Herve Helloco
Herve Helloco (7 Gwengolo 1908-23 Here 1993) a oa ur stourmer broadelour breton.
Studioù a reas e Pariz ha mont da alvokad goude. E-kerzh e studioù e reas anaoudegezh gant Célestin Lainé ha mont a reas e-barzh ar strollad kuzh Gwenn ha Du[1] E miz Eost 1939 e kemeras perzh e dilestradeg an armoù a oa e bourzh e vag, ar Gwalarn, war aod Lokireg.[2]. Harzet e voe met lezet e voe da vont pemp miz diwezhatoc'h, dre ziouer a brouennoù. Treiñ a reas e galleg al levr My fight for Irish freedom, ul levr skrivet gant an Iwerzhonad Dan Breen, moullet e Roazhon gant an titl Mon combat pour l'Irlande.
E-kerzh an Eil Brezel-bed e krouas, gant tud all, ar gelaouenn Galv hag e voe ar rener anezhi. D'ar mare-se ivez e oa e servij titouriñ Strollad Broadel Breizh[3]. Mont a reas da guzh e dibenn ar brezel ha tec'hout a reas da Gembre. Barnet e voe d'ar marv dre zesfailh d'ar 25 a viz Mezheven 1946. Chom a reas e Kembre eta, ur pennad, e skolaj Harlech. Goude-se ez eas d'en em staliañ da Exeter, e Devon, ma kelennas galleg en ur skol eil derez e-pad ugent vloaz. E-pad meur a vloaz e voe sekretour etrebroadel ar C'hendalc'h Keltiek. Mervel a reas e Torquay, e Devon, d'an oad a 85 bloaz.
Ur verc'h en doa, Gwenn, hag he devoa desket brezhoneg e Skol-Veur Roazhon er bloavezhioù 1970.
Notennoù[kemmañ | kemmañ ar vammenn]
- ↑ Le mouvement breton, Alain Déniel, 1976, p. 164
- ↑ Le mouvement breton, Alain Déniel, 1976, p. 212
- ↑ Hervez Kristian Hamon el lec'hienn Le Monde en Guerre