World of Guns: Gun Disassembly
| Tachenn | c'hoari video miltamm, c'hoari video drevezadur  |
|---|---|
| Bro orin | Bro-Saoz |
| Deiziad embann | 21 Mae 2014 |
| Dasparzher | Steam, Google Play, App Store |
| Savenn | Microsoft Windows, Android, iOS, OS X, Linux |
| Operating system | Android, iOS |
| Lusker grafik | Unity |
| Doare c'hoari | c'hoari e-unan |
| Trobarzhell dont tre | touchscreen |
| Diaz embann | embannadur niverel, pellgargañ niverel |
| Lec'hienn ofisiel | http://noble-empire.com/ |
| Dezverket dre | c'hoari dishual |
| Kenglotus gant | Steam Deck |
World of Guns : Gun Disassembly, lesanvet a-wechoù WoG, zo ur c’hoari video drevezadur ha miltamm embannet evit ar wech kentañ war iOS e 2010. Ennañ e ranker sevel ha divontañ armoù-tan hiniennel. Un holloueziadur war an armoù koulz hag ur c’hoari miltamm eo[1]. Produet eo gant ar studio ukrainat Noble Empire Corporation[2].
Deskrivadur
[kemmañ | kemmañ ar vammenn]Evit pep arm e vez kinniget un tutorial evit deskiñ divontañ hag adsevel an arm en urzh mat, e daou vod : unan diazez, evel ar pezh a vefe graet evit ur c’hempenn boaz, pe en ur mod klok, da lavaret eo divontañ ar pezhioù penn-da-benn. Goude-se e c’haller c’hoari da zivontañ ha da adsevel anezhañ ar buanañ ar gwellañ. Pa zeuer a-benn e taper poentoù skiant-prenet, hag a servijo evit lakaat armoù nevez war-wel. Prenañ poentoù a c’haller ivez evit mont buanoc’h gant ar c’hoari. Ur mod ober a zo ivez, ma c’haller implijout an arm, kuzhat pezhioù dezhañ pe lakaat lod da vezañ treuzwelus evit kompren mont en-dro e vekanikerezh. Pennadoù-titouriñ tennet deus Wikipedia a zo evit pep arm. Standoù tennañ niverel a c’haller distankañ evit implijout an armoù en endro-se.
180 arm a oa kinniget e miz Kerzu 2024, ha reoù nevez a vez ouzhpennet bep miz. Kinniget eo ar c'hoari e meur a yezh, en o zouez galleg pe saozneg.
Istor an diorren
[kemmañ | kemmañ ar vammenn]Krouet e voe ar c’hoari gant an Ukraniat Valerii Zadorozhnyi adalek 2008, asambles gant ur saver c’hoarioù-videoioù all. Ne oant ket barrek war an armoù, met dont a reas ar soñj dezhe sevel ur c’hoari goude bezañ sellet ouzh video enlinenn war divontañ ar pistolennoù Glock. A-drugarez da ditouroù kavet war internet e kinnigjont e 2009 Gun Disassembly 3D, stumm kentañ ar c’hoari war iOS, ennañ pemp arm-dorn : Colt M1911, SIG P228, Desert Eagle, Beretta 92FS ha Glock 17. Berzh a reas, ha divizout a rejont an daou grouer diorren ar c’hoari muioc’h c’hoazh[1]. E 2014 e voe kinniget war ar savenn Steam dindan e anv a-vremañ. Sikouret e voent tamm-ha-tamm gant tud arbennikaet eus ar bed a-bezh.
E 2023 e veze implijet World of Guns gant 100.000 c’hoarier bep miz, ha pellgarget e oa bet ouzhpenn 20 milion gwech ar c’hoari war an holl plateforme[3]. Ur free-to-play eo, da lavaret eo digoust da bellgargañ, met poentoù a c’haller prenañ evit mont war-raok buanoc’h. Un doare holloueziadur 3D eo, a vez implijet estreget gant c’hoarierien : graet e vez gantañ da vare stummadurioù evit an dud a-vicher, pe war ar pemdez gant tennerien zo evit kempenn o dafar[1]. En Ukrainia eo digoust ha digor er c’hoari an armoù implijet gant arme ar vro[3].
Liammoù diavaez
[kemmañ | kemmañ ar vammenn]- (en) Lec'hienn ofisiel
- (fr) World of Guns: Gun Disassembly war ar savenn Steam
Daveennoù
[kemmañ | kemmañ ar vammenn]- ↑ 1,0 1,1 ha1,2 (fr) LAMOTHE Arnaud, World of Guns : un jeu qui nous concerne, LAI Publications, 14/07/2023 (lennet d'an 11/12/2024)
- ↑ (en) About war lec'hienn Noble Empire Corporation (lennet d'an 12/12/2024)
- ↑ 3,0 ha3,1 (en) DANYLOV Oleg, World of Guns: Gun Disassembly. An interview with the developers of the Ukrainian games about guns, atersadenn Valerii Zadorozhnyi, 25/02/2023 (lennet d'an 11/12/2024)
