Padrig Montauzier

Eus Wikipedia
Logo Adsav! Strollad Pobl Vreizh krouet gant Padrig Montauzier

Padrig Montauzier (Patrick Montauzier) zo ur broadelour breizhat bet ganet e 1950, e Roazhon.

Ganet eo bet en ur familh a vicherourion eus Roazhon ; e dad a oa unan eus renerion CGT Il-ha-Gwilen. Deuet eo da vout entanet gant Breizh dre selaou abadennoù Charlez ar Gall ha lenn Istor Breizh an abad Henri Poisson (1898-1977).

Komunour e oa pa oa yaouank, a-raok kemer perzh er strolladoù broadelour Strollad Ar Vro ha Strollad Komunour Breizh e penn-kentañ ar bloavezhioù 70. Dont a reas da vout stourmer en FLB dindan al lesanv Colonel Armand. Ugent gwalldaol a voe tamallet dezhañ gant polis Bro-C'hall. Toullbac'het e voe e 1978 evit bout lakaet bombezennoù da darzhañ e kastell Versailhez. Dieubet e voe gant ar prezidant gall François Mitterrand e 1981.

Ezel eus ar strollad POBL e oa er bloavezhioù 1980-1990 a-raok krouiñ ur strollad politikel eus an tu-dehoù pellañ : Adsav. Rener ar gelaouenn War Raok ! eo abaoe ar bloaz 2000, ivez. Aet eo da gabaliñ evit dilennadegoù kanton ar bloaz 2008 e Dol, war anv Adsav!, ha 4% eus ar mouezhioù en doa bet.

E penn un embregerezh kirri-samm e oa a-raok mont war e leve. E verc'h Mannaig he deus skrivet ul levr diwar-benn an FLB.

E 2012, Padrig Montauzier a roas harp d'al listenn Bretagne, nous avons foi en toi krouet gant Jeune Bretagne, skourr breizhat ar Bloc identitaire gall evit dilennadeg ar gannaded.