Amhrán na bhFiann

Amhrán na bhFiann (distagadur iwerzhonek: [ˈəuɾˠaːn̪ˠ n̪ˠə ˈvʲiːən̪ˠ]) eo kan broadel Iwerzhon.

Daoust ma vez kanet en iwerzhoneg peurliesañ, e oa bet savet ar c’han-se, da gentañ, e saozneg. Skrivet e oa bet ar pozioù saoznek e 1907 gant an titl A Soldier's Song (Kan ur Soudard). Anavezet eo ivez gant an titl Amhrán Náisiúnta na hÉireann ("Kan broadel Iwerzhon").

Istor

Skrivet e oa bet ar pozioù saoznek gant Peadar Kearney ha savet e oa bet ar sonerezh gant Patrick Heeney e 1907. Embannet e oa bet er gazetenn republikan Irish Freedom e 1912. Lakaet e oa bet en iwerzhoneg gant Liam Ó Rinn.

Buan e oa deuet da vezañ ur c’han-bale gant an Irish Volunteers (ur strollad brogarourien armet). Kanet e oa bet gant emsaverien Emsavadeg Pask e 1916, gant ar vroadelourien a oa bet bac’het e kamp-bac’h Frongoch, e Kembre, goude an Emsavadeg, ha gant emouestlidi an Irish Republican Army (IRA) e Brezel Dieubidigezh Iwerzhon (1919–1921).

En deroù ne oa kan broadel ebet gant Stad Dieub Iwerzhon, ha n’eo nemet e 1926 e oa bet lakaet Amhrán na bhFiann da gan broadel ofisiel. Adalek ar mare-se e veze klevet bep noz, e dibenn an abadennoù skignet gant Radio Éireann.

Unanourien Hanternoz Iwerzhon a sell ouzh Amhrán na bhFiann evel kan broadel Republik Iwerzhon hepken, ha n’eo ket unan evit an enez a-bezh. Er c’hrogadoù rugbi, pa vez ur skipailh eus Iwerzhon a-bezh o c’hoari a-enep skipailhoù eus broioù all, e reer gant ur ganaouenn savet a-ratozh, anvet Ireland's Call.

Pozioù

Ne ganer peurliesañ nemet an diskan. Setu amañ ar pozioù anezhañ :

Amhrán na bhFiann	A Soldier's Song	Kan ar soudard
Sinne Fianna Fáil Atá faoi gheall ag Éirinn Buíon dár slua Thar toinn do ráinig chugainn Fé mhóid bheith saor Seantír ár sinsear feasta Ní fhágfar fén tíorán ná faoin tráill Anocht a théam sa bhearna bhaoil Le gean ar Ghaeil, chun báis nó saoil Le gunna scréach, faoi lámhach na bpiléar Seo libh canaídh Amhrán na bhFiann	Soldiers are we Whose lives are pledged to Ireland Some have come From a land beyond the wave Sworn to be free No more our ancient sire land Shall shelter the despot or the slave Tonight we man the "bearna baol" In Erin's cause, come woe or weal (well) 'Mid cannon's roar and rifles' peal We'll chant a soldier's song	Ni eo soudarded an Tonkad O deus gouestlet o buhez da Iwerzhon. Lod ac’hanomp zo deuet Eus ur vro en tu all d'ar mor. Touet hon eus da vezañ dieub. Hor bro gozh hiviziken Ne roio ket bod ken d'an tirant pe d'ar sklav. Fenoz, deomp d'an talbenn Evit karantez Iwerzhon, betek ar marv. E-kreiz trouz ar fuzuilhoù, dindan ar boledoù, E kanimp deoc’h kan ar soudarded.

Gwelet ivez

• Roll ar c'hanoù broadel

Liammoù diavaez

• Wikisource - Amhrán na bhFiann
• Amhrán na bhFiann - TG4