Ifigeneia

Ifigeneia (e kreiz) kaset d’an aberzh dirak an diouganer Kalc'has (en dorn dehoù) hag Agamemnon he zad (en dorn kleiz) a c’holo e benn da ziskouez e c’hlac’har. Artemis a weler en oabl, ganti un heizez a gemero lec’h ar plac’h. Hirlivadur war blastr, war-lerc’h 62 goude JK. Dont a ra eus porrastell Ti ar Barzh (VI, 8, 3.5) e Pompei. Miret e Mirdi Broadel Hendraouriezh Napoli.

Ifigeneia (Ἰφιγένεια / Iphigéneia e gregach), Ifianassa (Ἰφιάνασσα / Iphianassa) gant Homeros, a oa merc'h da Agamemnon ha Klytaimnestra, c'hoar da Orestes, Elektra ha C'hrysothemis. Evel diskennadez da Atreüs e oa mallozh an doueed warni evel war holl dud he ziegezh, an Atrided.

Mojenn

Gant he zad, war ali an diouganer Kalc'has, e oa bet divizet e vije aberzhet d'an doueez Artemis, a oa o terc'hel listri ar C'hresianed en Aolis, hag a vire outo da skeiñ war-du Troia.