Hedvig Ulrika De la Gardie

Eus Wikipedia
Sauter à la navigation Sauter à la recherche
Hedvig Ulrika De la Gardie

Hedvig Ulrika De la Gardie (Stockholm, Sveden 1761 – Stockholm 1832) a oa un dimezell a enor svedat. Pried e oa da Gustaf Mauritz Armfelt. Gouarnerez priñsed tiegezh roue Sveden e oa etre 1799 ha 1803.

He buhez[kemmañ | kemmañ ar vammenn]

Merc'h e oa d'ar c'hont Carl Julius De la Gardie ha d'ar gontez Magdalena Christina Stenbock.

Dimezell a enor e oa gant ar rouanez Sofia Magdalena Danmark, pried Gustav III .

E miz Eost 1785 e timezas e Palez Drottningholm da Gustaf Mauritz Armfelt. Armfelt en doa c'hoant da zimeziñ dezhi abalamour d'he renk ha d'hec'h anv ; doujañs outi en doa, karantez n'en doa ket, hag ur pried-kleiz en doa, anvet Magdalena Rudenschöld.

Hedvig Ulrika avat a gare he fried hag a chomas feal dezhañ ; habask, tavedek ha leal e oa.

En 1792 ez eas da-heul he fried da Naplez, ma oa bet anvet da gannad, evit e bellaat eus al lez. Eno e krogas Armfelt da iriennañ gant Katelin II, impalaerez Rusia. Fiziet en doa paperioù en Hedvig, ha hi o c'huzhas en douar en o liorzh. Ar mevel o lakaas en douar avat a werzhas an dihelloù hag a lakaas paper gwenn en o lec'h. Evel-se e voe dizoloet irienn Armfelt.

Urzh a oa bet roet da gregiñ en he fried, met hennezh a deuas a-benn da skampañ kuit. Se zo kaoz e voe-hi bac'het meur a wech en Roma ha Venezia, e-pad he beaj eus Italia da Riga, en Livonia, en 1794. Kondaonet e voe he gwaz d'ar marv in absentia en abeg d'e drubarderezh, hag harluet e voe eus Sveden ha difennet outi ober gant e anv. Dre ma oa bet dimezell a enor gant ar rouanez e voe aotreet da virout he goprig-emdennañ hag un toullad gwenneien a voe roet dezhi da veajiñ gant an Dug Karl. Axel von Fersen ar Yaouankañ an hini a reas war-dro an afer-se e Sveden. Hi avat a gave dezhi e oa digablus he fried, en-ofisiel da vihanañ.
O chom e oant e Kaluga, dindan warez Katelin II. Hedvig Ulrika a reas evit he fried meur a wech. Mont a reas da welout an tsar Pavel Iañ Rusia da c'houlenn doareoù-bevañ gwelloc'h, e 1796, met kaeg a reas.

En 1797 e voe diskleriet e oa Gustav IV Adolf prest da ren , ha di d'e gaout da gaout aotre da zistreiñ da Sveden, da c'hallout kemer anv he fried, ha da gaout promesa ne vije ket klasket kregiñ ennañ ken hag e vije laosket Armfelt da vevañ e lec'h a garfe, nemet e Sveden ha Rusia, da ehanañ an heskinerezh a-enep dezhañ . Neuze e teuas a-benn da gaout aotre digant an tsar da leuskel Armfelt da guitaat Rusia, hag e 1798 ez eas gantaén da Verlin.

En 1799 e tistroas Hedvig da Sveden ma voe anvet e penn lez bugale ar rouaned. Asantiñ a reas kemer ar garg gant ma vije laosket he fried, Armfelt, da zistreiñ da Sveden.