Arunachal Pradesh

Stad Arunachal Pradesh

Arunachal Pradesh (अरुणाचल प्रदेश en hindieg, distaget [ʌruˈɳɑːʧʌl prʌˈdeːɕ]) zo unan eus stadoù India, e biz ar vro, e-harz ar menezioù Himalaya. Itanagar eo kêr-benn ar stad. En-dro da Arunachal Pradesh emañ stad Asam er c’hreisteiz ha Nagaland er gevred. Er c’hornôg emañ Bhoutan, en hanternoz Tibet (Sina) hag er reter emañ Myanmar (Birmania).

Embann a ra Republik Pobl Sina e tlefe Arunachal Pradesh bezañ en he dalc’h, dre ma vefe un tamm eus Tibet.

Un tamm eus stad Asam e oa Arunachal Pradesh betek ar bloavezh 1987. Talvezout a ra an anv Arunachal Pradesh kement ha "bro ar sav-heol".

Meur a zek yezh disheñvel a vez komzet en Arunachal Pradesh, an darn vrasañ anezho o vezañ eus familh ar yezhoù tibetek-burmek. E-touez annezidi ar stad e kaver meur a gumuniezh sevenadurel : an darn vrasañ eus an dud zo Tibetiz a-fet sevenadur hag ul lodenn anezho zo repuidi eus Tibet ; kalz a dud genidik eus lec’hioù all en India hag eus Bangladesh a gaver ivez.