Parlamant Katalonia

Eus Wikipedia
Sauter à la navigation Sauter à la recherche
Nerzhioù e Parlamant Katalonia abaoe miz Kerzu 2017.
  • ██ CUP: 4 c'hador
  • ██ CatComú–Podem: 8 kador
  • ██ ERC–CatSí: 32 gador
  • ██ PSC–PSOE: 17 kador
  • ██ JuntsxCat: 34 c'hador
  • ██ Cs: 36 kador
  • ██ PP: 4 c'hador
  • Parlamant Katalonia (e katalaneg : Parlament de Catalunya, en okitaneg ; Parlament de Catalonha, e kastilhaneg : Parlamento de Cataluña) a zo breujoù lezennel Katalonia. Gant Prezidantelezh Katalonia ha Gouarnamant Katalonia e ra Generalitat Katalonia, da lavaret eo ensavadurioù emren ar vro.

    135 kannad a zo ennañ hag emañ e sez e Palez Parlamant Katalonia e Barcelona. E brezidant eo Roger Torrent abaoe miz Genver 2018.

    Termenet eo galloudoù ar Parlamant gant melladoù 55 da 66 eus statud emrenerezh Katalonia : reprezantiñ a ra pobl Katalonia, votiñ a ra ar budjed, kontrolliñ ha reiñ lañs a ra da bolitikerezh ar gouarnamant. Hervez statud emrenerezh ar vro n'haller ket tagañ ar Parlamant.

    Orin ar Parlamant a zo en ensavadurioù katalan an XIvet kantved met savet eo bet an hini modern er bloavezhioù 1980 goude ma oa degouezhet an demokratelezh e Spagn en-dro da c'houde marv Francisco Franco.

    E 2017 e oa bet votet gant ar Parlamant, ur vajorelezh dizalc'hour ennañ, ul lezenn evit aozañ ur referendom war ar goulenn-se da vezañ dalc'het d'ar 1 a viz Here. D'ar 27 a viz Here e oa bet votet gantañ an dizalc'hidigezh diwar kinnig Prezidant ar Generalitat, Carles Puigdemont. Freuzet eo bet ar Parlamant diwar-neuze gant gouarnamant Spagn a-drugarez da vellad 155 Bonreizh Spagn evit ober un dilennadeg nevez e miz Kerzu 2017, he deus roet tamm pe damm ar memes majorelezh d'an dizalc'herien.