Pietro Mazzarino
Pierre Mazzarino, pe Mazzarini, ganet e Palermo e 1576 ha marvet e Roma d'ar 4 a viz C'hwevrer 1654, a oa tad d'ar gardinaled Jules Mazarin ha Michel Mazarin.
E dad Giulio Mazzarini, genidik a gêr Genova, a oa deuet da chom da Sikilia, e Castel-Mazzarino, alese an anv-tiegezh. Un tamm peadra a reas a-benn gallout kas e vab Pietro d'ar skol, ma teuas da vout noter.
E 1590, goude marv e dad, e werzhas e arrebeuri da vont da chom da Roma ha da echuiñ e studioù. Eno, gant lizheroù erbediñ, ez eas da-gaout ar priñs Filippo Colonna, a oa konestabl meur Napoli, priñs Paliano ha penn skourr henañ an tiegezh Colonna, ha kemeret e voe da gambrelan.
E 1608 e teuas da vout keodedour roman. Dimeziñ a reas da Ortensia Bufalini (1575-1644), filhorez da Filippo Colonna.
Eured ha bugale[kemmañ | kemmañ ar vammenn]
Pried e oa Pietro Mazzarini da Ortensia Bufalini (1575-1644). C'hwec'h bugel o doe :
- Giulio Mazzarini (1602-1661), kardinal, diplomat ha ministr ;
- Alessandro, anavezetoc'h evel Michele Mazzarini (1607-1648), beleg dominikan, arc'heskob Aix-en-Provence ;
- Anna-Maria Mazzarini (1607-1669), priolez Santa-Maria e Campo-Marzo ;
- Laura Margherita Mazzarini (1608-1685), pried d'ar c'hont Geronimo Martinozzi (1639, (mab da Vincenzo Martinozzi), ha div verc'h o doe :
- Laura Martinozzi, a zimezas da Alfonso IV d'Este, dug Modena ;
- Anne-Marie Martinozzi dimezet e 1654 d'ar priñs gall Armand de Bourbon-Conti ;
- Cleria Mazzarini (1609-1649), dimezet d'ar markiz Pietro Muti (†1649), mab d'ar markiz Fabrizio Muti ;
- Geronima Mazzarini (1614-1656), dimezet d'ar baron Michele Mancini (†1660), mab da Paolo Mancini.