Mendo Alão

Eus Wikipedia
Sauter à la navigation Sauter à la recherche

Mendo Alão, pe Alaniz ( war-dro 1000- war-dro 1050 e Bragança), aotrou Vila de Bragança, a oa ur marc'heg en XIvet kantved, hag ur manac'h en abati São Salvador de Castro de Avelãs, e Portugal, en amzer ar roue Alfonso VI León.

E vuhez[kemmañ | kemmañ ar vammenn]

Hervez al Livro Velho de Linhagens e oa mab-bihan da Alan II, Dug Breizh.
Ganet e oa war-dro ar bloaz 1000 e Breizh.
Mab e vije bet da Alan Breizh (war-dro 965- war-dro 990), kont Naoned, hag a vije bet tennet e vadoù digantañ gant e genderv Konan Iañ, kont Roazhon, ma vije aet da repuiñ da Rouantelezh León, ha kloareg e oa moarvat e manati Castro de Avelãs, a c'hallje bezañ bet diazezet gantañ.

E vamm a vije ur briñsez armenian eus rouantelezh Vaspurakan, deuet da birc'hirinañ da Santiago de Compostela ha deuet da chom er manati. Dimezet e vije bet ar priñs breizhat d'ar briñsez armenian Joana Romães Arcruni.

Evel-se e tispleger orin an anv Alão, met diaes e seblant lakaat ar bloavezhioù hag ar fedoù da glotañ. Ma en doa kavet e dad e bried e León ne c'hall ket ar mab bezañ ganet e Naoned.

Iliz Castro de Avelãs.


Eured ha bugale[kemmañ | kemmañ ar vammenn]

Mendo Alão Bragança a zimezas d'ur briñsez armenian, marteze ur verc'h pe un nizez da Senekerim-Hovhannes Artsruni. Daou vugel o doa bet :

  1. Fernão Mendes de Bragança (war-dro 1020-?)
  2. Ouroana Mendes (war-dro 1020-?) a zimezas da Fafes Sarrazins de Lanhoso[1][2] (1020 - Emgann Águas de Maia, Coimbra, 1071), mab d'ar c'hont Sarracino de Lanhoso e Goda Moniz.

Levrlennadurezh[kemmañ | kemmañ ar vammenn]

  • Nobiliário das Gerações de Entre Douro e Minho, Manuel de Sousa da Silva, Carvalhos de Basto, Ponte de Lima, 2000. vol. II-pg. 9.
  • Nobiliário das Famílias de Portugal, Felgueiras Gayo, Carvalhos de Basto, 2ª Edição, Braga, 1989. vol. I-pg. 248 (Alões).
  • Nobiliário das Gerações de Entre Douro e Minho, Manuel de Sousa da Silva, Carvalhos de Basto, Ponte de Lima, 2000, vol. II-pg. 8.
  • Os Teixeira de Sampaio da Ilha Terceira, Jorge Forjaz, CEGHHF-Universidade Moderna do Porto, Porto, 2001, pg. 14