Jak ar Marichal

Jak ar Marichal, pe ar Marechal (Jacques Marie Maréchal e marilhoù-kêr), ganet e (Moustoer-Logunec'h, d’an 18 a viz Genver 1878 ha marvet e Pleuwigner, d'an 18 a viz Eost 1945), a oa ur beleg e eskopti Gwened, ur stourmer breizhat hag ur saver kanaouennoù. Sevel a reas un toullad kanaoennoù brezhonek hag darn anezho a reas berzh bras. Blei Lannvaus, Blei Lann-vauz, Er Meùel Bihan e oa e anvioù-pluenn.

Buhez

Mont a reas da skol bublik Pleuwigner hag eno e kejas gant ur mignon ha kenvreur hed-buhez, Job ar Bayon. Goude e studioù e kloerdi bihan Santez-Anna-Gwened hag e kloerdi bras Gwened e voe beleget e 1902 ha goude-se e voe kelenner e kloerdi Santez-Anna-Gwened, kure e Sarzhav, kure en iliz-veur Gwened, ha person Pleuwigner goude ar Brezel-bed kentañ. Anvet e voe chaloni a-enor e 1929.

Obererezhioù evit ar brezhoneg

E-touez e ganaouennoù brudetañ, hag a vez kanet c'hoazh, emañ Kousk, Breiz-Izel !’’ (1906), Kenavo deoc'h, gwir Vretoned, Sonit bombard, sonit binioù pe c'hoazh Alc'hwez an eürusted. Ouzhpenn e ganaouennoù e voe savet gantañ ivez kantikoù, barzhonegoù, ur pezh-c'hoari ha pennadoù all c’hoazh.
Labourat a reas evit kas oberezhioù ar Bleun-Brug e eskopti Gwened hag e kemeras ur perzh bras e-barzh aozadur Gouel ar Bleun-Brug Keranna (Santez-Anna-Gwened) e 1926, asamblez gant Yerom Buleon. Kenlabourat a reas gant kelaouennoù brezhonek evel Dihunamb hag Ar Vro adalek 1905. Ezel e voe ouzh Kevredigezh Vroadel Breizh (Union Régionaliste Bretonne'’).

Embannadennoù

• Ereden é Bro-Guened, dastumad sonennoù, An Oriant, 1925, 8 p.
• Asamblez gant Yerom Buleon, Soñnenneu kenstrivadeg Koulmig Arvor, Brest, Feiz ha Breiz], 1926.
• Roue Begnen’. Lodenn al levr Tud brudet hor bro-ni, Embannadurieu Dihunamb, 1937.

Levrlennadur

• Lukian Raoul, Geriadur ar skrivagnerien hag ar yezhourien, Al Liamm, 1992, pp. 247b-248a (ISBN 2-7368-0034-6)