus bet gant lod lakaat kemm etre Amerikan, a vefe mat evit SUA, ha Amerikad a vefe mat evit ar c'hevandir a-bezh[2]. N’eo ket bet heuliet kaer an diforc'hañ-se, marteze abalamour m'eo re dost an daou stumm an eil ouzh egile, met Geriadur an Here a laka un tamm kemm etrezo o-daou: Amerikad a dalvez evit ar c'hevandir a-bezh, Amerikan evit ar c'hevandir a-bezh, hag, ent-strizh, evit Stadoù-Unanet Amerika[3].

E yezhoù all[kemmañ]

E galleg[kemmañ]

E galleg e vez graet a-wechoù gant États-Unien pe Étasunien. Testeniet eo adalek 1965, met n'eo deuet war-wel da vat nemet er bloavezhioù 1990. Daoust ma vez graet aliesoc'hik gantañ e Kanada eget en Europa ez eo ral-kenañ implij an termen-se, ha gwelet e vez dre vras en daou du eus ar Meurvor Atlantel evel un termen dismegañsus, pe da vihanañ abegus e-keñver Stadoù-Unanet Amerika. E Bro-C'hall ne vez implijet koulz lavaret nemet gant ar metoù enep-amerikan, evel an altermondialisted, ar Réseau Voltaire, Jean-Luc Mélenchon[4] ha Marine Le Pen. E 2008 ez eus bet divizet gant France-Info ne vefe ket graet gant an termen-se ken gant ar gelaouennerien.

Liammoù diavaez[kemmañ]

Notennoù ha daveennoù[kemmañ]

  1. Estadounidense eo ar stumm erbedet e spagnoleg gant ar Real Academia Español[1]
  2. Da skouer: Geriadur arnevez gallek-brezhonek, Imbourc'h, 1983, p. 8.
  3. Geriadur brezhoneg an Here, 2001, p. 40a
  4. Gwelet e vlog